सिटीपोष्ट
काठमाडौं, ८ साउन । नेपाली चलचित्र क्षेत्रमा पछिल्लो समय युवा पुस्तालाई लक्षित कथावस्तु र नयाँ पुस्ताका कलाकारलाई केन्द्रमा राखेर चलचित्र निर्माण गर्ने क्रम बढ्दो छ । यही प्रवृत्तिलाई निरन्तरता दिँदै निर्देशक बलिराम चौहान आफ्नो दोस्रो निर्देशकीय चलचित्र ‘ल्याङ्ग ल्याङ्ग’को तयारीमा जुटेका छन् । चलचित्रको कथा मात्र होइन, कलाकार छनोटको शैलीले पनि चलचित्रप्रति चासो बढाउन थालेको छ ।
गत वर्ष प्रदर्शन भएको ‘द ब्ल्यू लाइट’ निर्देशन गरेका चौहानले यसपटक समकालीन युवाको मनोविज्ञान, मित्रता, मानसिक दबाब र जीवनका जटिल मोडलाई केन्द्रमा राखेर चलचित्र निर्माण गर्न लागेका हुन् । चलचित्रका लागि रियान गिरी र सन्तोष बानियाँ मुख्य भूमिकामा अनुबन्धित भइसकेका छन् । दुवैले ‘होस्टेल ३’बाट नेपाली चलचित्रमा डेब्यु गरेका थिए र अब दोस्रो पटक एउटै पर्दा साझा गर्न लागेका हुन् ।
तर चलचित्रको सबैभन्दा धेरै चर्चा भने मुख्य अभिनेत्रीलाई लिएर भइरहेको छ । निर्माण टिमले औपचारिक रूपमा अभिनेत्रीको नाम सार्वजनिक नगरे पनि चलचित्र वृत्तमा सिमरन पन्त मुख्य भूमिकाका लागि अनुबन्धित भइसकेको चर्चा छ । निर्माण पक्षले यसबारे स्पष्ट पुष्टि नगरे पनि निर्देशक बलिराम चौहानले सिमरनको नामलाई पूर्ण रूपमा अस्वीकार नगरेकाले चर्चाले थप बल पाएको छ ।
यदि सिमरन पन्त पनि चलचित्रमा आबद्ध भएको पुष्टि भयो भने ‘होस्टेल ३’बाट दर्शकमाझ परिचित बनेका तीन युवा कलाकार पुनः एउटै चलचित्रमा देखिनेछन् । पछिल्लो समय यी कलाकारप्रति युवा दर्शकको आकर्षण बढिरहेका कारण निर्माण टिमले उनीहरूको लोकप्रियतालाई व्यावसायिक रूपमा उपयोग गर्न खोजेको विश्लेषण पनि गरिएको छ ।
निर्माण टिम निकट स्रोतका अनुसार रियान, सन्तोष र सिमरनलाई एउटै दिन चलचित्रका लागि अनुबन्ध गरिएको थियो । यद्यपि निर्माण पक्षले प्रचार रणनीतिअन्तर्गत कलाकारको सूची क्रमशः सार्वजनिक गर्ने योजना बनाएको बुझिएको छ ।
स्काइफल पिक्चर्सको प्रस्तुति रहने ‘ल्याङ्ग ल्याङ्ग’को स्लोगन ‘हरेक युवाको कथा’ राखिएको छ । शीर्षक आफैंले चलचित्रको विषयवस्तुबारे संकेत गर्छ ।
नेपाली युवापुस्तामा ‘ल्याङ्ग ल्याङ्ग’ शब्द साथीभाइबीचको निरन्तर किचकिच, मानसिक दबाब, अनावश्यक तनाव वा एउटै विषयमा दोहोरिने हैरानी व्यक्त गर्न प्रयोग गरिन्छ । यही लोकप्रिय बोलिचालीलाई चलचित्रको शीर्षक बनाएर निर्देशकले नयाँ पुस्तासँग भावनात्मक सम्बन्ध स्थापित गर्ने प्रयास गरेको देखिन्छ ।
केही समयअघि सार्वजनिक गरिएको चलचित्रको थिम पोस्टरले पनि कथाको भाव स्पष्ट संकेत दिएको थियो । पोस्टरमा उल्लेख गरिएको ‘पालना गर्ने वाचा र बाँच्ने उद्देश्य ः यो जीवनको लागि यति मात्र हो’ भन्ने वाक्यले प्रेम, सम्बन्ध, विश्वासघात, आत्मसंघर्ष र मानसिक द्वन्द्वजस्ता विषयलाई केन्द्रमा राखिएको अनुमान गर्न सकिन्छ ।
पछिल्लो समय मानसिक स्वास्थ्य र भावनात्मक संघर्षजस्ता विषय नेपाली चलचित्रमा कम उठ्ने गरेका बेला ‘ल्याङ्ग ल्याङ्ग’ले फरक कथावस्तु प्रस्तुत गर्ने अपेक्षा गरिएको छ ।
चलचित्रको कथा निर्देशक बलिराम चौहान र उपाश्री खतिवडाले संयुक्त रूपमा तयार पारेका हुन् । पटकथामा समकालीन युवाको जीवनशैली, सम्बन्ध, आकांक्षा र उनीहरूले भोगिरहेका सामाजिक तथा मानसिक चुनौतीलाई यथार्थपरक ढंगले प्रस्तुत गर्ने प्रयास गरिएको निर्माण पक्षको दाबी छ ।
हाल चलचित्र प्रि–प्रोडक्सन चरणमा रहेको छ । कलाकार छनोट, कार्यशाला तथा छायांकन तयारीलाई तीव्र बनाइएको निर्माण टिमले जनाएको छ । प्रदर्शन मिति र अन्य प्राविधिक टोलीबारे भने क्रमशः जानकारी सार्वजनिक गरिने बताइएको छ ।
पछिल्ला वर्षहरूमा नयाँ अनुहार र युवा केन्द्रित कथाले नेपाली बक्स अफिसमा सकारात्मक प्रभाव पारिरहेका बेला ‘ल्याङ्ग ल्याङ्ग’ले पनि त्यही वर्गका दर्शकलाई लक्षित गरेको देखिन्छ । यदि ‘होस्टेल ३’का चर्चित कलाकार पुनः एउटै पर्दामा देखिए भने चलचित्रको प्रारम्भिक बजार र दर्शकीय उत्साह अझ बलियो बन्ने अनुमान गरिएको छ ।
प्रतिक्रिया दिनुहोस्