नेपाल आइसिसी यू–१९ क्रिकेट विश्वकपमा छनोट हुन असफल 

काठमाडौँ, ७ वैशाख । वर्षा बाधक बनेपछि नेपाल आइसिसी यू–१९ क्रिकेट विश्वकपमा छनोट हुन असफल भएको छ । आइसिसी यू–१९ पुरुष क्रिकेट विश्वकप एसिया छनोटअन्तर्गत शनिबार अफगानिस्थानविरुद्धको खेल वर्षाका कारण हुन नहुनेपछि अफगानिस्तान विश्वकपका लागि छनोट भएको हो ।

यहाँस्थित तल्लो मुलपानी क्रिकेट मैदानमा शनिबार  बिहान साढे ९ बजे खेल हुने तालिका थियो । तर वर्षाका कारण खेल समयमै हुन सकेछ । पानीले भिजेको मैदान सुकाउने काम भए पनि समय अभावका कारण खेल हुन सकेन ।

शनिबारको खेल दुवै टोलीको लागि महत्वपूर्ण थियो । दुवै टोलीले प्रतियोगितामा समान तीन÷तीन खेल जितेका थिए । वर्षाले खेल प्रभावित भएपछि दुवै टोलीले समान एक÷एक अङ्क बाडेँ । दुवै टोलीसँग समान ७÷७ अङ्क भएपनि रनरेटको आधारमा अफगानिस्तान विश्वकपमा छनोट भएको हो ।

शनिबार बिहानसम्म भएको वर्षाका कारण मैदानको पूर्वपट्टिको भागमा पानी जमेको थियो ।  बिहान टसमा ढिलाए भएपछि ग्राउन्ड स्टाफले मैदानबाट पानी सुकाउन हरसम्भव प्रयास गरेका थिए ।

एक बजेपछि मैदानमा घाम लागे पनि दुई बजेसम्म पनि खेल हुन सम्भव भएन। दिउँसो दुई बजेको अन्तिम निरीक्षणपछि म्याच रेफ्रीले खेल रद्द भएको घोषणा गरे । खेल रद्द भएपछि दुवै टोलीले एक–एक अंक बाँडे ।

लिग चरणमा नेपाल र अफगानिस्तान दुवैले सुरूवाती तीन तीन खेलमा जित निकालेका थिए । दुवै टोलीले लिग चरणमा युएई, हङकङ र ओमानलाई हराएका थिए ।

रनरेटमा भने अफगानिस्तानअघि थियो । त्यही रनरेटको फाइदा उठाउँदै अफगानिस्तान सन् २०२६ मा जिम्बावे र नामिबियामा हुने विश्वकपमा छनोट हुँदा नेपाल भने स्तब्ध बन्यो । अफगानिस्तानको रनरेट ४.८१७० रहँदा नेपालको ३.५७६४ थियो ।

म्याच रेफ्रीले मैदानको तीन स्थानमा हिलो भएका कारण खेल हुन नसक्ने बताएपछि नेपाली खेलाडी निकै भावुक बनेका थिए । भावुक बनेका नेपाली खेलाडीलाई प्रशिक्षक शक्ति गौचनले सम्झाएर शान्त पारेका थिए ।

‘खेल रद्द भएपछि खेलाडीहरु निकै भावुक भएका थिए । मलाई निकै चित्त दुखेको थियो । तर जीवन यस्तै हो कहिले जित र कहिले हार हुन्छ । मैले खेलाडीहरुलाई जीन्दगीमा योभन्दा पनि दुःख भोगेको कुरा भनेर सम्झाए,’ शक्तिले खेल रद्द भएपछि नेपाली ड्रेसिङ रूमको माहोलबारे भने, ‘सायद हाम्रो कमजोरी थियो होला । हामीले कम मिहिनेत गरेका थियौं होला । हाम्रो आउने दिनहरुमा झन् राम्रो हुन्छ भनेर खेलाडीहरु भने । राम्रो हुनका लागि नै नराम्रो भएको छ र अझै धेरै लामो यात्रा छ भनेर सम्झाएँ ।’

छनोटअघि नेपालले अफगानिस्तानसँग तल्लो मुलपानी मैदानमै तीन खेलको सिरिज खेलेको थियो । सो सिरिजमा अफगानिस्तान पहिलो खेलमा हाबी भए दोस्रो खेलमा नेपालले पुनरागमन गरेको थियो ।

‘अफगानिस्तानसँगको खेल जे पनि हुन सक्थ्यो । हामीले अफगानिस्तानसँग यसअघि खेलेको सिरिजमा पहिलो खेलमा हारे पनि कमब्याक गरेका थियौं । अफगानिस्तानसँग दोस्रो खेलमा उत्कृष्ट पुनरागमन गरेका थियौ । तेस्रो खेलमा जित निकालेका थियौं ।

छनोटका खेलमा पानी परे पनि सकारात्मक थियौं । यो खेलमा जित्ने आत्मविश्वास थियो । तर मौसमले गर्दा हाम्रो सुनौलो अवसर खेर गयो,’ शक्तिले भने, ‘हामीले जसरी विश्वकप छनोटको यात्रा सुरु गरेका थियौ । तर मौसमले साथ दिएन । मौसमका कारण खेल रद्द भयो । हामीले स्विकार गर्नै प¥यो ।’

शक्तिले छनोटका लागि खेलाडीहरुले तीन महिनादेखि मिहिनेत गरे पनि विश्वकप खेल्ने सपना पूरा हुन नसकेकोमा दुःख व्यक्त गरे । साथै यू–१९ टोलीका खेलाडीले राष्ट्रिय टोलीबाट खेल्न सक्ने उनको भनाइ छ ।