एमालेद्वारा २५ सङ्कल्पसहित चुनावी घोषणापत्र सार्वजनिक

काठमाडौँ, ८ फागुन । आसन्न प्रतिनिधिसभा सदस्य निर्वाचनलाई लक्षित गर्दै नेपाल कम्युनिष्ट पार्टी (एमाले) ले आफ्नो चुनावी घोषणापत्र सार्वजनिक गरेको छ । बिहीबार पार्टीको केन्द्रीय निर्वाचन परिचालन कमिटीद्वारा आयोजित ‘देश पहिला’ शीर्षकको घोषणापत्र–आधारित बहस कार्यक्रममा अध्यक्ष केपी शर्मा ओलीले सम्बोधन गर्दै तत्काल कार्यान्वयन गरिने ११ कार्यक्रम, पाँच आधारभूत नीतिगत कार्य तथा दीर्घकालीन समृद्धिलाई लक्षित २५ सङ्कल्पसहित घोषणापत्र सार्वजनिक गरिएको हो ।

घोषणापत्रमार्फत एमाले पार्टीले आगामी निर्वाचनपछि मुलुकको शासन सञ्चालनमा आफ्नो प्राथमिकता, नीतिगत दिशा तथा विकासका प्रतिबद्धताहरू औपचारिक रूपमा सार्वजनिक गरेको छ ।

अध्यक्ष ओलीले समावेश लक्ष्य र प्रतिबद्धताहरू कार्यान्वयनमुखी हुने दाबी गर्नुभयो । उहाँका अनुसार घोषणापत्र केवल राजनीतिक दस्तावेज मात्र नभई निर्वाचनपछिको शासन सञ्चालनका लागि मार्गनिर्देशक खाका पनि हो ।

एमालेले ‘समृद्ध नेपाल, सुखी नेपालीः राष्ट्रिय आकाङ्क्षा हाम्रो गन्तव्य’ भन्ने नारालाई पुनः प्राथमिकतामा राख्दै विगतमा आफ्नो नेतृत्वमा सरकार हुँदा प्रारम्भ गरिएका तर विभिन्न कारणले पूर्णता दिन नसकिएका कार्यक्रमहरूलाई निरन्तरता दिने योजना अघि सारेको छ । सुशासन, पूर्वाधार विकास, रोजगारी सिर्जना तथा सामाजिक न्यायका क्षेत्रलाई पार्टीले आगामी कार्यकालका प्रमुख प्राथमिकतामा राखेको जनाएको छ ।

अध्यक्ष ओलीले निर्वाचनपछि गठन हुने सरकारको पहिलो मन्त्रिपरिषद् बैठकबाटै समयसीमा निर्धारण गरी यी कार्यक्रम कार्यान्वयनको प्रक्रिया सुरु गर्ने प्रतिबद्धता व्यक्त गर्नुभयो । उहाँका अनुसार घोषणापत्रमा उल्लेख गरिएका कार्यक्रमहरू अनुभवमा आधारित योजना भएकाले तिनको प्रभावकारिता सुनिश्चित गर्न सकिने विश्वास पार्टीले लिएको छ ।

कार्यक्रममा अध्यक्ष ओलीले विगतका राजनीतिक अभ्यास र प्रशासनिक अनुभवका आधारमा एमाले मुलुकको समग्र विकास यात्रामा नेतृत्वदायी भूमिका निर्वाह गर्न सक्षम रहेको धारणा व्यक्त गर्नुभयो । उहाँले पार्टीले विघटन होइन निर्माणको राजनीति गर्ने प्रतिबद्धता जनाएको उल्लेख गर्दै विकास केन्द्रित एजेन्डामार्फत मुलुकको आर्थिक तथा सामाजिक रूपान्तरण सम्भव हुने बताउनुभयो ।

