एनपिएलमा ४५८ जना खेलाडीले नाम दर्ता गराए

काठमाडौं,१४ साउन । नेपाल प्रिमियर लिग (एनपिएल) को दोस्रो संस्करणका लागि ४५८ खेलाडीले नाम दर्ता गराएका छन् । नेपाल क्रिकेट संघले असार २८ देखि साउन ६ गते सम्म खेलाडीलाई नाम दर्ताका लागि आह्वान गरेको थियो । जसमा ४ सय ५८ खेलाडी सहभागी भएका हुन् ।

अब एनपिएलका सबै फ्रेन्चाइज टोलीलाई यी नामहरु पठाएको र त्यहाँबाट नामहरु आएपछि खेलाडी सर्ट लिस्ट हुनेछन । सर्ट लिस्टबाट छानिने खेलाडीहरुको २४ साउनमा मिनी अक्सन गरिने नेपाल क्रिकेट संघ क्यानले जनाएको छ । दोस्रो संस्करणको लागि खेलाडी दर्ता प्रक्रियामा आएका खेलाडीहरुको दर्ता भएसँगै एनपिएलमा सहभागी ८ फ्रेञ्चाइज टोलीहरुलाई नाम उपलब्ध गराइएको छ ।

नेपाल क्रिकेट संघको प्राविधिक समितिले तयार गरेको मापदण्ड र फ्रेञ्चाइज टोलीहरुले इच्छ्याएका खेलाडीहरुको सूचीबाट अक्सनमा सहभागी हुने खेलाडीहरुको अन्तिम नामावली प्रकाशन गरिने क्यानले जनाएको छ ।
यसैगरी, सुदूरपश्चिम रोयल्सले नेपाल प्रिमियर लिग (एनपिएल) को दोस्रो संस्करणका लागि मार्भल टेक्नोप्लास्ट प्रालिसँग एक्सिलेन्स पार्टनरको रुपमा सम्झौता गरेको छ । मार्भलका उपाध्यक्ष पवनकुमार सान्चेती र सुदूरपश्चिमका प्रमुख कार्यकारी अधिकृत प्रकाश खड्काले सोमवार सम्झौतामा हस्ताक्षर गरेको विज्ञप्तीमा उल्लेख छ । ‘हामी सुदूरपश्चिमसँग सहकार्य गर्न पाउँदा उत्साहित छौँ ।

क्रिकेटले नेपालभर लाखौँ मानिसलाई जोड्ने काम गर्छ । हामीलाई नयाँ प्रतिभालाई साथ दिन र नेपालको खेलप्रेमी समुदायसँग अझ गहिरो सम्बन्ध स्थापित गर्न पाउनु गौरवको विषय हो,’ मार्भलका उपाध्यक्ष पवनकुमार भने,’ हामी यस सिजन उत्साहपूर्ण खेल प्रदर्शनको प्रतीक्षा गर्दैछौँ, साथै सुदूरपश्चिमलाई मैदानभित्र र बाहिर सफलताको शुभकामना व्यक्त गर्दछौँ ।’ विज्ञप्तीमा भनिएको छ ।

विज्ञप्तीमा मार्फत भनिएको छ ‘पवन सरले विगतदेखि नै क्रिकेटलाई निरन्तर साथ दिँदै आउनुभएको छ । मार्भल जस्तो प्रतिष्ठित ब्रान्डसँग सहकार्य गर्न पाउनु हाम्रो लागि सम्मानको विषय हो । उहाँको यो सहभागिताले एनपिएललाई अझ उचाइमा पु¥याउनेछ, र थप व्यवसायिक संस्थाहरूलाई खेल क्षेत्रमा लगानी गर्न प्रेरणा दिनेछ,’ सुदूरपश्चिमका सिइओ खड्काले भने, ‘नेपालको नम्बर एक पाइप कम्पनी मार्भल र ठूलो समर्थक समुदाय भएको हाम्रो फ्रेन्चाइजबीचको यो सहकार्य निकै उपयुक्त भएको छ ।’