सिटीपोष्ट
काठमाडौं, १४ जेठ । इंग्ल्यान्डको क्लब क्रिस्टल प्यालेसले इतिहासमै पहिलो पटक युरोपेली उपाधि जित्दै नयाँ कीर्तिमान कायम गरेको छ । जर्मनीको रेड बुल एरिनामा बुधबार राति सम्पन्न कन्फ्रेन्स लिगको फाइनलमा स्पेनको रायो भालेसानोलाई १–० ले पराजित गर्दै क्रिस्टल प्यालेस च्याम्पियन बनेको हो ।
क्रिस्टल प्यालेसका लागि फ्रान्सेली फरवार्ड जिन फिलिप माटेटाले गरेको दोस्रो हाफको एकमात्र गोल निर्णायक बन्यो । खेलको ५१औँ मिनेटमा उनले गरेको गोलले टोलीलाई ऐतिहासिक सफलता दिलायो । पहिलो हाफ गोलरहित बराबरीमा सकिएको खेलमा दोस्रो हाफ सुरु भएको केही मिनेटमै प्यालेसले अग्रता बनाएको थियो ।
एडम वार्टनको प्रहारलाई रायोका गोलरक्षक अगुस्टो बाटालाले पूर्ण रूपमा नियन्त्रण गर्न नसक्दा फर्किएको बललाई माटेटाले सहजै जाली चुमाएका थिए । त्यसपछि प्यालेसले खेलमा पकड कायम राख्दै उपाधि आफ्नो पक्षमा पार्न सफल भयो ।
रायो भालेसानोले बराबरी गोल फर्काउने प्रयास गरे पनि स्पष्ट अवसर सिर्जना गर्न सकेन । प्यालेसको रक्षापंक्ति निकै मजबुत देखिएको थियो । अन्तिम समयसम्म संयमित खेल प्रदर्शन गर्दै इंग्लिस टोलीले अग्रता जोगायो ।
क्रिस्टल प्यालेसले थप गोल गर्ने अवसर पनि बनाएको थियो । येरेमी पिनोको आकर्षक फ्रिकिक पोस्टमा लागेर फर्किएको थियो । त्यसपछि उनले माटेटाका लागि अर्को अवसर सिर्जना गरे पनि गोलरक्षक बाटालाले उत्कृष्ट बचाउ गरे ।
यो उपाधिसँगै प्रशिक्षक ओलिभर ग्लासनरले पनि क्लबमा सफल यात्राको अन्त्य गरेका छन् । उनको प्रशिक्षणमा क्रिस्टल प्यालेसले एफए कप, कम्युनिटी शिल्ड र अब कन्फ्रेन्स लिगको उपाधि जित्न सफल भएको छ । लगातार दुई सिजनमा तीन प्रमुख उपाधि जित्नु क्लबका लागि ऐतिहासिक उपलब्धि बनेको छ ।
गत सिजन म्यानचेस्टर सिटीलाई हराएर एफए कप जितेको प्यालेसले यस सिजन लिभरपुललाई पराजित गर्दै कम्युनिटी शिल्ड पनि आफ्नो नाममा लेखाएको थियो । अब कन्फ्रेन्स लिगको उपाधिसँगै क्लबले युरोपेली फुटबलमा नयाँ पहिचान बनाएको छ ।
क्रिस्टल प्यालेस र रायो भालेसानो दुवैका लागि यो पहिलो युरोपेली फाइनल थियो । त्यसैले खेलको सुरुआत केही सावधानीपूर्ण बनेको थियो । पहिलो हाफमा रायोका अलेमाओ र उनाई लोपेजले अवसर पाए पनि त्यसलाई गोलमा परिणत गर्न सकेनन् ।
पहिलो हाफको अन्त्यतिर प्यालेसका टाइरिक मिचेलले एडम वार्टनको उत्कृष्ट पासमा हेडर प्रहार गरेका थिए । तर बल पोस्टभन्दा बाहिरिएपछि टोली अग्रता लिनबाट वञ्चित भयो ।
फाइनलका नायक माटेटाका लागि यो सिजन विशेष बनेको छ । उनले यस सिजन क्लबका लागि १६ गोल गरिसकेका छन् । जनवरीको खेलाडी सरुवा अवधिमा उनी इटालीको एसी मिलान जाने तयारीमा थिए । तर घुँडाको चोटका कारण त्यो प्रक्रिया रोकिएको थियो । अहिले त्यही खेलाडी क्लबको युरोपेली सफलताका मुख्य नायक बनेका छन् ।
ग्लासनरको आगमनअघि माटेटाले प्यालेसका लागि ८० खेलमा केवल ११ गोल गरेका थिए । तर प्रशिक्षक परिवर्तनपछि उनले ११० खेलमा ४६ गोल गर्दै टोलीका मुख्य आक्रमणकारीका रूपमा आफूलाई स्थापित गरेका छन् ।
यो ऐतिहासिक जितसँगै क्रिस्टल प्यालेस अर्को सिजन युरोपा लिगका लागि पनि छनोट भएको छ । क्लबका समर्थकहरूले यस सफलतालाई दशकौँदेखिको सपनाको रूपमा लिएका छन् ।
प्रतिक्रिया दिनुहोस्