सिटीपोष्ट
काठमाडौं, ३ भदौ । सर्वसाधारणको स्वास्थ्य सेवामा पहुँच विस्तार गर्ने उद्देश्यले मञ्जुश्री फाइनान्स लिमिटेड र अल्फा केयर डायग्नोस्टिक सेन्टरबीच समझदारीपत्र (एमओयू) मा हस्ताक्षर भएको छ । वित्तीय सेवा र स्वास्थ्य क्षेत्रका दुई संस्थाबीच भएको यस सहकार्यले गुणस्तरीय स्वास्थ्य सेवा सर्वसाधारणका लागि थप सहज र पहुँचयोग्य बनाउने अपेक्षा गरिएको छ ।
सम्झौताअनुसार दुवै संस्थाले स्वास्थ्य सेवासँग सम्बन्धित प्रभावकारी तथा आवश्यकतामैत्री समाधान विकास गर्न सहकार्य गर्ने भएका छन् । स्वास्थ्य परीक्षण तथा उपचारसम्बन्धी सेवामा सर्वसाधारणको पहुँच बढाउनुका साथै सेवाग्राहीलाई सहज र गुणस्तरीय सेवा उपलब्ध गराउने उद्देश्यले सहकार्य अघि बढाइएको जनाइएको छ ।
मञ्जुश्री फाइनान्स र अल्फा केयरबीचको सहकार्यलाई स्वास्थ्य तथा वित्तीय क्षेत्रबीचको समन्वयको नयाँ सुरुवातका रूपमा लिइएको छ । सम्झौताले स्वास्थ्यसम्बन्धी सेवा तथा योजनालाई व्यवस्थित रूपमा अघि बढाउन दुवै संस्थालाई सहयोग पुग्ने विश्वास गरिएको छ ।
पछिल्लो समय स्वास्थ्य सेवाको लागत, सहज पहुँच तथा गुणस्तरीय परीक्षणको आवश्यकता बढ्दै गइरहेको अवस्थामा निजी क्षेत्रका संस्थाबीच हुने यस्ता सहकार्यले सेवाग्राहीलाई प्रत्यक्ष लाभ पु¥याउन सक्ने देखिन्छ । वित्तीय संस्थाको पहुँच र स्वास्थ्य संस्थाको विशेषज्ञतालाई जोडेर नयाँ कार्यक्रम तथा सेवाहरू विकास गर्न सकिने सम्भावना पनि रहेको छ ।
सम्झौतापछि दुवै संस्थाले आगामी दिनमा संयुक्त पहलमार्फत स्वास्थ्य क्षेत्रमा सकारात्मक प्रभाव पार्ने विभिन्न कार्यक्रम तथा समाधान अघि बढाउने प्रतिबद्धता व्यक्त गरेका छन् । सहकार्यलाई केवल औपचारिक सम्झौतामा सीमित नराखी सेवाग्राहीको आवश्यकतालाई केन्द्रमा राखेर प्रभावकारी कार्यक्रम सञ्चालन गर्ने लक्ष्य दुवै संस्थाको रहेको जनाइएको छ ।
यस सहकार्यले स्वास्थ्य सेवाको पहुँच विस्तारसँगै सर्वसाधारणमा स्वास्थ्यसम्बन्धी सचेतना बढाउन तथा आवश्यक स्वास्थ्य परीक्षणलाई थप सहज बनाउन समेत योगदान पु¥याउने अपेक्षा गरिएको छ । दुवै संस्थाले स्वस्थ नागरिक र समृद्ध समाज निर्माणमा निजी क्षेत्रको भूमिका महत्वपूर्ण हुने उल्लेख गर्दै सहकार्यलाई निरन्तरता दिने प्रतिबद्धता जनाएका छन् ।
“स्वस्थ र उज्ज्वल भविष्य निर्माणका लागि सँगसँगै अघि बढ्ने” प्रतिबद्धतासहित भएको यो समझदारीले आगामी दिनमा स्वास्थ्य क्षेत्रमा थप सहकार्य र नयाँ सेवाको सम्भावना समेत खोल्ने अपेक्षा गरिएको छ ।
प्रतिक्रिया दिनुहोस्