सिटीपोष्ट
ललितपुर, १७ फागुन । प्रतिनिधि सभा सदस्य निर्वाचन नजिकिँदै जाँदा ललितपुर निर्वाचन क्षेत्र नं. २ को राजनीतिक समिकरणमा महत्वपूर्ण मोड आएको छ। स्वतन्त्र उम्मेदवारका रूपमा चुनावी मैदानमा उत्रिएका बाबुराज बज्राचार्यले आफ्नो उम्मेदवारी निष्क्रिय पार्दै राजेन्द्र अमात्यलाई समर्थन गर्ने घोषणा गरेका छन्।
निर्वाचनको तयारी अन्तिम चरणमा पुगिरहेका बेला बज्राचार्यको यो निर्णयले क्षेत्रको चुनावी वातावरण थप तरंगित बनेको छ। उनले नेकपा उम्मेदवार अमात्यलाई समर्थन गर्दै मतदातासँग तारा चुनाव चिह्नमा मतदान गरी प्रत्यक्ष तथा समानुपातिक दुवै तर्फका उम्मेदवारलाई विजयी गराउन आग्रह गरेका छन्।
समर्थन कार्यक्रममा बोल्दै बज्राचार्यले आफूले व्यक्तिगत महत्वाकांक्षाभन्दा पनि राजनीतिक उद्देश्य र विचारलाई प्राथमिकता दिएको बताए। “देश र जनताको हितमा अघि बढ्न सक्ने नेतृत्वलाई साथ दिनु नै अहिलेको आवश्यकता हो,” उनले भने, “त्यसैले मैले उम्मेदवारी निष्क्रिय पारेर नेकपाका उम्मेदवारलाई समर्थन गर्ने निर्णय गरेको हुँ।”
उनी यसअघि नेपाल कम्युनिस्ट पार्टी (एमाले) बाट असन्तुष्टि जनाउँदै विद्रोहस्वरूप स्वतन्त्र उम्मेदवारी दिएका थिए। तर पछिल्लो राजनीतिक छलफल र समीकरणपछि उनले आफ्नो धारणा परिवर्तन गर्दै एकीकृत वाम धारलाई बलियो बनाउनुपर्ने निष्कर्ष निकालेका हुन्।
समर्थन कार्यक्रममा नेपाल कम्युनिस्ट पार्टी (नेकपा) का केन्द्रीय सदस्य दिनेश महर्जन ‘दिपेश’ तथा जिल्ला संयोजक शिव कट्टेलको विशेष उपस्थिति रहेको थियो। कार्यक्रममा बोल्दै नेताहरूले बज्राचार्यको निर्णयलाई स्वागतयोग्य र दूरदर्शी कदमका रूपमा व्याख्या गरे। उनीहरूले क्षेत्र नं. २ मा वामपन्थी मत एकीकृत हुँदा विकास, स्थायित्व र जनअपेक्षा पूरा गर्न सहज हुने विश्वास व्यक्त गरे।
बज्राचार्यले आफू र आफ्ना समर्थकहरू अब अमात्यको पक्षमा पूर्ण रूपमा सक्रिय हुने बताएका छन्। “हामी सबै मिलेर तारा चिह्नमा मतदान गरी परिवर्तनको पक्षमा उभिनुपर्छ,” उनले मतदातालाई अपिल गर्दै भने।
उनको उम्मेदवारी निष्क्रिय भएसँगै ललितपुर–२ को चुनावी प्रतिस्पर्धा नयाँ ढंगले अघि बढ्ने आकलन गरिएको छ। राजनीतिक विश्लेषकहरूका अनुसार यस निर्णयले मत विभाजन रोकिने र नेकपा उम्मेदवारलाई प्रत्यक्ष लाभ पुग्ने सम्भावना देखिएको छ।
निर्वाचन लोकतन्त्रको उत्सव हो। यस्तो घडीमा उम्मेदवारहरूबीच हुने समर्थन र सहकार्यले राजनीतिक संस्कृतिलाई परिपक्व बनाउने अपेक्षा गरिएको छ। बाबुराज बज्राचार्यको निर्णयले व्यक्तिगत प्रतिस्पर्धाभन्दा सामूहिक उद्देश्यलाई प्राथमिकता दिन सकिने सन्देश दिएको स्थानीय मतदाताहरूको प्रतिक्रिया छ।
प्रतिक्रिया दिनुहोस्