सिटीपोष्ट
काठमाडौं, १४ चैत । काठमाडौं स्थित काठमाडौं जिल्ला अदालत अगाडि आइतबार प्रदर्शनकारी र प्रहरीबीच झडप भएको छ। केपी शर्मा ओली पक्राउको विरोधमा आन्दोलनमा उत्रिएका नेपाल कम्युनिष्ट पार्टी (एमाले) का कार्यकर्ता र सुरक्षाकर्मीबीच स्थिति तनावपूर्ण बनेको हो।
माइतीघरबाट सुरु भएको प्रदर्शन नयाँ बानेश्वर तर्फ अघि बढ्ने क्रममा प्रहरीले बबरमहल क्षेत्रस्थित जिल्ला अदालत अगाडि रोकेपछि विवाद चर्किएको थियो। प्रदर्शनकारीहरूले निषेधित क्षेत्र तोड्ने प्रयास गरेपछि सुरक्षाकर्मीले अवरोध खडा गरेका थिए।
त्यसक्रममा दुवै पक्षबीच धकेलाधकेल तथा सामान्य झडप भएको प्रत्यक्षदर्शीहरूले बताएका छन्। भीड नियन्त्रणका लागि प्रहरीले बल प्रयोग गरेको जनाइएको छ भने केही प्रदर्शनकारीलाई नियन्त्रणमा लिइएको स्रोतले जनाएको छ।
ओली पक्राउको विरोधमा एमाले निकट विभिन्न संगठनहरू सडकमा उत्रिएका छन्। पार्टीले यस घटनालाई राजनीतिक प्रेरित कदम भन्दै आन्दोलनलाई थप सशक्त बनाउने चेतावनी दिएको छ।
झडपपछि बबरमहल–नयाँ बानेश्वर क्षेत्रको सुरक्षा व्यवस्था कडा पारिएको छ। प्रशासनले सर्वसाधारणलाई अनावश्यक रूपमा उक्त क्षेत्रमा आवतजावत नगर्न आग्रह गरेको छ।
प्रतिक्रिया दिनुहोस्