सिटीपोष्ट
काठमाडौं, १६ असार । प्राइम बैंक लिमिटेडले ऊर्जा क्षेत्रमा आफ्नो लगानी विस्तार गर्दै २ मेगावाट क्षमताको अरुण खोला–२ जलविद्युत आयोजनामा एकल ऋण लगानी गर्ने भएको छ । यसका लागि बैंक र आयोजनाको प्रवद्र्धक कम्पनी हिमालयन इञ्जिनियरिङ्ग एण्ड इनर्जी प्रालिबीच कर्जा सम्झौता सम्पन्न भएको छ ।
काठमाडौंमा आयोजित एक कार्यक्रममा बैंकका तर्फबाट डेपुटी जनरल म्यानेजर नारायण प्रसाद श्रेष्ठ र कम्पनीका तर्फबाट अध्यक्ष ओम प्रसाद भट्टराईले कर्जा सम्झौतापत्रमा हस्ताक्षर गर्नुभएको हो । सम्झौतासँगै आयोजनाको वित्तीय व्यवस्थापन सुनिश्चित भएको छ भने निर्माण प्रक्रिया थप तीव्र गतिमा अघि बढ्ने अपेक्षा गरिएको छ ।
सम्झौताअनुसार आयोजनाको कुल अनुमानित लागत ४८ करोड ६४ लाख रुपैयाँ रहेको छ । कुल लागतमध्ये करिब ६१.६६ प्रतिशत अर्थात् ३० करोड रुपैयाँ प्राइम बैंकले ऋणका रूपमा उपलब्ध गराउनेछ । बाँकी ३८.३४ प्रतिशत रकम प्रवद्र्धक कम्पनीले आफ्नै स्वपुँजी (इक्विटी) मार्फत जुटाउनेछ । बैंकको एकल ऋण लगानीमा निर्माण हुन लागेको यो आयोजना नेपालको निजी जलविद्युत क्षेत्रमा थप एक महत्वपूर्ण परियोजनाका रूपमा हेरिएको छ ।
अरुण खोला–२ जलविद्युत आयोजना निर्माण सम्पन्न भएपछि वार्षिक करिब १३.१८ गिगावाट आवर विद्युत उत्पादन हुने अनुमान गरिएको छ । आयोजनाबाट सुख्खा याममा ४.८६४ गिगावाट आवर र वर्षायाममा ८.३१९ गिगावाट आवर विद्युत उत्पादन हुने कम्पनीले जनाएको छ । उत्पादन हुने विद्युत राष्ट्रिय प्रसारण प्रणालीमा जोडिनेछ, जसले देशको बढ्दो ऊर्जा माग व्यवस्थापनमा योगदान पु¥याउने अपेक्षा गरिएको छ ।
नेपालमा पछिल्ला वर्षहरूमा जलविद्युत क्षेत्रमा निजी क्षेत्रको लगानी निरन्तर बढिरहेको छ । बैंक तथा वित्तीय संस्थाहरूले पनि ऊर्जा क्षेत्रलाई प्राथमिकतामा राख्दै जलविद्युत आयोजनामा लगानी विस्तार गरिरहेका छन् । स्वदेशी उत्पादन बढाएर ऊर्जा आत्मनिर्भरता हासिल गर्ने सरकारी लक्ष्यमा यस्ता आयोजनाले महत्वपूर्ण भूमिका खेल्ने विश्वास गरिएको छ ।
प्रवद्र्धक कम्पनीका अनुसार आयोजनाको निर्माण कार्य सम्झौता भएको मितिबाट करिब १५ महिनाभित्र सम्पन्न गर्ने लक्ष्य राखिएको छ । निर्धारित समयमै निर्माण सम्पन्न भए आयोजनाबाट उत्पादन हुने विद्युतले स्थानीय स्तरमा आर्थिक गतिविधि बढाउनुका साथै राष्ट्रिय ऊर्जा आपूर्तिमा समेत सकारात्मक योगदान पु¥याउने अपेक्षा गरिएको छ ।
प्राइम बैंकले पछिल्ला वर्षहरूमा उत्पादनमूलक क्षेत्र, पूर्वाधार विकास तथा जलविद्युत आयोजनामा लगानी बढाउँदै आएको छ । बैंकले ऊर्जा क्षेत्रमा दीर्घकालीन वित्तीय साझेदारीमार्फत मुलुकको आर्थिक विकासमा योगदान पु¥याउने रणनीति अनुरूप यो आयोजना वित्तीय व्यवस्थापन गरेको जनाएको छ ।
यता, हिमालयन इञ्जिनियरिङ्ग एण्ड इनर्जीले पनि आयोजनालाई निर्धारित समय र गुणस्तर कायम राख्दै सम्पन्न गर्ने प्रतिबद्धता व्यक्त गरेको छ । कम्पनीका अनुसार आवश्यक प्राविधिक तथा व्यवस्थापकीय तयारी अघि बढिसकेको छ र वित्तीय व्यवस्थापन टुंगिएसँगै निर्माण कार्यले थप गति लिनेछ ।
ऊर्जा उत्पादन, निजी क्षेत्रको लगानी विस्तार र बैंकिङ क्षेत्रको सक्रिय सहभागिताले नेपालको जलविद्युत विकासमा सकारात्मक वातावरण सिर्जना गरिरहेको अवस्थामा अरुण खोला–२ जलविद्युत आयोजना पनि त्यसैको अर्को उदाहरणका रूपमा हेरिएको छ ।
प्रतिक्रिया दिनुहोस्