आर्सनल र लेन्सलाई सिजन सुरु हुनुअघि सुपर कपको उपाधि

काठमाडौं, ३ भदौ । नयाँ सिजन सुरु हुनुअघि युरोपेली फुटबलमा दुई महत्वपूर्ण सुपर कपको उपाधि टुंगिएको छ । इंग्ल्यान्डमा प्रिमियर लिग च्याम्पियन आर्सनलले म्यान्चेस्टर सिटीलाई ३–० ले पराजित गर्दै कम्युनिटी सिल्ड जित्दा फ्रान्समा लेन्सले पेरिस सेन्ट जर्मेन (पीएसजी) लाई १–० ले हराउँदै फ्रेन्च सुपर कप आफ्नो नाममा लेखाएको छ ।

लन्डनमा आइतबार राति भएको कम्युनिटी सिल्डमा आर्सनलले सुरुवातदेखि नै आक्रामक प्रदर्शन गरेको थियो । खेल सुरु भएको २४ सेकेन्डमै रिकार्डो कालाफियोरीले गोल गर्दै आर्सनललाई अग्रता दिलाएका थिए । प्रारम्भिक अग्रताले आर्सनलको आत्मविश्वास बढायो भने सिटी सुरुदेखि नै दबाबमा परेको थियो ।

पहिलो हाफमै आर्सनलले अग्रता दोब्बर बनायो । काइ हाभट्र्जले गोल गर्दै टोलीलाई २–० को अवस्थामा पु¥याए । दोस्रो हाफमा पनि आर्सनलले आफ्नो नियन्त्रण कायम राख्यो । कप्तान मार्टिन ओडेगार्डले तेस्रो गोल गर्दै आर्सनलको जित सुनिश्चित गरे ।

कम्युनिटी सिल्डको उपाधिसँगै आर्सनलले नयाँ सिजनका लागि सकारात्मक सुरुवात गरेको छ । प्रिमियर लिगको नयाँ सिजन अगस्ट २१ बाट सुरु हुँदैछ । त्यसअघि प्राप्त यो सफलताले आर्सनललाई उपाधि रक्षा अभियानमा मनोवैज्ञानिक फाइदा पुग्ने अपेक्षा गरिएको छ ।

कम्युनिटी सिल्ड इंग्ल्यान्डको फुटबल सिजन सुरु हुनुअघि प्रिमियर लिग विजेता र एफए कप विजेताबीच खेलिने प्रतिष्ठित खेल हो । आर्सनलले यसपटक म्यान्चेस्टर सिटीलाई पराजित गर्दै उपाधि जितेको हो ।
आर्सनलका कप्तान ओडेगार्डले उत्कृष्ट प्रदर्शन गरे पनि म्यान्चेस्टर सिटीका नर्वेली स्टार इर्लिङ हालान्डका लागि भने खेल निराशाजनक रह्यो । पहिलो हाफमै गोल गर्ने दुई महत्वपूर्ण अवसर पाए पनि हालान्डले त्यसलाई सदुपयोग गर्न सकेनन् । सिटीको आक्रमण अपेक्षाअनुसार प्रभावकारी बन्न नसक्दा टोली फराकिलो अन्तरले पराजित भयो ।

म्यान्चेस्टर सिटीका प्रशिक्षक पेप ग्वार्डिओलाले आफ्नो प्रशिक्षण करियरमा २० वटा ट्रफी जितिसकेका छन् । तर पछिल्ला वर्षमा सिटीको उपाधि यात्रामा अपेक्षाकृत कमी आएको छ । सन् २०२४ यता टोलीले ठूला उपाधि जित्न नसकेको अवस्थामा कम्युनिटी सिल्डमा आर्सनलसँगको हारले नयाँ सिजनअघि थप चुनौती देखाएको छ । गत सिजन पनि सिटी आर्सनलभन्दा सात अंकले पछि पर्दै प्रिमियर लिगमा उपविजेता बनेको थियो ।

यता, फ्रान्समा पनि सिजन सुरु हुनुअघि महत्वपूर्ण उपाधिको टुंगो लागेको छ । लेन्सले पीएसजीलाई १–० ले पराजित गर्दै पहिलोपटक फ्रेन्च सुपर कपको उपाधि जितेको हो ।

खेलको ३२औँ मिनेटमा फ्लोरियन थाउभिनले गरेको गोल नै निर्णायक बन्यो । गोल गरेको केही मिनेटमै लेन्स १० खेलाडीमा सीमित भएको थियो । टोलीका किलियन एन्टोनियोले रातो कार्ड पाएपछि लेन्सले लामो समय एक खेलाडी कम भएर खेल्नुपरेको थियो ।

तर खेलाडी संख्या कम भए पनि लेन्सले आफ्नो अग्रता जोगाउन सफल भयो । खेलको ८७औँ मिनेटमा पीएसजीका नुनो मेन्डिसले पनि रातो कार्ड पाएपछि दुवै टोली १०–१० खेलाडीमा सीमित भए ।
यसअघि एस्टन भिल्लालाई हराउँदै यूईएफए सुपर कप जितेको पीएसजी लगातार दोस्रो उपाधिको खोजीमा थियो । तर लेन्ससँगको हारपछि उसको त्यो लक्ष्य पूरा हुन सकेन । फ्रेन्च सुपर कप फ्रान्सेली लिग र फ्रेन्च कपका विजेताबीच सिजन सुरु हुनुअघि खेलिने प्रतियोगिता हो ।

यसरी इंग्ल्यान्डमा आर्सनल र फ्रान्समा लेन्सले सुपर कप जित्दै नयाँ सिजनअघि आफ्नो दाबेदारी प्रस्तुत गरेका छन् । दुवै टोलीका लागि यी उपाधिले आगामी घरेलु प्रतियोगितामा आत्मविश्वास बढाउने अवसर प्रदान गरेको छ ।