सिटीपोष्ट
काठमाडौँ, ८ असोज । दशैंको फूलपातीलाई प्रदर्शन मिति तय गरेको चलचित्र ‘छ माया छपक्कै २’ले प्रचार अभियानलाई तीव्र बनाउँदै शीर्ष गीत सार्वजनिक गरेको छ । चलचित्रको नामकै शीर्षकमा तयार पारिएको ‘माया छपक्कै’ बोलको गीत सार्वजनिक भएसँगै फिल्मको कथावस्तु र पात्रबीचको सम्बन्धलाई लिएर दर्शकमाझ थप कौतुहल सिर्जना भएको छ ।
निर्माण पक्षले सार्वजनिक गरेको गीतको भिडियोमा चलचित्रका अधिकांश कलाकारलाई उत्सवमय वातावरणमा प्रस्तुत गरिएको छ । विशेषगरी दीपकराज गिरी, केकी अधिकारी र सनिशा भट्टराईलाई केन्द्रमा राखिएको भिडियोमा ‘बेबी सावर’को प्रसंगलाई रमाइलो शैलीमा देखाइएको छ । भिडियोको अन्त्यतिर देखाइने अर्को दृश्यले भने चलचित्रको कथाबारे थप प्रश्न जन्माउने संकेत गरेको छ ।
गीतमा करण परियार, अभि सुनार, विशाल निरौला र रश्मी विश्वकर्माको स्वर रहेको छ । अभि सुनारले शब्द तथा संगीत दिएका गीतलाई विशाल निरौलाले संगीत संयोजन गरेका छन् । सार्वजनिक गीतको भिडियोमा नृत्य, पारिवारिक जमघट र हास्यप्रधान दृश्यलाई समेट्दै चलचित्रको मनोरञ्जनात्मक पक्षलाई अगाडि ल्याइएको छ ।
यसअघि सार्वजनिक गरिएको चलचित्रको पहिलो झलकले पनि ‘छ माया छपक्कै २’को कथामा दीपकराज गिरीको पात्रसँग केकी अधिकारी र सनिशा भट्टराईका पात्रको सम्बन्ध महत्वपूर्ण हुन सक्ने संकेत गरेको थियो । पोस्टरमा दीपकलाई बीचमा र दुवै अभिनेत्रीलाई गर्भवती महिलाको रूपमा देखाइएको थियो । निर्माण पक्षले भने कथाको विस्तृत विवरण सार्वजनिक गरेको छैन ।
यसरी गीत र पोस्टरमार्फत निर्माण पक्षले कथाको केही अंश संकेत गरे पनि वास्तविक कथा भने पर्दामै खुल्ने देखिन्छ । सामाजिक–राजनीतिक विषयवस्तुलाई हास्य तथा व्यङ्ग्यसँग जोडेर प्रस्तुत गर्ने भनिएको चलचित्रमा यसपटक नयाँ पुस्ताको राजनीतिक सन्दर्भसमेत समेटिएको निर्माण पक्षले यसअघि बताएको थियो । अघिल्लो भागमा पुरानो पुस्ताको राजनीतिक पृष्ठभूमिलाई कथाको आधार बनाइएकोमा दोस्रो भागमा समयअनुसार नयाँ पुस्ताको राजनीति समेट्ने तयारी गरिएको थियो ।
सन् २०१९ मा प्रदर्शनमा आएको ‘छ माया छपक्कै’को दोस्रो शृङ्खलाका रूपमा निर्माण भएको चलचित्रलाई दीपेन्द्र लामाले निर्देशन गरेका हुन् । चलचित्रको कथा तथा पटकथा दीपकराज गिरीसँग सम्बन्धित रहेको निर्माणसम्बन्धी विवरणमा उल्लेख छ । रोहित अधिकारी निर्माता रहेको चलचित्र आमा सरस्वती मुभिज, रोहित अधिकारी फिल्मस् र आईएमईको प्रस्तुतिमा निर्माण भएको हो । निर्मल शर्मा र सुरज बम ठकुरी कार्यकारी निर्माता छन् ।
चलचित्रमा दीपकराज गिरी, केकी अधिकारी, सनिशा भट्टराईसँगै दीपाश्री निरौला, प्रकाश घिमिरे, रमा थपलिया, निर्मल शर्मा, मेक्सम गौडेल, नवीन लम्साल, विष्णु सापकोटा, रवीन्द्र झा, कर्मा शाक्य, रिहान गिरी, शारदा गिरीलगायत कलाकारको अभिनय रहेको छ ।
‘छ माया छपक्कै २’ असोज ३१ गते अर्थात् दशैंको फूलपातीदेखि देशभरका सिनेमा घरमा प्रदर्शनमा आउने तयारीमा छ । प्रदर्शन मिति नजिकिँदै गर्दा सार्वजनिक भइरहेका पोस्टर, गीत तथा अन्य प्रचार सामग्रीले चलचित्रप्रतिको चासो बढाउँदै लगेका छन् ।
प्रतिक्रिया दिनुहोस्