सिटीपोष्ट
कास्की, ६ पुस । श्रीलङ्काको राजधानी कोलोम्बोमा हालै सम्पन्न वल्र्ड पावर लिफ्टिङ च्याम्पियनसिपमा महिलातर्फ च्याम्पियन बन्न सफल नेपाली खेलाडी शर्मिला शाहलाई शुक्रबार पोखरामा विशेष समारोहबीच सम्मान गरिएको छ । अन्तरराष्ट्रिय प्रतियोगितामा उत्कृष्ट प्रदर्शन गर्दै नेपाललाई विश्वमञ्चमा गौरवान्वित बनाएको योगदानको कदरस्वरूप शाहलाई नगदसहित सम्मान गरिएको हो ।
उच्च शिक्षालय तथा माध्यमिक विद्यालय सङ्घ नेपाल (हिसान) कास्कीले आयोजना गरेको सम्मान कार्यक्रममा शर्मिला शाहलाई नगद २५ हजार, सम्मानपत्र र दोसल्ला प्रदान गरिएको छ । नेपालबाट विश्वस्तरीय प्रतियोगितामा सहभागिता जनाउँदै स्वर्ण पदकसहित उपाधि जितेर देशको नाम उज्ज्वल बनाएकोमा उहाँलाई सम्मान गरिएको हिसान कास्कीले जनाएको छ ।
सम्मान कार्यक्रम हिसानको १८औँ संस्करणको स्पोर्टस् मिटको उद्घाटन समारोहका अवसरमा आयोजना गरिएको थियो । पोखरा महानगरपालिका–११ फूलबारी निवासी शर्मिला शाहलाई गण्डकी विश्वविद्यालयका कुलपति प्रा डा इन्द्रप्रसाद तिवारीलगायत अतिथिहरूले सम्मान गर्नुभएको हो । कार्यक्रममा विभिन्न शैक्षिक संस्था, खेलकुदकर्मी, विद्यार्थी तथा अभिभावकको उल्लेखनीय उपस्थिति रहेको थियो ।
वल्र्ड पावर लिफ्टिङ फेडेरेसनको आयोजना तथा श्रीलङ्का पावर लिफ्टिङ फेडेरेसनको संयोजनमा सम्पन्न उक्त प्रतियोगितामा शर्मिला शाहले ८४ केजी तौल समूहमा प्रतिस्पर्धा गर्दै नेपालका लागि स्वर्ण पदक जित्न सफल हुनुभएको थियो । भारत, पाकिस्तान, श्रीलङ्का, अष्ट्रेलिया, रुसलगायत विभिन्न देशका खेलाडी सहभागी रहेको प्रतियोगितामा महिलातर्फ उत्कृष्ट प्रदर्शन गर्दै उहाँले विश्व च्याम्पियनको उपाधि हासिल गर्नुभएको हो ।
सम्मान ग्रहणपछि बोल्दै शर्मिला शाहले आफ्नो यात्रा सहज नभएको उल्लेख गर्दै निरन्तर मेहनत, आत्मविश्वास र अनुशासनले सफलता सम्भव हुने अनुभव सुनाउनुभयो । “पावर लिफ्टिङमा लागेको पाँच वर्षमै वल्र्ड च्याम्पियन बन्न सक्छु भन्ने मैले कल्पना पनि गरेकी थिइनँ,” उहाँले भन्नुभयो, “हारबाट सिक्दै, निरन्तर अभ्यास र आत्मविश्वासका साथ अघि बढेपछि लक्ष्य हासिल गर्न सकिने रहेछ । देशका लागि उपाधि जित्न पाउनु मेरा लागि गर्व र जिम्मेवारी दुवै हो ।”
उहाँले नेपालमा खेलकुद क्षेत्रमा अझै पर्याप्त सम्भावना रहेकाले राज्य, निजी क्षेत्र र शैक्षिक संस्थाको सहकार्य आवश्यक रहेको धारणा व्यक्त गर्नुभयो । युवा खेलाडीलाई समयमै अवसर, प्रशिक्षण र प्रोत्साहन मिलेमा अन्तरराष्ट्रियस्तरमा अझ धेरै सफलता हासिल गर्न सकिने उहाँको विश्वास छ ।
