सिटीपोष्ट
काठमाडौं, १९ जेठ । नागरिकता सम्बन्धी कागजातमा किर्ते गरेको आरोपमा पक्राउ परेका वीरगञ्ज महानगरपालिकाका मेयर राजेशमान सिंहविरुद्धको मुद्दा पर्सा जिल्ला अदालतका प्रमुख न्यायाधीश गायत्रीप्रसाद रेग्मीको इजलासमा परेको छ। पक्राउपछि अदालतमा उपस्थित गराइएका सिंहमाथि अनुसन्धानका लागि थप म्याद आवश्यक छ वा छैन भन्ने विषयमा अदालतले सुनुवाइ गर्ने तयारी गरेको छ।
पर्सा जिल्ला अदालतले गत साता सिंहविरुद्ध किर्ते कसुरअन्तर्गत पक्राउ पुर्जी जारी गरेको थियो। वीरगञ्जका स्थानीय लियाकत अलीले दिएको उजुरीका आधारमा अदालतले अनुसन्धानका लागि पक्राउ अनुमति दिएको हो। उजुरीमा मेयर सिंहले अर्काकी छोरीलाई आफ्नी छोरीका रूपमा देखाएर झुट्टा विवरणका आधारमा नागरिकता बनाउन सहयोग गरेको आरोप लगाइएको छ।
प्रहरीले अदालतबाट पक्राउ अनुमति पाएपछि सिंहको खोजी तीव्र बनाएको थियो। केही दिनसम्म सम्पर्कविहीन रहेका उनी अन्ततः प्रहरी नियन्त्रणमा आएपछि अनुसन्धान प्रक्रिया थप अघि बढेको हो। यसअघि अदालतले मेयर सिंहसँगै उनकी पत्नी र नागरिकता प्रक्रियासँग सम्बन्धित एक पूर्व स्थानीय पञ्जिकाधिकारीविरुद्ध पनि पक्राउ आदेश जारी गरेको थियो।
अदालत स्रोतका अनुसार हालको सुनुवाइ मुख्यतः अनुसन्धानको प्रगतिसँग सम्बन्धित हुनेछ। सरकारी वकिल कार्यालयले घटनासम्बन्धी कागजात, नागरिकता जारी प्रक्रियाका अभिलेख तथा सम्बन्धित व्यक्तिहरूको बयानलाई आधार बनाएर अनुसन्धान अघि बढाइरहेको छ। यदि प्रारम्भिक प्रमाण पर्याप्त देखिएमा मुद्दा औपचारिक अभियोजनतर्फ जाने सम्भावना रहेको कानुनी क्षेत्रका जानकारहरू बताउँछन्।
प्रमुख न्यायाधीश रेग्मीले पछिल्ला केही चर्चित मुद्दाहरूमा समेत सुनुवाइ गरिसकेका छन्। पर्सा जिल्ला अदालतमा चर्चित बनेका विभिन्न फौजदारी तथा सार्वजनिक सरोकारका मुद्दाहरू उनको इजलासमा परिरहेका बेला मेयर सिंहसम्बन्धी प्रकरणले थप चासो पाएको छ।
प्रतिक्रिया दिनुहोस्