सिटीपोष्ट
काठमाडौं २५ जेठ । कर्णाली प्रदेश स्तरीय प्रथम मेयर कप फुटबल प्रतियोगिताको उपाधि आयोजक वीरेन्द्रनगर नगरपालिकाले जितेको छ । सुर्खेतस्थित कर्णाली प्रदेश रंगशालामा सम्पन्न फाइनल खेलमा जुम्लालाई १–० गोल अन्तरले पराजित गर्दै वीरेन्द्रनगरले पहिलो संस्करणको उपाधि आफ्नो नाममा लेखाएको हो ।
प्रतिस्पर्धात्मक बनेको फाइनल खेलको सुरुआतमै वीरेन्द्रनगरले अग्रता बनाएको थियो । खेलको पाँचौं मिनेटमा विक्रम ओलीले गरेको गोल नै अन्ततः निर्णायक सावित भयो । विपक्षी रक्षापंक्तिको कमजोरीको फाइदा उठाउँदै उनले गरेको प्रहार गोलमा परिणत भएपछि वीरेन्द्रनगरले सुरुवाती अग्रता लिएको थियो । त्यसपछि दुवै टोलीले गोलका अवसर सिर्जना गरे पनि थप गोल हुन सकेन ।
खेलभरि जुम्लाले बराबरी गोल फर्काउने प्रयास गरेको थियो । मध्यपंक्ति र अग्रपंक्तिबाट निरन्तर दबाब सिर्जना गरे पनि वीरेन्द्रनगरको रक्षापंक्ति र गोलरक्षकले उत्कृष्ट प्रदर्शन गर्दै टोलीको अग्रता जोगाएका थिए । अन्तिम समयसम्म रोमाञ्चक बनेको खेलमा वीरेन्द्रनगरले एक गोलको अग्रता कायम राख्दै उपाधि उचाल्न सफल भयो ।
निर्णायक गोलकर्ता विक्रम ओली फाइनल खेलको उत्कृष्ट खेलाडी घोषित भए । उनको गोलकै मद्दतमा टोलीले उपाधि जितेकाले उनी दर्शक र प्रशिक्षकको समेत रोजाइमा परेका थिए ।
प्रतियोगितामा उपाधि जित्न नसके पनि जुम्लाले उत्कृष्ट प्रदर्शन गर्दै उपविजेताको यात्रा तय गर्यो । टोलीका धर्मेन्द्र कुँवर प्रतियोगिताकै उत्कृष्ट खेलाडी घोषित भए । प्रतियोगिताभर निरन्तर प्रभावशाली प्रदर्शन गरेका उनले जुम्लालाई फाइनलसम्म पु¥याउन महत्वपूर्ण भूमिका खेलेका थिए ।
व्यक्तिगत विधातर्फ वीरेन्द्रनगरका सुबबहादुर शाही उत्कृष्ट गोलरक्षक घोषित भए । उनले प्रतियोगिताभर थुप्रै महत्वपूर्ण बचाउ गर्दै टोलीलाई उपाधिसम्म पु¥याउन योगदान दिएका थिए। त्यस्तै वीरेन्द्रनगरकै दिवस बिसी उत्कृष्ट डिफेन्डर घोषित भए । रक्षापंक्तिमा उनको संयमित र प्रभावकारी प्रदर्शनको उच्च मूल्याङ्कन गरिएको थियो ।
पञ्चपुरी नगरपालिकाका धनसिंह विक सात गोलसहित प्रतियोगिताको सर्वाधिक गोलकर्ता बने । उनले प्रतियोगिताभर उत्कृष्ट गोल गर्ने क्षमता प्रदर्शन गर्दै दर्शकको ध्यान आकर्षित गरेका थिए । त्यस्तै वीरेन्द्रनगरका प्रशिक्षक गणेश खड्का उत्कृष्ट प्रशिक्षक घोषित भए । उनको नेतृत्वमा टोलीले प्रतियोगिताभर उत्कृष्ट रणनीति र सन्तुलित खेल प्रस्तुत गर्दै उपाधि जित्न सफल भएको हो ।
कर्णाली प्रदेशमा फुटबल खेलको विकास, प्रतिभा पहिचान र खेलकुद गतिविधिलाई थप सक्रिय बनाउने उद्देश्यले आयोजना गरिएको प्रथम मेयर कप प्रतियोगिताले स्थानीय खेलाडीलाई आफ्नो क्षमता प्रदर्शन गर्ने महत्वपूर्ण अवसर प्रदान गरेको आयोजकले जनाएको छ ।
प्रतियोगितामा प्रदेशका विभिन्न स्थानीय तहका टोलीहरूको सहभागिता रहेको थियो । खेलाडीहरूको उत्साहजनक सहभागिता, दर्शकको उल्लेख्य उपस्थिति र प्रतिस्पर्धात्मक खेलका कारण पहिलो संस्करण सफल भएको आयोजकको निष्कर्ष छ । प्रतियोगिताले कर्णाली प्रदेशमा फुटबलको विकास र खेल संस्कृतिको विस्तारमा सकारात्मक योगदान पु¥याउने विश्वास गरिएको छ ।
प्रतिक्रिया दिनुहोस्