सिटीपोष्ट
काठमाडौं, २६ साउन । नेपाल प्रिमियर लिग (एनपिएल) को आगामी सिजनमा उपाधि जित्ने लक्ष्यसहित तयारी गरिरहेको सुदूरपश्चिम रोयल्सले आफ्नो विदेशी खेलाडीका रूपमा इंग्ल्यान्डका अलराउन्डर सेफ अली जैबलाई पुनः टोलीमा भित्र्याएको छ । पहिलो संस्करणमा उत्कृष्ट प्रदर्शन गर्दै प्रतियोगिताकै सर्वोत्कृष्ट खेलाडी बनेका जैबको पुनरागमनलाई टोलीले महत्वपूर्ण बलका रूपमा लिएको छ ।
जैब एनपिएलको पहिलो संस्करणमा पनि सुदूरपश्चिमकै टोलीबाट खेलेका थिए । त्यसबेला उनले ब्याटिङ र बलिङ दुवैबाट प्रभावशाली प्रदर्शन गर्दै टोलीको सफलतामा महत्वपूर्ण योगदान दिएका थिए । नौ खेलमा उनले दुई अर्धशतकसहित २७५ रन बनाएका थिए भने १२ विकेटसमेत लिएका थिए । यही प्रदर्शनका कारण उनी प्रतियोगिताकै उत्कृष्ट खेलाडी चुनिएका थिए ।
पहिलो संस्करणको अनुभव र नेपाली परिस्थितिमा गरेको प्रदर्शनलाई आधार बनाएर सुदूरपश्चिमले उनलाई पुनः अनुबन्ध गरेको हो । टोलीका लागि विदेशी खेलाडीको छनोटमा जैबको परिचित वातावरणमा खेल्न सक्ने क्षमता पनि महत्वपूर्ण बनेको देखिन्छ ।
राष्ट्रिय टोलीबाट इंग्ल्यान्डको प्रतिनिधित्व गर्ने अवसर नपाए पनि जैब घरेलु तथा फ्रेन्चाइज टी–२० क्रिकेटमा निरन्तर सक्रिय छन् । बाँयाहाते ब्याटर जैबले टी–२० क्रिकेटमा ११२ खेल खेल्दै १ हजार ७९२ भन्दा बढी रन बनाइसकेका छन् । उनको स्ट्राइक रेट १४० भन्दा माथि रहेको छ, जसले आक्रामक ब्याटिङ उनको प्रमुख विशेषता रहेको देखाउँछ ।
इंग्ल्यान्डको चर्चित भाइटालिटी ब्लास्टमा समेत उनले लामो समयदेखि प्रभाव छाड्दै आएका छन् । उक्त प्रतियोगितामा मात्रै जैबले १ हजार ६ सयभन्दा बढी रन बनाएका छन् । ब्याटिङसँगै स्लो लेफ्ट–आर्म बलिङ गर्न सक्ने भएकाले उनी टोलीका लागि उपयोगी अलराउन्डरका रूपमा हेरिएका छन् । टी–२० क्रिकेटमा उनले २३ विकेटसमेत लिइसकेका छन् ।
हालै भाइटालिटी ब्लास्ट तथा ‘द हन्ड्रेड’ जस्ता प्रतियोगितामा सहभागिता जनाएका जैब एनपिएलमा फर्कन उत्साहित देखिएका छन् । सुदूरपश्चिमले जनाएअनुसार उनले नेपाललाई आफ्नो घरजस्तै महसुस गर्ने र पुनः यहाँ आएर खेल्न निकै उत्साहित रहेको बताएका छन् ।
सुदूरपश्चिम रोयल्सका प्रमुख कार्यकारी अधिकृत प्रकाश खड्काले जैबको पुनरागमनले टोलीलाई थप बलियो बनाउने विश्वास व्यक्त गर्नुभएको छ । नेपाली परिस्थितिमा आफूलाई ‘म्याच विनर’का रूपमा प्रमाणित गरिसकेका खेलाडी भएकाले आगामी संस्करणमा पनि उनको प्रभावशाली प्रदर्शनको अपेक्षा गरिएको खड्काको भनाइ छ ।
सुदूरपश्चिमले यसपटक टोली निर्माणमा निरन्तरता र नयाँपन दुवैलाई प्राथमिकता दिएको छ । टोलीले कप्तान दीपेन्द्रसिंह ऐरीसहित विनोद भण्डारी, आरिफ शेख, इशान पाण्डे, अभिनाश बोहरा, हेमन्त धामी र हिक्मत महरालाई रिटेन गरेको छ । यसले अघिल्लो संरचनाका महत्वपूर्ण खेलाडीलाई निरन्तरता दिएको देखिन्छ ।
अक्सनबाट भने दीपक बोहरा, मिलन बोहरा, टेक रावत, अनिल खरेल, सचिन भट्ट र आयुव चन्दलाई टोलीमा समावेश गरिएको छ । अनुभवी खेलाडी, घरेलु प्रतिभा र विदेशी अलराउन्डरको संयोजनबाट सुदूरपश्चिमले आगामी सिजनमा बलियो टोली बनाउने प्रयास गरेको छ ।
पहिलो संस्करणमा जैबको प्रदर्शनले टोलीलाई उत्साहित बनाएको थियो । अब उनको पुनरागमनसँगै सुदूरपश्चिमले विगतको प्रदर्शनलाई अझ ठूलो उपलब्धिमा बदल्ने लक्ष्य राखेको छ । पहिलो एनपिएल उपाधि जित्ने योजनामा जैबको ब्याटिङ, बलिङ र नेपाली परिस्थितिसँगको परिचितता टोलीका लागि निर्णायक बन्न सक्ने अपेक्षा गरिएको छ ।
प्रतिक्रिया दिनुहोस्