निर्वाचन प्रयोजनका लागि अहिले सम्म ८० दल दर्ता

काठमाडौँ, १० मंसिर । आगामी फागुन २१ गते तोकिएको प्रतिनिधिसभा निर्वाचनको तयारी अन्तर्गत निर्वाचन आयोगले दल दर्ता प्रक्रिया संचालन गरिरहेको छ । दल दर्ता निर्वाचन प्रक्रियाको आधारभूत चरण हो, जसमार्फत राजनीतिक दलहरूले निर्वाचनमा सहभागी हुने औपचारिक अधिकार पाउँछन् ।

अहिले सम्म दर्ता भएका दलहरूको संख्या निर्वाचन आयोगका प्रवक्ता नारायण प्रसाद भट्टराईका अनुसार मंगलबार साँझसम्म ८० दलले निर्वाचन प्रयोजनका लागि दर्ता गराएका छन् । आयोगमा १३४ (ठूला÷मझौला÷साना दल) दलमध्ये ८० दलले मात्र यसपटकको चुनावका लागि दर्ता नवीकरण÷दर्ता प्रक्रिया पूरा गरेका हुन् ।

मंगलबारको दिनमा मात्रै १६ दलले दर्ता गराएका छन् । यसले चुनाव नजिकिँदै जाँदा दलहरूको सक्रियता तीव्र भएको संकेत गर्छ । निर्वाचन आयोगले तोकेको दल दर्ताको अन्तिम म्याद बुधबारसम्म (आजसम्म) रहेको छ । अन्तिम दिनमा प्रायः धेरै दलहरूले दर्ता गर्ने परम्परा भएकाले अन्तिम संख्या अझै बढ्ने अपेक्षा गरिएको छ ।

हालसम्म ८० दलले दर्ता गरेसँगै आगामी निर्वाचनमा राजनीतिक प्रतिस्पर्धा व्यापक हुने संकेत देखिन्छ । बाँकी एकदिनको म्यादमा दर्ता संख्या थप वृद्धि हुने पूर्ण सम्भावना छ ।
यसैगरी, नेकपा एमालेले फागुन २१ मा हुने प्रतिनिधिसभा निर्वाचनका लागि दल दर्ता गरेको छ । मंगलबार एमाले नेताहरु कान्तिपथस्थित निर्वाचन आयोग पुगेर प्रतिनिधिसभा निर्वाचन प्रयोजनका लागि दल दर्ता गरेका हुन् ।

एमाले निर्वाचन विभाग प्रमुख निरज आचार्यले आफूहरू आयोगमा पुगेर दल दर्ता गरेको बताउनुभयो । ‘हामीले हाम्रो दल अद्यावधिक ग¥यौँ, लोकतान्त्रिक पार्टी भएकाले एमाले आफुलाई लोकतान्त्रिक प्रक्रियामा सधै अपडेट गर्छौँ’, आचार्यको भनाइ छ । मंगलबारै एमालेले संसद् पुनस्र्थापनाको मागसहित सर्वोच्च अदालतमा रिट समेत पेस गरेको छ ।