सिटीपोष्ट
काठमाडौं, १४ चैत । काठमाडौंको माइतीघर मण्डला क्षेत्र आइतबार तनावग्रस्त बनेको छ। केपी शर्मा ओली पक्राउको विरोधमा नेपाल कम्युनिष्ट पार्टी (एमाले) निकट विभिन्न जनसंगठनहरूले संयुक्त रूपमा प्रदर्शन गरेपछि स्थिति असामान्य बनेको हो।
प्रहरीले एमाले अध्यक्ष ओलीलाई बिहानै नियन्त्रणमा लिएपछि त्यसको विरोधस्वरूप पार्टीका करिब दुई दर्जन जनसंगठनहरू माइतीघर क्षेत्रमा भेला भएका थिए। प्रदर्शनकारीहरूले सरकारविरुद्ध नाराबाजी गर्दै निषेधित क्षेत्र तोडेर अघि बढ्ने प्रयास गरेपछि झडपको अवस्था सिर्जना भएको हो।
प्रदर्शनकारीहरू नयाँ बानेश्वर तर्फ अघि बढ्न खोजेपछि सुरक्षाकर्मीले उनीहरूलाई रोक्न खोजेका थिए। सो क्रममा केही समय तनाव चर्किएको र भीड नियन्त्रणका लागि प्रहरीले हस्तक्षेप गर्नुपरेको बताइएको छ।
प्रहरी स्रोतका अनुसार निषेधाज्ञा उल्लङ्घन गर्दै अघि बढेका केही प्रदर्शनकारीलाई नियन्त्रणमा लिइएको छ। स्थिति थप बिग्रिन नदिन ठूलो संख्यामा प्रहरी परिचालन गरिएको छ भने क्षेत्रको सुरक्षा व्यवस्था कडा बनाइएको छ।
यता एमाले पक्षले आफ्नो शीर्ष नेतृत्वमाथि गरिएको पक्राउलाई राजनीतिक पूर्वाग्रहको परिणाम भन्दै विरोध जनाएको छ। पार्टीसम्बद्ध संगठनहरूले देशभर आन्दोलन चर्काउने चेतावनी दिएका छन्।
हाल माइतीघर आसपासको अवस्था सतर्कतासहित नियन्त्रणमा रहेको प्रहरीले जनाएको छ भने सर्वसाधारणलाई अनावश्यक रूपमा उक्त क्षेत्रमा नजान आग्रह गरिएको छ।
प्रतिक्रिया दिनुहोस्