सिटीपोष्ट
काठमाडौँ, १६ असोज । सशस्त्र प्रहरी महानिरीक्षक नारायणदत्त पौडेलले सीमा क्षेत्रमा हुने अवैध गतिविधि, सीमा अपराध र राजस्व चुहावट नियन्त्रणलाई प्रभावकारी बनाउन निर्देशन दिनुभएको छ । बिहीबार मधेस प्रदेशस्थित नं. २ छिन्नमस्ता वाहिनी मुख्यालय महोत्तरी तथा मातहतका गण, गुल्म, बोर्डर आउटपोष्ट र सुरक्षा बेसमा कार्यरत सशस्त्र प्रहरी कर्मचारीलाई महानिरीक्षक पौडेलले सीमा अपराध नियन्त्रणमा प्रभावकारी रूपमा परिचालित हुन निर्देशन दिनुभएको हो ।
सीमा सुरक्षासँग सम्बन्धित गतिविधिको निरीक्षण तथा जानकारी लिने क्रममा उहाँले सम्बन्धित सरोकारवाला निकाय र सीमावर्ती स्थानीय बासिन्दासँग सीमा सुरक्षा तथा समसामयिक विषयमा भइरहेका कामकारबाहीबारे जानकारी लिनुभएको सशस्त्र प्रहरीका सहप्रवक्ता शैलेन्द्र थापाले जानकारी दिनुभयो ।
महानिरीक्षक पौडेलले सीमा क्षेत्रमा हुने अवैध गतिविधिको प्रभावकारी निगरानी र रोकथामका लागि सुरक्षा निकायबीच समन्वयलाई प्राथमिकता दिन निर्देशन दिनुभएको छ । उहाँले सीमा क्षेत्रमा खटिएका कमाण्डर तथा सुरक्षाकर्मीलाई उच्च सतर्कता, जिम्मेवारी र समन्वयका साथ कार्यसम्पादन गर्न आग्रह गर्नुभएको हो ।
सीमा इलाकामा हुने अवैध क्रियाकलाप नियन्त्रणका लागि आवश्यक योजना समयमै बनाएर कार्यान्वयन गर्न तथा सीमा अपराध र राजस्व चुहावट नियन्त्रणमा नतिजामुखी ढङ्गले परिचालित हुन पनि उहाँले निर्देशन दिनुभएको छ ।
यसैबीच, रुपन्देहीको सिद्धार्थनगर नगरपालिका–१ शान्तिगेटस्थित जाँचकक्षबाट सशस्त्र प्रहरीले रु. दुई करोड ५१ लाखभन्दा बढी मूल्यको सुनका गरगहनासहित एक महिलालाई नियन्त्रणमा लिएको छ ।
सशस्त्र प्रहरी बल, नेपाल सीमा सुरक्षा गुल्म डण्डा, रुपन्देहीबाट खटिएको टोलीले विशेष सूचनाका आधारमा काठमाडौँ महानगरपालिका–१९ बस्ने ४६ वर्षीया इला पटेललाई जाँच गर्ने क्रममा उक्त गरगहना बरामद गरेको हो । भारतबाट नेपालतर्फ आउँदै गरेकी पटेललाई नेपाल प्रहरी र सशस्त्र प्रहरीको संयुक्त टोलीले जाँच गरेको थियो । टोलीको नेतृत्व सशस्त्र प्रहरी नायब उपरीक्षक गोपीकृष्ण भट्टराईले गर्नुभएको थियो ।
जाँचका क्रममा विभिन्न डिजाइन र आकारका हार, औँठी, चुरा, माला, सिक्री, झुम्का, गोली औँठी, लकेट, पोते, बाली, जुली, टप, नाकको फुली, पत्थरवाला हार तथा ब्रासलेटलगायतका गरगहना फेला परेको सशस्त्र प्रहरीले जनाएको छ ।
बरामद गरगहनाको कुल तौल दुई किलो ६०५ ग्राम रहेको छ । गहनामा रहेको सुन तथा अन्य धातुको परिमाण यकिन गर्न सिद्धार्थनगर सुनचाँदी व्यवसायी सङ्घमा परीक्षणका लागि पठाइएको थियो । परीक्षणबाट त्यसमा रहेको सुनको मात्रा करिब एक किलो रहेको पुष्टि भएको प्रहरीले जनाएको छ ।
प्रहरीका अनुसार बरामद गरगहनाको बाहिरी भागमा सुनको लेपन देखिए पनि भित्री भागमा अन्य धातु प्रयोग गरिएको पाइएको छ । सशस्त्र प्रहरी नायब उपरीक्षक भट्टराईका अनुसार प्रचलित मूल्यका आधारमा त्यसमा रहेको सुनको मूल्य दुई करोड ५१ लाख ९३ हजार ३५० कायम गरिएको छ ।
बरामद गरगहना तथा नियन्त्रणमा लिइएकी पटेललाई आवश्यक अनुसन्धान र कानुनी कारबाहीका लागि भैरहवा भन्सार कार्यालय, रुपन्देही पठाइएको छ । भैरहवा भन्सार कार्यालयका प्रमुख भन्सार अधिकृत हरिहर पौडेलले बरामद गरगहनासम्बन्धी आवश्यक प्रक्रिया अघि बढाइएको जानकारी दिनुभएको छ ।
उता, काठमाडौँको चन्द्रागिरि नगरपालिका–२ स्थित सुरुङमार्गको चेकपोस्टबाट पनि प्रहरीले भन्सार छली गरी ल्याइएको आशङ्कामा ठूलो परिमाणमा विभिन्न सामान बरामद गरेको छ ।
बिहीबार बिहान वीरगन्जबाट काठमाडौँतर्फ आउँदै गरेको यात्रुवाहक बसको डिक्की जाँच गर्ने क्रममा बिल–बिजक नभएका सामान फेला परेको जिल्ला प्रहरी परिसर काठमाडौँका प्रहरी उपरीक्षक दानबहादुर थापाले जानकारी दिनुभयो ।
बा.प्र.०३–००१ ख ३४९३ नम्बरको उक्त बसमा १५ बोरा विभिन्न कम्पनीका घडी, चार कार्टुन अमूल चिज, तीन कार्टुन अमूल क्रिम र एक कार्टुन मिल्किस्ट बिस्कुट फेला परेको प्रहरीले जनाएको छ ।
प्रहरी प्रभाग नागढुङ्गाबाट खटिएको टोलीले नियमित जाँचका क्रममा ती सामान फेला पारेको हो । बिल–बिजक नभएका सामान नियन्त्रणमा लिएर आवश्यक कारबाहीका लागि त्रिभुवन अन्तर्राष्ट्रिय विमानस्थल भन्सार कार्यालय पठाइएको प्रहरीले जनाएको छ ।
पछिल्ला घटनाले सीमा नाका तथा राजधानी प्रवेश गर्ने मार्गमा गरिने निगरानी र जाँचको भूमिकालाई पुनः देखाएको छ । सीमा सुरक्षादेखि भन्सार छली नियन्त्रणसम्मका गतिविधिमा सुरक्षा निकाय, भन्सार कार्यालय तथा सम्बन्धित निकायबीचको समन्वय र सूचना आदानप्रदान प्रभावकारी भए अवैध गतिविधि नियन्त्रण तथा राजस्व संरक्षणमा सहयोग पुग्ने देखिन्छ ।
प्रतिक्रिया दिनुहोस्