सिटीपोष्ट
काठमाडौं,१५ साउन । आइसिसी पुरुष क्रिकेट विश्वकप लिग–२ अन्तर्गत नेदरल्यान्ड्स भ्रमण नेपालका लागि निराशाजनक रह्यो । लगातार चौथो हार बेहोर्दै नेपाल आठौँ त्रिकोणात्मक शृङ्खला जितविहीन रूपमा टुंग्याउन बाध्य भयो । बुधबार युट्रेच्टमा भएको खेलमा घरेलु टोली नेदरल्यान्ड्सले नेपाललाई ५७ रनले पराजित गर्दै महत्वपूर्ण दुई अंक हात पार्यो ।
यस हारसँगै नेपालले शृङ्खलाका चारवटै खेल गुमाएको छ । यसअघि नेपाल नेदरल्यान्ड्ससँग एक खेलमा ६ विकेटले तथा नामिबियासँग क्रमशः ८ विकेट र ३ रनले पराजित भएको थियो । लगातारको हारले नेपालको विश्वकप छनोट यात्रामा दबाब थपिएको छ भने टोलीको ब्याटिङ प्रदर्शन पुनः चिन्ताको विषय बनेको छ ।
नेदरल्यान्ड्सले दिएको २२६ रनको लक्ष्य पछ्याएको नेपाल ४८ ओभरमै १६८ रनमा अलआउट भयो । सुरुआतदेखि नै नियमित अन्तरालमा विकेट गुमाएको नेपालले कुनै पनि समयमा लक्ष्य पछ्याउने लय समात्न सकेन । शीर्षक्रमका ब्याट्सम्यानले राम्रो सुरुआतलाई ठूलो इनिङ्समा बदल्न नसक्दा मध्यक्रममाथि दबाब बढेको थियो ।
नेपालका लागि विकेटकिपर ब्याट्सम्यान आसिफ शेखले सर्वाधिक ३८ रन बनाए । उनले केही आकर्षक स्ट्रोक खेले पनि ठूलो साझेदारी बनाउन सकेनन् । कप्तान रोहित पौडेलले २६ रन तथा करण केसीले २३ रनको योगदान दिए । दीपेन्द्र सिंह ऐरी, भीम सार्की, कुशल भुर्तेल र अन्य ब्याट्सम्यानले अपेक्षाअनुसार प्रदर्शन गर्न नसक्दा नेपालको इनिङ्स कमजोर बन्न पुग्यो ।
नेदरल्यान्ड्सका बलरहरूले अनुशासित बलिङ गर्दै नेपाललाई दबाबमा राखे । तीव्र गतिका बलर काइल क्लाइनले तीन विकेट लिएर नेपाली ब्याटिङलाई ठूलो धक्का दिए । लोगान भान बिक, रुलोफ भान डर मर्वे र ज्याक लायन–काचेटले समान दुई–दुई विकेट लिए । उनीहरूको सटिक लाइन–लेन्थ र विविधतापूर्ण बलिङका कारण नेपालले आवश्यक रनगति कायम राख्न सकेन ।
यसअघि टस हारेर पहिले ब्याटिङ गरेको नेदरल्यान्ड्सले निर्धारित ५० ओभरमा ९ विकेट गुमाएर २२५ रन बनाएको थियो । सुरुआती केही विकेट गुमाए पनि मध्यक्रमका ब्याट्सम्यान नोआ क्रोसले ७० रनको जिम्मेवार इनिङ्स खेल्दै टोलीलाई सम्मानजनक स्कोरतर्फ डोर्याए । कप्तान स्कट एडवड्र्सले ५७ रनको अर्धशतकीय योगदान दिए भने दुवैले महत्वपूर्ण साझेदारी गर्दै नेपालको बलिङ आक्रमणलाई चुनौती दिएका थिए ।
नेपालका लागि करण केसी उत्कृष्ट बलर सावित भए । उनले १० ओभरमा मात्र ३० रन खर्चेर चार विकेट लिए । नयाँ बल र डेथ ओभर दुवैमा प्रभावशाली प्रदर्शन गरेका करणले नेदरल्यान्ड्सलाई ठूलो स्कोर बनाउन भने दिएनन् । दीपेन्द्र सिंह ऐरीले दुई विकेट लिए भने हेमन्त धामी र ललित राजवंशीले समान एक–एक विकेट हात पारे ।
बलिङतर्फ प्रतिस्पर्धात्मक प्रदर्शन गरे पनि ब्याटिङमा कमजोरी दोहोरिँदा नेपालले सहज देखिएको लक्ष्यसमेत भेट्टाउन सकेन । पछिल्ला केही खेलमा शीर्षक्रम र मध्यक्रमबाट निरन्तरता नआउनु, साझेदारी बन्न नसक्नु तथा दबाबका बेला विकेट गुमाउनु नेपालको मुख्य समस्या देखिएको छ । क्रिकेट विश्लेषकहरूले लिग–२ जस्तो लामो प्रतियोगितामा सफल हुन ब्याटिङ संयोजन र मानसिक तयारीमा सुधार आवश्यक रहेको औँल्याएका छन् ।
यस जितसँगै नेदरल्यान्ड्सले ३१ खेलबाट ३८ अंक जोड्दै अंकतालिकाको दोस्रो स्थानमा उक्लिएको छ । ४३ अंकसहित अमेरिका शीर्ष स्थानमा रहँदा नेपाल भने ३२ खेलबाट २४ अंकका साथ छैटौँ स्थानमा झरेको छ ।
अब नेपालले आगामी लिग–२ शृङ्खलामा पुनरागमन गर्ने चुनौती सामना गर्नेछ । विश्वकप छनोटको सम्भावना बलियो बनाउन बाँकी खेलहरूमा जित निकाल्नुका साथै विशेषगरी ब्याटिङ विभागमा उल्लेखनीय सुधार गर्नु नेपाली टोलीका लागि अपरिहार्य देखिएको छ ।
प्रतिक्रिया दिनुहोस्