टिकटकमा आधारित फिल्म ‘भाइरल गोर्खे’ को ट्रेलर सार्वजनिक

काठमाडौँ, २१ पुस । माघ १ गतेबाट फिल्म ‘भाइरल गोर्खे’ प्रदर्शनमा आउदैछ । अभिनेता सौगात मल्ल र अभिनेत्री सृष्टि श्रेष्ठले व्यक्तिगत जीवनमा आएको उतारचढावपछि पहिलो पटक पुनः एकसाथ काम गरेको चलचित्र ‘भाइरल गोर्खे’ को ट्रेलर सार्वजनिक गरिएको छ ।

बुधबार काठमाडौंमा आयोजित एक विशेष कार्यक्रममा चार मिनेट लामो ट्रेलर सार्वजनिक गर्दै निर्माण पक्षले फिल्मको विषयवस्तु र प्रस्तुतीबारे जानकारी गराएको हो । ट्रेलरले आधुनिक समाजमा सामाजिक सञ्जाल, विशेषगरी टिकटकमार्फत चर्चित बन्ने चाहनाले व्यक्तिको जीवनमा ल्याउने प्रभाव र त्यसका सकारात्मक तथा नकारात्मक पक्षलाई व्यंग्यात्मक ढंगले प्रस्तुत गरेको देखिन्छ ।

सार्वजनिक ट्रेलर अनुसार, ‘भाइरल गोर्खे’ एक सामान्य पात्रको कथामा आधारित छ, जो सामाजिक सञ्जालमा भाइरल हुन चाहन्छ । गोर्खाको पाँडे गाउँलाई कथाको केन्द्र बनाएर निर्माण गरिएको फिल्ममा सौगात मल्लले निभाएको गोर्खे पात्र टिकटकमार्फत चर्चित बन्ने सपना देख्छ ।

ऊ चर्चित व्यक्तित्व शिव श्रेष्ठजस्तै लोकप्रिय बन्ने आकांक्षा राख्छ र त्यस लक्ष्यका लागि टिकटकलाई माध्यम बनाउँछ । भाइरल हुनका लागि उसले गर्ने विभिन्न प्रयास, अनौठा हर्कत र त्यस क्रममा आइपर्ने चुनौतीहरू ट्रेलरमा रोचक ढंगले समेटिएका छन् ।

ट्रेलरले पात्रको सामाजिक सञ्जालप्रतिको आकर्षण मात्र होइन, त्यसले उसको प्रेम सम्बन्ध र व्यक्तिगत जीवनमा ल्याउने उतारचढावलाई पनि संवेदनशील रूपमा प्रस्तुत गरेको देखिन्छ । अभिनेत्री सृष्टि श्रेष्ठसँगको प्रेम सम्बन्ध, पारिवारिक परिवेश, समाजको प्रतिक्रिया र आत्मसम्मानको द्वन्द्व ट्रेलरमा स्पष्ट रूपमा झल्किएको छ । यसले आजको पुस्तामा बढ्दो ‘भाइरल संस्कार’ प्रति चलचित्रले व्यंग्य र सन्देश दुवै दिने संकेत गर्दछ ।

‘भाइरल गोर्खे’ को निर्देशन अनुभवी निर्देशक निगम श्रेष्ठले गर्नुभएको हो । यसअघि ‘छड्के’, ‘लालपूर्जा’ र ‘छड्के २’ जस्ता चर्चित फिल्म निर्देशन गरिसक्नुभएका श्रेष्ठले यस चलचित्रमार्फत सामाजिक सञ्जालले समाजमा पारेको प्रभावलाई मनोरञ्जनात्मक शैलीमा प्रस्तुत गर्ने प्रयास गर्नुभएको छ । फिल्मको कथा पनि निर्देशक स्वयंले लेख्नुभएको हो, जसले उहाँको समसामयिक विषयप्रतिको गहिरो चासो र अध्ययनलाई प्रतिबिम्बित गर्दछ ।

चलचित्रमा सौगात मल्ल र सृष्टि श्रेष्ठका साथै बुद्धि तामाङ, लक्ष्मी गिरी, राजाराम पौडेल, पत्रकार ऋषि धमला, रवि भुजेल, पवित्रा साकी (मिस पवी) लगायतका कलाकारहरूको पनि उल्लेखनीय अभिनय रहेको छ । कलाकारहरूको विविध समूहले फिल्मलाई जीवन्त बनाउने अपेक्षा गरिएको छ । विशेषगरी, हास्य र व्यंग्यमा परिचित बुद्धि तामाङको भूमिका र अन्य सहायक कलाकारहरूको प्रस्तुति ट्रेलरमै दर्शकको ध्यान आकर्षित गर्न सफल देखिन्छ ।

फिल्म एके ब्रदर कम्पनी, द जिएमआई एकेडेमी तथा निर्भाना फिल्म स्कुलको संयुक्त ब्यानरमा निर्माण गरिएको हो। चलचित्रका निर्माता अमित श्रेष्ठ, विशाल ताम्राकार, महेश लामिछाने र केवल जंग कुँवर रहनुभएको छ । निर्माण पक्षले सामाजिक यथार्थलाई मनोरञ्जनसँग जोड्दै दर्शकलाई सोच्न बाध्य बनाउने उद्देश्य राखेको जनाएको छ ।