संखुवासभा गोल्डकप ः उपाधि यात्रामा लोहोरुङ र सेकाहा

काठमाडौँ, १८ कात्तिक । संखुवासभाको खाँदबारी नगरपालिका–३ मानेभञ्ज्याङमा जारी संखुवासभा गोल्डकप फुटबल प्रतियोगितामा लोहोरुङ क्लब र सेकाहा क्लबले सेमिफाइनलमा स्थान सुरक्षित गरेका छन् । मंगलबार सम्पन्न क्वार्टरफाइनल चरणका खेलमा प्रतिस्पर्धात्मक जित निकाल्दै दुवै टोली अन्तिम चारमा प्रवेश गरेका हुन् ।

मंगलबार भएको पहिलो खेलमा सिरहाको सलहेश क्लब र संखुवासभाको लोहोरुङ क्लबबीच प्रतिस्पर्धा भएको थियो । निर्धारित समयमा दुवै टोलीले समान दुई गोल गरेपछि खेलको निर्णय ट्राइब्रेकरबाट गरिएको थियो । ट्राइब्रेकरमा सलहेशलाई ५–६ गोलले पराजित गर्दै लोहोरुङले सेमिफाइनल यात्रा तय गरेको हो ।

खेलको पहिलो हाफमा दुवै टोलीले गोल गर्न सकेनन् । गोलका अवसर सिर्जना गरे पनि विपक्षी टोलीको रक्षापंक्ति तोड्न नसक्दा पहिलो हाफ गोलरहित बराबरीमा सकिएको थियो । दोस्रो हाफमा भने दुवै टोलीले आक्रामक खेल प्रदर्शन गरे । निर्धारित समयको खेलमा दुवै पक्षबाट दुई–दुई गोल भएपछि प्रतिस्पर्धा थप रोमाञ्चक बनेको थियो ।

निर्धारित समयमा बराबरी भएपछि भएको ट्राइब्रेकरमा लोहोरुङका खेलाडीले दबाबबीच उत्कृष्ट प्रदर्शन गरे । निर्णायक प्रहारमा सफलता हात पार्दै घरेलु टोली लोहोरुङले प्रतियोगिताको सेमिफाइनलमा आफ्नो स्थान पक्का ग¥यो ।
मंगलबारकै दोस्रो खेलमा झापा–११ र संखुवासभाको सेकाहा क्लबबीच प्रतिस्पर्धा भएको थियो । उक्त खेलमा सेकाहाले झापा–११ लाई दुई गोलले पराजित गर्दै अन्तिम चारमा स्थान बनायो ।

पहिलो हाफमा दुवै टोलीले गोल गर्न नसकेपछि खेल बराबरी अवस्थामा अघि बढेको थियो । दोस्रो हाफमा भने सेकाहाले खेलमा आफ्नो पकड जमाउँदै लगातार दुई गोल ग¥यो । झापा–११ ले खेलमा फर्कने प्रयास गरे पनि गोल गर्न नसकेपछि सेकाहाले २–० को जित निकाल्न सफल भयो ।मंगलबारका दुवै खेलसँगै प्रतियोगिताको सेमिफाइनल समीकरण पनि पूरा हुने क्रममा पुगेको छ । प्रतियोगिताअन्तर्गत बुधबार पहिलो सेमिफाइनलमा लोहोरुङ क्लब र सेकाहा क्लब आमनेसामने हुनेछन् ।

क्वार्टरफाइनलमा आ–आफ्ना प्रतिद्वन्द्वीलाई पराजित गरेका दुवै टोली अब फाइनल प्रवेशका लागि प्रतिस्पर्धा गर्नेछन् ।बुधबारकै अर्को सेमिफाइनलमा सुनसरीको न्युस्टार क्लब र काठमाडौंको प्लानिङ ब्वाइजबीच भिडन्त हुनेछ । दुवै खेलका विजेताबीच प्रतियोगिताको उपाधिका लागि प्रतिस्पर्धा हुनेछ ।

सोमबारदेखि सुरु भएको प्रतियोगिता कात्तिक २० गते शुक्रबार समापन हुने आयोजकले जनाएको छ । प्रतियोगितामा संखुवासभाका चार र जिल्लाबाहिरका चार गरी आठ टोली सहभागी छन् । स्थानीय फुटबलको विकास, खेलाडीको प्रतिभा पहिचान तथा विभिन्न जिल्लाका टोलीबीच प्रतिस्पर्धात्मक सम्बन्ध विस्तार गर्ने उद्देश्यले प्रतियोगिता आयोजना गरिएको हो ।

प्रतियोगिताको विजेताले पाँच लाख रुपैयाँ नगद पुरस्कार प्राप्त गर्नेछ भने उपविजेताले तीन लाख रुपैयाँ पाउनेछ । आकर्षक पुरस्कार राशिसहित आयोजना गरिएको प्रतियोगिताले जिल्लाको खेलकुद गतिविधि बढाउनुका साथै स्थानीय फुटबलप्रेमीलाई समेत उत्साहित बनाएको छ ।

अब प्रतियोगितामा चार टोलीबीच फाइनल प्रवेशका लागि प्रतिस्पर्धा हुनेछ । लोहोरुङ र सेकाहाबीचको सेमिफाइनलले पहिलो फाइनलिस्टको टुंगो लगाउनेछ भने न्युस्टार र प्लानिङ ब्वाइजबीचको खेलबाट अर्को फाइनलिस्ट छनोट हुनेछ । त्यसपछि कात्तिक २० गते हुने फाइनल खेलले यस संस्करणको संखुवासभा गोल्डकपको विजेता निर्धारण गर्नेछ ।