सिटीपोष्ट
काठमाडौँ, ४ पुस । नेपाल कम्युनिष्ट पार्टी (एमाले) को ११औँ राष्ट्रिय महाधिवेशन नयाँ नेतृत्व चयन र समसामयिक राजनीतिक प्रस्ताव पारित गर्दै बिहीबार औपचारिक रूपमा सम्पन्न भएको छ । पार्टीको भावी राजनीतिक दिशा, संगठनात्मक संरचना र नेतृत्व चयनका दृष्टिले महत्त्वपूर्ण मानिएको यो महाधिवेशनले एमालेको आगामी यात्रालाई स्पष्ट रूपरेखा प्रदान गरेको छ ।
भक्तपुरको सल्लाघारीमा गत मङ्सिर २७ गते भव्य रूपमा उद्घाटन भएको महाधिवेशन मङ्सिर २८ गतेदेखि काठमाडौँको भृकुटीमण्डपमा बन्दसत्रका रूपमा अघि बढेको थियो ।
विभिन्न चरणमा सम्पन्न बन्दसत्रमा पार्टीको राजनीतिक प्रतिवेदन, सांगठनिक प्रतिवेदन, विधान संशोधन तथा समसामयिक प्रस्तावहरूमाथि व्यापक छलफल र निर्णय गरिएको थियो । आज अन्तिम मतपरिणाम सार्वजनिक भएसँगै महाधिवेशनको औपचारिक समापन गरिएको हो ।
पार्टी केन्द्रीय निर्वाचन आयोगका अध्यक्ष डा विजय सुब्बाले अन्तिम मतपरिणाम घोषणा गर्नुभएको थियो । घोषित परिणामअनुसार केपी शर्मा ओलीको नेतृत्वमा ३०१ सदस्यीय केन्द्रीय कमिटी निर्वाचित भएको छ ।
साथै, पार्टीका केन्द्रीय अनुशासन आयोग र केन्द्रीय लेखा आयोगमा पनि समान रूपमा २५–२५ सदस्यीय नेतृत्व र सदस्यहरू निर्वाचित भएका छन् । यी संरचनाहरूले पार्टीको संगठनात्मक अनुशासन, आर्थिक पारदर्शिता र आन्तरिक सुशासनलाई थप सुदृढ बनाउने अपेक्षा गरिएको छ ।
महाधिवेशनमा अध्यक्ष पदका लागि निवर्तमान वरिष्ठ उपाध्यक्ष ईश्वर पोखरेल र केपी शर्मा ओलीबीच प्रतिस्पर्धा भएको थियो । प्रतिस्पर्धात्मक र लोकतान्त्रिक प्रक्रियामार्फत अध्यक्षमा केपी शर्मा ओली निर्वाचित हुनुभएको हो । निर्वाचन प्रक्रिया पार्टी विधान र स्थापित विधिअनुसार शान्तिपूर्ण तथा व्यवस्थित रूपमा सम्पन्न भएको पार्टीले जनाएको छ ।
अन्तिम मतपरिणाम घोषणापछि नवनिर्वाचित नेतृत्वले सपथ ग्रहण गरेको छ । केन्द्रीय निर्वाचन आयोगका अध्यक्ष डा विजय सुब्बासमक्ष पार्टी अध्यक्ष केपी शर्मा ओलीले पद तथा गोपनीयताको सपथ लिनुभयो । त्यसपछि अध्यक्ष ओलीले पार्टीका अन्य पदाधिकारी तथा केन्द्रीय कमिटीका सदस्यहरूलाई सपथ गराउनुभयो । सपथ समारोहले नयाँ नेतृत्वलाई औपचारिक रूपमा जिम्मेवारी हस्तान्तरण गरेको संकेत गरेको छ ।
महाधिवेशनका क्रममा पार्टीभित्र वैचारिक बहस, संगठन सुदृढीकरण, आन्तरिक लोकतन्त्र र समसामयिक राजनीतिक चुनौतीहरूबारे गहन छलफल भएको थियो । पारित राजनीतिक प्रस्तावले राष्ट्रिय राजनीति, सुशासन, सामाजिक न्याय, आर्थिक विकास र समाजवाद उन्मुख नीतिलाई केन्द्रमा राख्दै पार्टीको आगामी कार्यदिशा तय गरेको छ । साथै, संगठनलाई थप अनुशासित, जनमुखी र प्रभावकारी बनाउने प्रतिबद्धता पनि प्रस्तावमार्फत व्यक्त गरिएको छ ।
महाधिवेशनमा देशभरबाट आएका प्रतिनिधि, पर्यवेक्षक र कार्यकर्ताहरूको सक्रिय सहभागिता रहेको थियो । उनीहरूले पार्टी नेतृत्व चयनसँगै नीति, कार्यक्रम र संगठनात्मक विषयमा आ–आफ्नो धारणा राखेका थिए । नेतृत्व चयनपछि पार्टीभित्र एकता, सहकार्य र सामूहिक प्रयासमार्फत अघि बढ्ने सन्देश प्रवाह भएको छ ।
महाधिवेशनको समापनसँगै एमालेले नयाँ नेतृत्व, स्पष्ट राजनीतिक कार्यदिशा र सुदृढ संगठनात्मक संरचनासहित आगामी राजनीतिक यात्राको सुरुआत गरेको छ । नवनिर्वाचित नेतृत्वले पार्टीको ऐतिहासिक भूमिका, जनअपेक्षा र वर्तमान चुनौतीलाई ध्यानमा राख्दै देशको समग्र विकास र लोकतान्त्रिक अभ्यासलाई सुदृढ बनाउने दिशामा काम गर्ने विश्वास व्यक्त गरिएको छ ।
यसैगरी, महाधिवेशनको समापनमा मन्तव्य दिँदै अध्यक्ष ओलीले एमाले नेतृत्वमाथि भौतिक हमला हुन सक्ने खतरा बढिरहेको बताउनुभएको छ । नेतृत्वमाथि भौतिक हमला भएको दिन देश ठप्प हुनुपर्ने र वर्तमान सरकार ढल्नुपर्ने चेतावनी पनि उहाँले दिनुभएको छ ।
’एमाले नेतृत्वमाथि मिडिया ट्रायल भइरहेको छ । अहिलेसम्म मिडिया प्रचार भयो, अब भौतिक हमला हुनसक्छ । पञ्चायतकालमा जस्तै जालसाजीका मुद्दामामिला चलाइन सक्छ,’ उहाँले भन्नुभयो ।
’एमाले नेतृत्वमाथि भौतिक हमला हुने सम्भावना पनि छ । भौतिक हमला भएको दिन यो देश ठप्प हुनुपर्छ । यो सरकार पनि ढल्नुपर्छ । त्यसका निम्ति तयार रहन निर्देशन दिन्छु,’ उहाँले भन्नुभयो ।
प्रतिक्रिया दिनुहोस्