सिटीपोष्ट
काठमाडौँ, १९ भदौ । एनएमबि बैंक लिमिटेडले पुराना अर्थात् सेकेन्ड–ह्यान्ड विद्युतीय सवारी साधन खरिद गर्न चाहने ग्राहकलाई लक्षित गर्दै ‘प्रि–ओन्ड इभी’ कर्जा सुविधा सुरु गरेको छ । विद्युतीय सवारी साधनको प्रयोग बढ्दै गएको अवस्थामा नयाँभन्दा तुलनात्मक रूपमा कम मूल्यमा उपलब्ध हुने पुराना विद्युतीय गाडी खरिदलाई वित्तीय पहुँचसँग जोड्ने उद्देश्यले बैंकले यस्तो सुविधा ल्याएको हो ।
बैंकका अनुसार उक्त कर्जा व्यक्तिगत तथा व्यावसायिक प्रयोजनका लागि प्रयोग गर्न सकिनेछ । यसबाट आफ्नै प्रयोगका लागि विद्युतीय गाडी खरिद गर्न चाहने व्यक्ति तथा व्यावसायिक प्रयोजनका लागि विद्युतीय सवारी साधन प्रयोग गर्ने संघ–संस्थाले समेत वित्तीय सुविधा प्राप्त गर्न सक्नेछन् ।
नेपालमा पछिल्लो समय विद्युतीय चारपाङ्ग्रे सवारी साधनको प्रयोग बढिरहेको छ । नयाँ विद्युतीय गाडीको मूल्य कतिपय ग्राहकका लागि तुलनात्मक रूपमा महँगो पर्ने भएकाले पुराना विद्युतीय गाडीको बजार पनि विस्तार हुँदै गएको छ । यही बजारलाई लक्षित गर्दै एनएमबि बैंकले नयाँ कर्जा सुविधा ल्याएको हो । बैंकको यो कदमले विद्युतीय सवारी साधनमा लगानी गर्न चाहने तर नयाँ गाडी खरिद गर्न ठूलो रकम खर्च गर्न कठिन हुने ग्राहकलाई वैकल्पिक वित्तीय पहुँच उपलब्ध गराउने अपेक्षा गरिएको छ ।
एनएमबि बैंकले यस योजनालाई दिगो तथा वातावरणमैत्री बैंकिङको अवधारणासँग जोडेको छ । बैंकले विद्युतीय सवारी साधनलाई प्रवद्र्धन गर्ने वित्तीय सेवामार्फत वातावरणमैत्री यातायात प्रणालीको विकासमा योगदान पु¥याउने लक्ष्य लिएको जनाएको छ । बैंकले यसअघि पनि विद्युतीय सवारी साधन खरिदका लागि छुट्टै कर्जा सुविधा सञ्चालन गर्दै आएको छ ।
बैंकको विद्युतीय सवारी कर्जा चारपाङ्ग्रे विद्युतीय सवारी साधन खरिद गर्ने ग्राहकलाई लक्षित खुद्रा कर्जाअन्तर्गत रहेको छ । बैंकको उपलब्ध विवरणअनुसार व्यक्तिगत तथा व्यावसायिक ग्राहकका लागि विद्युतीय सवारी कर्जामा छुट्टाछुट्टै ब्याजदर संरचना रहेको छ । बैंकले निश्चित अवधिका लागि निश्चित ब्याजदरमा समेत विद्युतीय सवारी कर्जा उपलब्ध गराउँदै आएको छ ।
पुरानो विद्युतीय सवारी साधनका लागि कर्जा लिने क्रममा गाडीको मूल्यांकनलाई समेत प्राथमिकता दिइएको छ । बैंकको आधिकारिक कर्जा विवरणअनुसार प्रयोग भइसकेको सवारी साधनका लागि बैंकबाट अधिकृत मूल्यांकनकर्तामार्फत मूल्यांकन गराउनुपर्ने व्यवस्था रहेको छ । यसले पुरानो गाडीको वास्तविक मूल्य निर्धारण तथा कर्जा प्रक्रियालाई व्यवस्थित बनाउन सहयोग गर्ने देखिन्छ ।
एनएमबि बैंकका अनुसार इच्छुक ग्राहकले देशभर रहेका बैंकका शाखा तथा डिजिटल माध्यमबाट कर्जाका लागि आवेदन दिन सक्नेछन् । बैंकले कर्जा प्रक्रियालाई सहज र छिटो बनाउने उद्देश्य राखेको जनाएको छ ।
यस योजनाले पुराना विद्युतीय सवारी साधनको कारोबारलाई औपचारिक वित्तीय प्रणालीसँग जोड्नुका साथै नेपालमा विद्युतीय सवारी साधनको पहुँच विस्तार गर्न सहयोग पुग्ने अपेक्षा गरिएको छ । नयाँ गाडीको तुलनामा कम लगानीमा विद्युतीय सवारी साधन प्रयोग गर्न चाहने ग्राहकका लागि बैंकको ‘प्रि–ओन्ड इभी’ कर्जा थप एउटा वित्तीय विकल्पका रूपमा आएको छ ।
एनएमबि बैंकले हाल देशभर शाखा, एटिएम तथा अन्य सेवा केन्द्रमार्फत बैंकिङ सेवा दिँदै आएको छ । बैंकले डिजिटल बैंकिङ तथा विभिन्न कर्जा सुविधामार्फत ग्राहकको आवश्यकता अनुसार वित्तीय सेवा विस्तार गर्दै आएको जनाएको छ ।
प्रतिक्रिया दिनुहोस्