फिल्म ‘पार्वती’ बाट निर्देशनमा नीताको डेब्य

काठमाडौं, १५ चैत । अभिनेत्री नीता ढुंगाना ले निर्देशनमा डेब्यू गर्ने तयारीमा रहेको फिल्म पार्वती मा बाल गायक अशोक दर्जी मुख्य भूमिकामा देखिने भएका छन् । निर्माण कम्पनी नीता फिल्म्सले आइतबार थिम पोस्टर सार्वजनिक गर्दै फिल्मको मुख्य कलाकारबारे जानकारी दिएको हो ।
फिल्ममा नीता ढुंगाना स्वयंको पनि अभिनय रहनेछ । यसअघि उनी र अशोकले मन बिनाको धन मा सहकार्य गरिसकेका छन् । उक्त सहकार्यपछि पुनः एउटै प्रोजेक्टमा उनीहरूको जोडी देखिन लागेकाले दर्शकमाझ उत्सुकता बढेको छ ।
फिल्ममा मुख्य जोडीसँगै दीपाश्री निरौला, सिरु बिष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेल लगायत कलाकारहरूको पनि अभिनय रहने जनाइएको छ । अनुभवी तथा नयाँ कलाकारहरूको संयोजनले फिल्मलाई थप सशक्त बनाउने अपेक्षा गरिएको छ ।
फिल्मको छायांकन आगामी चैत २४ गतेबाट सुरु हुने तयारी गरिएको छ । निर्माण पक्षले फिल्मलाई रक्षा बन्धनको अवसर पारेर भदौ १२ गते प्रदर्शनमा ल्याउने योजना बनाएको छ । सोही मितिमा अर्को नेपाली फिल्म बेहुली पनि प्रदर्शनमा आउने भएकाले बक्स अफिसमा प्रतिस्पर्धा रोचक हुने अनुमान गरिएको छ ।
फिल्म ‘पार्वती’को कथा तथा पटकथा स्वयं निर्देशक नीता ढुंगानाले तयार पारेकी हुन् भने संवाद लेखन शिवम् अधिकारी ले गरेका छन् । फिल्मको छायांकन सुदीप बराल ले गर्नेछन् भने सम्पादन साहिल खानले सम्हाल्नेछन् । क्रियटिभ निर्देशकको रूपमा चर्चित डान्स समूह ‘कार्टुन क्रु’का सरोज अधिकारी रहनेछन् ।
यसका साथै, फिल्मको प्रोडक्सन डिजाइनर तथा कार्यकारी निर्माताको जिम्मेवारी शंकर पाण्डे ले लिएका छन् । निर्माण टिमले फिल्मलाई प्राविधिक र प्रस्तुति दुवै हिसाबले सशक्त बनाउने लक्ष्य राखेको जनाएको छ ।
निर्देशक ढुंगानाका अनुसार फिल्ममा ‘पार्वती’ पात्र एक्लै आफ्नै संसारमा रमाउने स्वभावकी युवतीको रूपमा प्रस्तुत हुनेछ । उनले फिल्मलाई हास्य, भावना र सामाजिक सन्देशको मिश्रण भएको कथामा आधारित रहेको बताएकी छन् । “यो फिल्मले साधारण पात्रको दृष्टिकोणबाट जीवनका विभिन्न रंग, सम्बन्धका मिठास र संघर्षका भावलाई प्रस्तुत गर्नेछ,” उनले भनिन् ।
फिल्ममा नीता ढुंगाना ‘अटिजम’ भएको युवतीको भूमिकामा देखिनेछिन् । यस्तो संवेदनशील विषयवस्तुलाई समेटिएको फिल्मले दर्शकलाई भावनात्मक रूपमा जोड्ने अपेक्षा गरिएको छ ।

नयाँ निर्देशकको रूपमा नीताको सुरुवात, अशोक दर्जीको मुख्य भूमिका र सामाजिक सन्देश बोकेको कथावस्तुले फिल्म ‘पार्वती’प्रति दर्शकको चासो बढाएको छ । रक्षा बन्धनको अवसरमा प्रदर्शनमा आउने यस फिल्मले नेपाली चलचित्र क्षेत्रमा फरक स्वाद प्रस्तुत गर्ने विश्वास निर्माण पक्षले लिएको छ ।