सिटीपोष्ट
काठमाडौँ, २२ मंसिर । आगामी पुस १० गते रिलिज हुन लागेको मनोवैज्ञानिक थ्रिलर फिल्म ‘द ब्ल्यू लाइट’ ले नयाँ पोस्टर सार्वजनिक गर्दै दर्शकमाझ व्यापक चर्चा बटुलेको छ । स्काइफल पिक्चर्सले निर्माण गरेको उक्त फिल्मको पोस्टरले मुख्य अभिनेत्री बेनिशा हमालका तीन विभिन्न मनोदशा उजागर गरेको छ, जसले कथावस्तुमा मनोवैज्ञानिक जटिलताको संकेत दिन्छ ।
सार्वजनिक पोस्टरमा बेनिशालाई सबैभन्दा ठूलो फ्रेममा प्रसन्न र आशावादी मुद्रामा प्रस्तुत गरिएको छ । उनको अनुहारमा देखिने चमक र विश्वस्त भावले चरित्रले कुनै सकरात्मक यात्रा आरम्भ गरिरहेजस्तो अनुभूति दिन्छ । यही ठूलो आकृतिले फिल्मको भावनात्मक केन्द्रमा उनी नै प्रमुख पात्रका रूपमा उभिएको स्पष्ट पार्छ ।
यसभन्दा विपरीत, पोस्टरको अर्को लुकमा बेनिशा पूर्णतः भिन्न रूपमा देखिन्छिन हातमा चुरोट लिएर गम्भीर र निराश मुद्रा बनाइरहेकी उनको नजरमा बोझ, विफलता वा मानसिक द्वन्द्व कुनै एकको झल्को देखिन्छ । हातका पाँचै औलामा लगाइएका औंठी, र एउटै औलामा दुई वटा औंठीको प्रयोगले उनका चरित्रगत रहस्य तथा मनोवैज्ञानिक जटिलता झनै गाढा बनाइदिन्छ । यस दृश्यले उनको पात्र भावनाको चरम उतारचढावसँग जुध्दै गएको कथा संकेत गर्छ ।
तेस्रो तस्बिरमा बेनिशा अभिनेता महेश त्रिपाठीसँग टेबलमा आमनेसामने बसेकी छिन् । दुवैबीचको संवाद वा द्वन्द्वले कथामा महत्वपूर्ण घुम्ती ल्याउने अनुमान लगाउन सकिन्छ । महेश त्रिपाठीको उपस्थिति स्वयंमा गम्भीरता र रहस्य बोकेको हुन्छ, जसले फिल्मको मनोवैज्ञानिक गहिराइलाई थप सशक्त बनाउने बताइएको छ ।
पोस्टरमा समावेश अर्काे दृश्यमा बाल कलाकार ग्रिस्मा कटुवाललाई आँखाभरि आँसु लिएर रुँदै देखाइएको छ । उनको भावनात्मक अभिव्यक्तिले कथामा परिवार, सम्बन्ध वा बालमनोविज्ञानसँग जोडिएको संवेदनशील पाटो पनि रहने संकेत गर्छ । ग्रिस्माले व्यक्त गरेको वेदनाले फिल्ममा गहिरो मानवीय सन्दर्भ जोडिने अपेक्षा गरिएको छ ।
पोस्टरभरि प्रयोग गरिएको निलो प्रकाशले चलचित्रको नाम ‘द ब्ल्यू लाइट’सँग मेल राख्दै कथाको टोन अलि रहस्यमय, भावनात्मक र मनोवैज्ञानिक—स्थापित गर्न मद्दत गरेको छ ।
बलिराम चौहान निर्देशित यस फिल्ममा नेपाली चलचित्र क्षेत्रका चर्चित अनुहारहरू बेनिशा हमाल, अर्पण थापा, आयुसमान देशराज जोशी, सृष्टि श्रेष्ठ, महेश त्रिपाठी, सुरक्षा इटानी तथा बाल कलाकार ग्रिस्मा कटुवाल र सहारा शर्मा अभिनयमा रहेका छन् । कलाकारहरूको वजनदार उपस्थितिले फिल्मलाई अपेक्षाकृत बलियो बनाएको छ ।
फिल्ममा नरेन्द्र मैनालीले छायांकन गरेका छन्, जसको सिनेमाटोग्राफी मनोवैज्ञानिक विधाका फिल्महरूमा निकै प्रभावशाली हुने विश्वास व्यक्त गरिएको छ । रमन ग्रे सह–निर्माता रहेको यो चलचित्रमा आकाश उखेडा मुख्य सहायक निर्देशक छन् भने रेलिजा श्रेष्ठले प्रोडक्सन डिजाइन संभालेकी छिन् । निर्माण नियन्त्रकको भूमिकामा दिलीप पन्त छन् ।
द ब्ल्यू लाइटलाई मनोवैज्ञानिक थ्रिलर जनरामा तयार गरिएको बताइएका कारण दर्शकमा फिल्मप्रति विशेष उत्सुकता देखिएको छ । पोस्टरले दिएको संकेतअनुसार, भावनात्मक द्वन्द्व, रहस्य, मनोवैज्ञानिक उल्झन र पात्रको आन्तरिक संघर्षलाई रोचक ढंगले प्रस्तुत गर्ने अपेक्षा गरिएको छ । पुस १० गते प्रदर्शनमा आउने यो फिल्मले नेपाली मनोवैज्ञानिक थ्रिलरको जगमा नयाँ मानक स्थापित गर्न सक्ने अनुमान चलचित्रकर्मीहरूले व्यक्त गर्दै आएका छन् ।
प्रतिक्रिया दिनुहोस्