ललितपुर, १९ कात्तिक । नेपाली कांग्रेसको केन्द्रीय समिति बैठकमा महामन्त्री र सहमहामन्त्रीले महाधिवेशनकाबारेमा दुई फरक प्रस्ताव पेस गरेका छन । मंगलबार बसेको बैठकमा“महाधिवेशन कार्यतालिका सहमति निर्माण हुन सकेन, महाधिवेशनका विषयमा पार्टीमा दुई खालका मतलाई एउटै हुनेगरी साझा धारणा हुन सकेको छैन, पुस १६ गतेदेखि १७ गतेसम्म केन्द्रीय महाधिवेशन गर्ने महामन्त्री गगन थापाको प्रस्ताव आएको छ, वैशाख २७ गतेदेखि ३० गतेसम्म गरौँ भन्ने सहमहामन्त्री महेन्द्र यादवको अर्को प्रस्ताव आएको छ, एउटै बनाउने प्रयास जारी छ, पुस १६ मा हुने भयो भने तीव्र तयारी आवश्यक छ,” सहमहामन्त्री बद्री पाण्डेले जानकारी गराउनुभएको छ ।
बैठकमा महामन्त्री गगनकुमार थापाले गर्नुभएको प्रस्तावअनुसार मङ्सिर २७ गते वडा अधिवेशन, पुस ५ र ६ गते प्रतिनिधिसभा क्षेत्रीय अधिवेशन र पुस १६ देखि १९ गतेसम्म केन्द्रीय महाधिवेशन गर्नेगरी कार्यतालिका पेस भएको छ ।
यस्तै सहमहामन्त्री महेन्द्र यादवले पेस गरेको कार्यतालिकाअनुसार २०८२ चैत १ गते वडा अधिवेशन, चैत ५ गते पालिका अधिवेशन, चैत १२ गते प्रदेश क्षेत्रीय अधिवेशन, चैत २० गते सङ्घीय प्रतिनिधिसभा क्षेत्रीय अधिवेशन, चैत ३० गते जिल्ला अधिवेशन, २०८३ वैशाख १५ गते सात प्रदेश अधिवेशन र २०८३ वैशाख २७ देखि ३० गतेसम्म १५ औं केन्द्रीय महाधिवेशनको प्रस्ताव भएको पाण्डेले जानकारी दिनुभयो ।
सहमहामन्त्री पाण्डेले विशेष महाधिवेशन पक्षधरहरूको मागलाई सम्बोधन गर्न पनि पुसमा महाधिवेशन आवश्यक छ भन्ने धारणा राख्दै नियमित महाधिवेशनमा जोड दिइरहेको धारणा राख्नुभयो ।
अर्का सहमहामन्त्री किशोरसिंह राठौरले देशका सबै निकाय जलेको बेलामा नेपाली कांग्रेस एक ढिक्का भएर अगाडि बढ्छ भन्ने धारणा राख्नुभयो । उहाँले आफूलाई निर्वाचन पछाडि महाधिवेशन गर्ने कार्यतालिका नै पारित हुन्छ भन्ने विश्वास रहेको बताउनुभयो ।
केन्द्रीय सदस्य नैनसिंह महरले पार्टीले सबै विचारलाई सम्बोधन गर्दै देशको नेतृत्व गरेर सबै पार्टीलाई विश्वस्त हुनसक्ने वातावरण तयार पार्नुपर्ने बताउनुभयो । उहाँले विधानअनुसार विशेष महाधिवेशन पनि वैधानिक हो भन्दै विधानले व्यवस्था गरेअनुसार लोकतान्त्रिक पद्धति स्वीकार गर्दै पार्टी अगाडि बढ्छ भन्ने धारणा राख्नुभयो ।
यसैगरी, विभिन्न माग राखी नेपाली कांग्रेसको केन्द्रीय कार्यालयमा तीन दिनअघि लगाइएको ताला खुलेको छ । पार्टीका युवा नेताहरूले १५औँ महाधिवेशनको कार्यतालिका नतोकिएको भन्दै गत आइतबार लगाएको ताला कार्यवाहक सभापति पूर्णबहादुर खड्काले माग सम्बोधन गर्ने प्रतिबद्धता जनाएसँगै खुलेको हो ।
नेपाल विद्यार्थी सङ्घका पूर्वकोषाध्यक्ष शिव रिमालले कार्यवाहक सभापतिले आफूहरूका माग कार्यान्वयनका लागि तीन बुँदे प्रतिबद्धता जनाएसँगै ताला खोलिएको जानकारी दिनुभयो ।
कार्यवाहक सभापति र आन्दोलनरत पक्षबीच कांग्रेसको चालु केन्द्रीय समितिको बैठकले पार्टीको १५औँ महाधिवेशनको तालिका तोक्ने, विगत चार वर्षभित्र क्रियाशील सदस्यता नवीकरणको प्रगति विवरण सार्वजनिक गरी नेपाली कांग्रेसको वेबसाइटमा राख्ने सहमति भएको छ ।
यस्तै, पार्टीभित्र ४० वर्षमुनिका ४० प्रतिशत युवा सहभागिताको माग सुनिश्चितताका लागि केन्द्रीय समितिको विधानमा परिमार्जन आवश्यक भएकाले त्यसबारे छलफल गरी माग सम्बोधन गर्न लाग्नेबारे सहमति भएको छ ।
सिटीपोष्ट
प्रतिक्रिया दिनुहोस्