राष्ट्रियता र स्वाधीनताको पक्षमा पार्टीको अडान स्पष्ट रहेको उल्लेख गर्दै अध्यक्ष ओलीले निर्वाचनलाई नीतिगत प्रतिस्पर्धाको अवसरका रूपमा लिनुपर्ने धारणा व्यक्त गर्नुभयो । उहाँका अनुसार पार्टी कुनै पनि प्रकारको लोकप्रियतामुखी वा अल्पकालीन राजनीतिक रणनीतिमा केन्द्रित नभई दीर्घकालीन विकासको खाकामा आधारित कार्यक्रम अघि बढाउने पक्षमा रहेको छ ।

युवाशक्ति र अनुभवी पुस्ताबीचको सहकार्यलाई राष्ट्र निर्माणको आधारका रूपमा व्याख्या गर्दै उहाँले आगामी राजनीतिक यात्रामा सबै पुस्तालाई समेट्ने नीति आवश्यक रहेको औँल्याउनुभयो । “देश निर्माणका लागि युवाको ऊर्जा र अनुभवी पुस्ताको दृष्टि दुवै आवश्यक छन्,” उहाँले भन्नुभयो, “हाम्रो राजनीतिक दृष्टिकोण पुस्ताबीच समन्वय कायम गर्दै सामूहिक प्रगतितर्फ उन्मुख रहनेछ ।”

निर्वाचनलाई राष्ट्रिय स्वाभिमान र नीति–दृष्टिकोणबीचको प्रतिस्पर्धाका रूपमा प्रस्तुत गर्दै अध्यक्ष ओलीले जनमतमार्फत मुलुकको विकास दिशालाई पुनःपरिभाषित गर्ने अवसर प्राप्त हुने विश्वास व्यक्त गर्नुभयो । उहाँका अनुसार घोषणापत्रमा समावेश नीतिगत प्राथमिकताले आर्थिक समृद्धि, सामाजिक समानता तथा संस्थागत विकासलाई समेट्ने लक्ष्य लिएको छ ।

घोषणापत्रमा समावेश २५ सङ्कल्पलाई दीर्घकालीन समृद्धिका स्तम्भका रूपमा प्रस्तुत गरिएको छ, जसमा आर्थिक विकास, रोजगारी विस्तार, सार्वजनिक सेवा सुधार, सामाजिक सुरक्षा तथा पूर्वाधार निर्माणका विषयहरू समेटिएका छन् । पार्टीले यी कार्यक्रममार्फत नागरिकको जीवनस्तर उकास्ने तथा राज्यप्रतिको विश्वास सुदृढ गर्ने अपेक्षा गरेको जनाएको छ ।

यस अवसरमा अध्यक्ष ओलीले विगतमा घटित विभिन्न घटनाक्रमलाई उल्लेख गर्दै राष्ट्रिय सार्वभौमसत्ता तथा अस्तित्वमाथि चुनौती उत्पन्न गर्ने गतिविधिप्रति सजग रहनुपर्ने आवश्यकता पनि औँल्याउनुभयो । मुलुकको स्थायित्व र विकासका लागि नीति तथा कार्यक्रमहरू राष्ट्रिय हितअनुकूल हुनुपर्नेमा उहाँले जोड दिनुभयो ।

घोषणापत्रमार्फत एमालेले आगामी निर्वाचनलाई विकास र सुशासनमुखी राजनीतिक एजेन्डा कार्यान्वयन गर्ने अवसरका रूपमा लिएको संकेत दिएको छ । निर्वाचनपछि गठन हुने सरकारमार्फत सार्वजनिक गरिएका प्रतिबद्धताहरूलाई समयसीमाभित्रै कार्यान्वयन गर्ने लक्ष्य पार्टीले अघि सारेको छ ।

पार्टीले आफ्नो घोषणापत्रमार्फत नागरिकको आर्थिक–सामाजिक अवस्थाको सुधारलाई केन्द्रमा राख्दै विकासका बहुआयामिक कार्यक्रमहरू प्रस्तुत गरेको जनाएको छ । आगामी निर्वाचनमा जनसमर्थन प्राप्त भएमा सार्वजनिक गरिएका नीतिगत प्रतिबद्धताहरूलाई व्यवहारमा रूपान्तरण गर्ने प्रतिबद्धता व्यक्त गर्दै एमालेले आफ्नो चुनावी रणनीतिलाई औपचारिक रूप दिएको छ ।