सिटीपोष्ट
काठमाडौँ, १९ मंसिर । राजधानीमा जारी दोस्रो संस्करणको नेपाल प्रिमियर लिग (एनपिएल) क्रिकेट प्रतियोगितामा काठमाडौँ गोर्खाजले उत्कृष्ट प्रदर्शन गर्दै प्लेअफमा स्थान सुनिश्चित गरेको छ । यसअघि सुदूरपश्चिम रोयल्सले पहिलो टोलीका रूपमा प्लेअफ यात्रा तय गरेको थियो भने काठमाडौँ दोस्रो टोलीका रूपमा अन्तिम चारमा प्रवेश गर्न सफल भएको हो । बिहीबार कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट रङ्गशालामा भएको रोमाञ्चक खेलमा काठमाडौँले पोखरा एभेन्जर्सलाई १३ रनले पराजित गर्दै महत्वपूर्ण जित हात पारेको हो ।
यो खेल काठमाडौँका लागि अत्यन्तै निर्णायक मानिएको थियो । टस हारेर पहिला ब्याटिङ गरेको काठमाडौँले निर्धारित २० ओभरमा आठ विकेटको क्षतिमा १६५ रनको प्रतिस्पर्धात्मक योगफल तयार ग¥यो । शुरुआती चरणमा केही विकेट गुमाए पनि विदेशी खेलाडी बेन चाल्र्सवर्थ र नेपाली युवा ब्याट्सम्यान भीम सार्कीको सानदार साझेदारीले काठमाडौँलाई उकास्यो ।
बेनले ६४ रनको उत्कृष्ट इनिङ खेले भने भीम सार्कीले ५५ रन बनाए । दुवैले संयमित र आक्रामक दुवै प्रकारका स्ट्रोक प्रदर्शन गर्दै टोलीलाई सम्मानजनक स्कोरसम्म पु¥याए । पोखरा एभेन्जर्सका लागि धनञ्जय लक्षन बलिङतर्फ प्रभावकारी बने । उनले चार महत्वपूर्ण विकेट हात पार्दै काठमाडौँको स्कोर रोक्न प्रयास गरे भने कप्तान कुशल भुर्तेलले दुई विकेट लिए । तर अन्य बलरले इच्छित लाइन–लेंथ कायम राख्न नसक्दा काठमाडौँले मध्यम दर्जाको लक्ष्य राख्न सफल भयो ।
१६६ रनको लक्ष्य पछ्याउन मैदान उत्रिएको पोखराको सुरुवात सामान्य रह्यो । ओपनरहरू चाँडै आउट भएपछि टोली दबाबमा परेको थियो । तर मध्यक्रममा आएका ऋषि धवनले उत्कृष्ट ५४ रन बनाएर खेललाई रोचक बनाउने प्रयास गरे । उनको उत्कृष्ट ब्याटिङले एकछिन पोखरा खेलमा फर्कने सम्भावना देखिएको थियो । तर अन्य व्याट्सम्यानले आवश्यक समर्थन नदिँदा पोखरा निर्धारित २० ओभरमै १५२ रनमा सबै विकेट गुमाएर अलआउट भयो ।
काठमाडौँका बलरहरूले योजनाबद्ध ढंगले बलिङ गरे । विशेषगरी शाहब आलम पोखराका ब्याट्सम्यानका लागि चुनौती साबित भए । उनले एकै ओभरमा ह्याट्रिकसहित कुल छ विकेट हात पारे । आलमको यो घातक बलिङ प्रदर्शनले खेलको नै रुख बदलिदियो । पोखराले बलियो साझेदारी बनाउने प्रत्येक अवसरमा आलमले विकेट लिँदै पोखरालाई दबाबमा राखिरहे। उनको प्रदर्शन आजको खेलको सबैभन्दा चर्चित पक्ष बन्यो ।
काठमाडौँको समग्र खेल अवलोकन गर्दा, बलिङ र ब्याटिङ दुबै विभाग सन्तुलित देखियो । प्रारम्भिक चरणमा केही कमजोरी देखिए पनि मध्यक्रमले इनिङ सम्हाल्यो र अन्त्यतिर तीब्र रन जोड्दै टोलीलाई प्रतिस्पर्धी स्कोरसम्म पु¥यायो । बलिङमा शाहब आलमको उत्कृष्ट योगदानका कारण काठमाडौँले लक्ष्य सफलतापूर्वक जोगायो । यस जितसँगै काठमाडौँले पाँच खेलमा १० अङ्क जोड्दै प्लेअफ टिकट सुरक्षित ग¥यो ।
उता पोखरा एभेन्जर्सका लागि भने टोलीको यात्रा अझ चुनौतीपूर्ण भएको छ । छ खेलबाट जम्मा चार अङ्कसहित पोखराले अब एक खेल मात्र खेल्न बाँकी छ । प्लेअफमा पुग्न उसले आगामी खेल अनिवार्य जित्नुका साथै अन्य खेलहरूको नतिजामा पनि भर पर्नुपर्नेछ । ऋषि धवनको उत्कृष्ट ब्याटिङ र धनञ्जय लक्षनको प्रभावकारी बलिङका बाबजुद टोली सामूहिक रूपमा राम्रो प्रदर्शन गर्न नसक्दा लक्ष्य नजिकै पुगेर पनि हार व्यहोर्नुप¥यो ।
एनपिएलको दोस्रो संस्करण थप प्रतिस्पर्धात्मक बन्दै गएको छ । प्रत्येक खेल रोमाञ्चक बन्न थालेका छन् र टिमहरूको प्लेअफ यात्रा निकै उतार–चढावपूर्ण देखिन्छ । काठमाडौँ गोर्खाजका लागि आजको जित आत्मविश्वास बढाउने मात्र नभई उपाधि यात्रातर्फ अघि बढेको बलियो संकेत पनि हो । अहिले उनीहरूको ध्यान आगामी खेलहरूमा समान लय कायम राख्दै अन्तिम चरणसम्म आफूलाई मजबुत दावेदारका रूपमा स्थापित गर्नमा केन्द्रित हुनेछ ।
प्रतिक्रिया दिनुहोस्