बलिदानमा सौगात मल्लको फरक अवतारमा

काठमाडौँ, २६ जेठ । नेपाली चलचित्र ‘बलिदान’ मा अभिनेता सौगात मल्ल फरक लुकमा देखिने भएका छन् । हालै फिल्म ‘बलिदान’को को नयाँ लुक्स सार्वजनिक गरिएको छ। आगामी बडादसैँको फूलपातीको दिन प्रदर्शनमा आउने तयारीमा रहेको चलचित्रका पोस्टरहरूमा मल्लको लुक्स् शक्तिशाली र आर्कषक अवतार रहेका देख्न सकिन्छ।

प्रकाशित दुई पोस्टरमध्ये एकमा सौगात मल्ल लामो दाह्री र केश, कालो रंगको आँखासहित र गाढा लुगामा देखिएका छन्। हातमा बलिरहेको राँको, पृष्ठभूमिमा मानिसहरूको भीड र आगोको ज्वालाले चलचित्रको कथावस्तुमा द्वन्द्वात्मक र क्रान्तिकारी भाव झल्काउँछ। अर्को पोस्टरमा उनी हातमा हतियार बोकेर युद्धको माहोलमा प्रस्तुत छन्।

निर्देशक सन्तोष सेनका अनुसार, ुबलिदानुमा सौगात मल्ल एक अद्वितीय अवतारमा प्रस्तुत भएका छन्, जसका लागि उनले विशेष तयारी र मेहनत गरेका छन् ।

सौगात मल्ल, जो नेपाली सिनेमा क्षेत्रका सबैभन्दा सशक्त कलाकारहरूमध्ये एक मानिन्छन्, हरेक भूमिकामा नयाँ प्रयोग गर्न रुचाउँछन्। उनको यो नयाँ गेटअपले दर्शकको मन जित्ने विश्वास गरिएको छ।

यसअघि चलचित्रका प्रमुख कलाकार समीर भट्टको जन्मदिनको अवसर पारेर सार्वजनिक गरिएको प्रि–टिजर युट्युबमा नेपालसहित दर्जनौं देशमा ट्रेन्डिङमा आएको थियो। प्रि–टिजरमा समीर देशभक्तिपूर्ण संवाद र एक्सन दृश्यहरूमा देखिएका थिए, जसले चलचित्रप्रति दर्शकको उत्साह बढाएको थियो।

आसुसेन फिल्म्स प्रा.लि. को प्रस्तुति रहेको ‘बलिदान’ मा समीर भट्ट, सौगात मल्ल, साथै अर्पण थापा, ऋचा शर्मा, कविता राय, हेमन्त बुढाथोकी, प्रेम पुरी जस्ता चर्चित कलाकारहरूको अभिनय देख्न सकिने छ। चलचित्रका निर्माता पवन ब्राडफोर्ड बिस्ट र कार्यकारी निर्माता प्रेम पुरी हुन्।