काठमाडौँ, २ मङ्सिरः आइवार्ट नेपालको आयोजनामा चौथो अन्तरराष्ट्रिय महिला चलचित्र महोत्सव तथा छैटौँ छोटो चलचित्र महोत्सव सम्पन्न गरेको छ ।
नेपाली महिला निर्देशक तथा सिर्जनशीललाई प्रोत्साहन गर्ने लक्ष्यसहित आयोजना गरिएको महोत्सवमा महिला निर्देशकले निर्देशनमा निर्मित विविध शैलीका छोटा चलचित्रहरु प्रदर्शन गरिएको थियो ।
नेपाल सङ्गीत तथा नाट्य प्रज्ञा–प्रतिष्ठानकी कुलपति निशा शर्माले महिलाले अवसर पाउँदा अन्तरराष्ट्रिय स्तरका उत्कृष्ट कृति निर्माण गर्नसक्ने क्षमताको आज प्रस्तुत गरिएका चलचित्रले पुष्टि गरेको बताउनुभयो । उहाँले भन्नुभयो, “नेपाली महिला कुनै पनि हिसाबले कमजोर छैनन्, अवसर र स्रोत पाउने हो भने उनीहरूले पनि उत्कृष्ट निर्देशन, कथावाचन र भव्य सिनेम्याटिक कृति निर्माण गर्न सक्नेछन् भन्ने आज प्रस्तुत गरिएका चलचित्रले प्रमाणित गरेका छन् ।”
त्यस अवसरमा समलिङ्गी महिलाका आत्मकथात्मक कथावस्तु समेटिएका छोटा फिल्मदेखि लिएर विश्वको सर्वोच्च शिखर सगरमाथा आरोहणका कठिन यात्रा र अनुसन्धानमूलक महिला पत्रकारिता विषयवस्तुमा आधारित वृत्तचित्र प्रदर्शन गरिएका थिए ।
सञ्चारकर्मी कल्पना महर्जनले सन् २०१८ मा नेपालबाट र २०१९ मा चीनबाट सगरमाथा आरोहण गर्दा भोगेका शारीरिक–मानसिक चुनौती र साहसिक अनुभवलाई समेटिएको वृत्तचित्रलाई रुचिका साथ हेरिएको थियो ।
आयोजक आइवार्ट नेपालका प्रतिनिधि इच्छा गुरुङका अनुसार महिला आवाजलाई फिल्म माध्यममार्फत बलियो ढङ्गले स्थापित गर्ने उद्देश्य महोत्सवको आयोजना गरिएको हो । उहाँका अनुसार भविष्यमा महोत्सवलाई अझ अन्तरराष्ट्रियस्तरमा विस्तार गर्दै विभिन्न सांस्कृतिक तथा सामाजिक विषयमा काम गरिरहेका महिला स्रष्टालाई विशेष सम्मान र अवसर उपलब्ध गराउने योजना रहेको छ ।
कार्यक्रममा विद्यार्थी, कलाकार, समाजसेवी, सञ्चारकर्मी तथा सर्वसाधारणको उल्लेख्य उपस्थिति थियो । उक्त महोत्सवमा उत्कृष्ट चलचित्र, उत्कृष्ट निर्देशन, सिर्जनात्मक विषयवस्तु र प्रभावशाली वृत्तचित्रका विभिन्न विधामा पुरस्कारसमेत वितरण गरिएको थियो ।
सिटीपोष्ट
प्रतिक्रिया दिनुहोस्