यसै अवसरमा पोखरा रङ्गशालामा आजदेखि सुरु भएको १८औँ हिसान स्पोर्टस् मिटको औपचारिक उद्घाटन पनि गरिएको छ । उद्घाटन कार्यक्रम पोखरा रङ्गशालास्थित बास्केटबल कोर्टमा सम्पन्न भएको हो । कार्यक्रममा गण्डकी विश्वविद्यालयका कुलपति प्रा डा इन्द्रप्रसाद तिवारीले बदलिँदो विश्व परिवेशसँगै खेलकुद क्षेत्र केवल मनोरञ्जनको माध्यम मात्र नभई मुलुकको अर्थतन्त्रसँग समेत गहिरो रूपमा जोडिँदै गएको उल्लेख गर्नुभयो ।
“आज विश्वका धेरै मुलुकहरूको अर्थतन्त्रमा खेलकुदले महत्वपूर्ण योगदान दिइरहेको छ,” कुलपति तिवारीले भन्नुभयो, “भारत र चीनजस्ता ठूला देशहरूले खेलकुदलाई विशेष प्राथमिकतामा राख्दै आर्थिक सुदृढीकरणको माध्यमका रूपमा अघि बढाएका छन् ।” उहाँले नेपालले पनि खेलकुदलाई योजनाबद्ध रूपमा विकास गर्न सके आर्थिक, सामाजिक र कूटनीतिक रूपमा समेत लाभ लिन सक्ने बताउनुभयो ।
नेपाली खेलकुदको आधार बलियो बनाउन सबै सरोकारवाला पक्षको साझा दायित्व रहेको उल्लेख गर्दै कुलपति तिवारीले गण्डकी विश्वविद्यालयले खेलकुदसम्बन्धी अध्ययन र अध्यापनलाई प्राथमिकताका साथ अघि बढाउँदै आएको जानकारी दिनुभयो । यसबाट खेलकुद क्षेत्रमा आबद्ध युवापुस्ता लाभान्वित हुने र पेशागत खेलकुद विकासमा सहयोग पुग्ने उहाँको विश्वास छ ।
हिसान कास्कीका अध्यक्ष दीवाकार जैशीले १८औँ स्पोर्टस् मिटमा हिसानमा आबद्ध ८० शैक्षिक संस्थाका करिब चार हजार विद्यार्थी सहभागी रहेको जानकारी दिनुभयो । उहाँले खेलकुदले विद्यार्थीको शारीरिक विकाससँगै अनुशासन, नेतृत्व र टीमवर्कको भावना विकास गर्ने भएकाले शैक्षिक संस्थाले यसलाई विशेष महत्व दिनुपर्ने धारणा व्यक्त गर्नुभयो ।
कार्यक्रममा सहभागी वक्ताहरूले अन्तरराष्ट्रिय स्तरमा सफलता हासिल गर्ने खेलाडीलाई सम्मान र प्रोत्साहन गर्ने संस्कृतिले अन्य युवालाई पनि खेलकुदप्रति आकर्षित गर्ने विश्वास व्यक्त गरेका छन् । वल्र्ड पावर लिफ्टिङ च्याम्पियन शर्मिला शाहको सफलताले नेपाली खेलकुदको सम्भावना र क्षमतालाई विश्वसामु पुनः स्थापित गरेको उनीहरूको भनाइ थियो ।
समग्रमा, शर्मिला शाहको सम्मान कार्यक्रम केवल व्यक्तिगत उपलब्धिको कदर मात्र नभई नेपाली खेलकुद क्षेत्रको आत्मविश्वास बढाउने प्रेरणादायी अवसरका रूपमा हेरिएको छ ।
प्रतिक्रिया दिनुहोस्