सिटीपोष्ट
काठमाडौँ, १६ असार । अभिनेत्री तथा निर्मात्री नीता ढुंगाना (अधिकारी)ले फिल्म निर्देशन गर्ने भएकी छन् । उनले ‘सुख दुःख’बाट निर्देशनमा डेब्यु गर्न लागेकी हुन् ।
शनिबार नीताले फिल्मको घोषणा गर्दै सार्वजनिक गरेको थिम पोस्टरमा उनको नाम निर्देशकमा देख्न सकिन्छ । उनले फिल्मको प्रदर्शन मिति पनि तय गरेकी छन् ।
अर्को वर्षको दशैंमा फिल्म प्रदर्शन हुने पोस्टरमा उल्लेख छ । नीता फिल्म्सको ब्यानरमा बन्न लागेको यो फिल्ममा कलाकारको लाइनअप भने तयार भइसकेको छैन । यतिबेला स्क्रिप्ट लेखनको काम भइरहेको जनाइएको छ ।
सबै कुरा मिलेको हुन्थ्यो भने निर्देशनमा नीताको डेब्यु गत वर्ष प्रदर्शन भएको फिल्म ‘ह्रस्व दीर्घ’बाटै हुने थियो । यो फिल्म सुरुमा उनले नै निर्देशन गर्न लागेकी हुन् ।
तर, स्क्रिप्टमा काम हुँदै जाँदा कथाले ठूलो ‘क्यानभास’ मागेपछि उनले निर्देशनको आँट गर्न सकिनन् । र, निर्देशनको जिम्मा चन्द्र पन्तलाई दिएकी थिइन् । अब भने नीताले ‘सुख दुःख’बाट निर्देशक बन्ने सपना पूरा गर्दैछिन् ।
बाल कलाकारको रुपमा फिल्म ‘मितिनी’बाट अभिनय करिअर सुरु गरेकी उनले अहिलेसम्म ५० बढी फिल्ममा काम गरिसकेकी छन् ।
यसको मतलब अभिनयमा उनको लामो अनुभव छ । त्यही अनुभवको सहारामा उनले ‘सुख दुःख’को निर्देशन गर्न लागेकी हुन् । अभिनयमा वाहवाही बटुल्दै आएकी उनलाई अब फिल्म निर्देशनमा पनि आफूलाई अब्बल प्रमाणित गर्नुपर्ने ठूलो चुनौती छ ।
पारिवारिक र भावनात्मक कथा बोकेको यस फिल्मले चाडपर्वको अवसरमा दर्शकसँग गहिरो भावनात्मक सम्बन्ध बनाउने अपेक्षा गरिएको छ ।
८२ सालको दशैं नआउँदै ८३ सालको दशैका लागि फिल्म घोषणा हुनु आफैंमा फिल्म निर्माता तथा निर्देशकहरू दशैं जस्ता चाडपर्वलाई कत्तिको गम्भीरता र अवसरको रूपमा लिन्छन् भन्ने कुरा प्रष्ट देखिन्छ । खासगरी पारिवारिक दर्शकलाई लक्षित गर्दै नेपाली फिल्म निर्माताहरूले दशैंमा आफ्ना सबैभन्दा आशालाग्दा प्रोजेक्टहरू प्रदर्शन गर्ने रणनीति अपनाउने गरेका छन् ।
नेपालमा अभिनयको अनुभवलाई सर्टिफिकेट मानेर निर्देशनमा होमिएका कलाकारहरूको संख्या ठूलो छ । भुवन केसी, निखिल उप्रेती, विराज भट्ट, झरना थापा, दीपाश्री निरौला लगायतले फिल्म निर्देशन गरेर सफलता पनि पाइसकेका छन् ।
प्रतिक्रिया दिनुहोस्