सिटीपोष्ट
काठमाडौं, १२ साउन । निजी क्षेत्रको अग्रणी वाणिज्य बैंक सानिमा बैंक लिमिटेडले आर्थिक वर्ष २०८२÷८३ मा उल्लेखनीय वित्तीय सुधार हासिल गरेको छ । बैंकले नाफा वृद्धि मात्र होइन, खराब कर्जामा उल्लेख्य नियन्त्रण कायम गर्दै लाभांश वितरण गर्ने क्षमता पनि बलियो बनाएको संकेत गरेको छ । प्रकाशित चौथो त्रैमाससम्मको अपरिस्कृत वित्तीय विवरणअनुसार बैंकले गत आर्थिक वर्षमा ३ अर्ब ५५ करोड रुपैयाँ खुद नाफा आर्जन गरेको छ, जुन अघिल्लो आर्थिक वर्षको तुलनामा ३८.०१ प्रतिशतले बढी हो ।
अघिल्लो आर्थिक वर्ष २०८१÷८२ मा बैंकले २ अर्ब ५७ करोड रुपैयाँ खुद नाफा कमाएको थियो । यस वर्षको उल्लेखनीय वृद्धिले बैंकको सञ्चालन क्षमता, ब्याज आम्दानीको विस्तार र कर्जा व्यवस्थापनमा सुधार भएको देखाएको विश्लेषकहरूको भनाइ छ ।
बैंकको मुख्य आम्दानी स्रोतका रूपमा रहेको खुद ब्याज आम्दानी पनि उल्लेखनीय रूपमा बढेको छ । गत आर्थिक वर्षमा बैंकले ६ अर्ब ९६ करोड रुपैयाँ खुद ब्याज आम्दानी गरेको छ । बजारमा ब्याजदर क्रमशः स्थिर बन्दै जाँदा तथा कर्जा प्रवाह विस्तारसँगै बैंकको ब्याज आम्दानीमा सुधार आएको देखिन्छ । त्यसैगरी सेवा शुल्क तथा कमिसन आम्दानी पनि सन्तोषजनक रहँदै १ अर्ब ३२ करोड रुपैयाँ पुगेको छ, जसले गैर–ब्याज आम्दानीको आधार पनि मजबुत बन्दै गएको संकेत गर्छ ।
बैंकको प्रतिशेयर वितरणयोग्य नाफा (डिस्ट्रिब्युटेबल ईपीएस) २० रुपैयाँ ८५ पैसा पुगेको छ । यही सूचकलाई आधार मान्दा सानिमा बैंकसँग यस वर्ष पनि आकर्षक लाभांश वितरण गर्ने क्षमता रहेको अनुमान गरिएको छ । यद्यपि लाभांशको अन्तिम निर्णय भने सञ्चालक समितिको सिफारिस, लेखापरीक्षण र नेपाल राष्ट्र बैंकको स्वीकृतिपछि मात्र हुनेछ ।
वित्तीय विवरणअनुसार बैंकको चुक्ता पुँजी १५ अर्ब ५८ करोड १५ लाख रुपैयाँ रहेको छ । बैंकको कुल सम्पत्ति विस्तार भएर २ खर्ब ४९ अर्ब रुपैयाँ पुगेको छ भने ग्राहक निक्षेप र कर्जा लगानी दुवैमा वृद्धि देखिएको छ । बैंकले गत आर्थिक वर्षको अन्त्यसम्म १ खर्ब ९५ अर्ब रुपैयाँभन्दा बढी कर्जा प्रवाह गरेको छ । यसले निजी क्षेत्र तथा उत्पादनमूलक क्षेत्रमा लगानी विस्तार हुँदै गएको संकेत गर्दछ ।
यस आर्थिक वर्षको अर्को सकारात्मक पक्ष खराब कर्जामा आएको सुधार हो । बैंकको निष्क्रिय कर्जा (एनपीएल) घटेर २.८७ प्रतिशतमा झरेको छ । पछिल्ला केही वर्षयता बैंकिङ क्षेत्रमा बढ्दो खराब कर्जाले चुनौती सिर्जना गरिरहेको अवस्थामा सानिमा बैंकले भने जोखिम व्यवस्थापनमा सुधार गर्दै खराब कर्जा नियन्त्रण गर्न सफल भएको देखिएको छ । खराब कर्जा घट्नुले आगामी दिनमा थप प्रोभिजन छुट्याउनुपर्ने दबाब कम हुने र त्यसले नाफामा सकारात्मक प्रभाव पार्ने अपेक्षा गरिएको छ ।
बैंकिङ क्षेत्रका विश्लेषकहरूका अनुसार पछिल्लो समय आर्थिक गतिविधि क्रमशः चलायमान बन्दै जाँदा बैंकहरूको कर्जा असुलीमा सुधार देखिएको छ । त्यसको प्रत्यक्ष लाभ सानिमा बैंकले पनि पाएको देखिन्छ । ब्याज आम्दानी वृद्धि, सञ्चालन खर्चको प्रभावकारी व्यवस्थापन तथा जोखिम नियन्त्रणका कारण बैंकको समग्र वित्तीय स्वास्थ्य सुदृढ भएको उनीहरूको विश्लेषण छ ।
नेपालको बैंकिङ क्षेत्रमा प्रतिस्पर्धा तीव्र भइरहेका बेला सानिमा बैंकले वित्तीय सूचकहरूमा सुधार गर्दै आफ्नो बजारस्थिति थप मजबुत बनाएको देखिन्छ । विशेषगरी नाफा वृद्धि, खराब कर्जा नियन्त्रण, कर्जा विस्तार र वितरणयोग्य नाफाको स्तरले बैंकका लगानीकर्ता तथा सेयरधनीमा सकारात्मक अपेक्षा बढाएको छ ।
अब बैंकको वार्षिक साधारणसभाबाट लाभांश प्रस्ताव सार्वजनिक हुने प्रतीक्षामा लगानीकर्ताको ध्यान केन्द्रित भएको छ । हालको वितरणयोग्य नाफाको अवस्थालाई आधार मान्दा सानिमा बैंक यस वर्ष पनि नगद वा बोनस सेयरसहित आकर्षक लाभांश घोषणा गर्ने अवस्थामा पुगेको विश्लेषण गरिएको छ ।
प्रतिक्रिया दिनुहोस्