सिटीपोष्ट
काठमाडौं, १० मंसिर । सिटिजन्स बैंक इन्टरनेशनल लिमिटेडले डिजिटल बैंकिङको दायरा विस्तार गर्दै ‘सिटिजन्स डीजीबैंक’ नामक पूर्ण एकीकृत अनलाइन प्लेटफर्म सार्वजनिक गरेको छ । बैंकका बिखण्डित डिजिटल सेवाहरूलाई एउटै च्यानलमा समेटेर ग्राहकलाई वेब तथा मोबाइलमार्फत सहज, छिटो र अन्तरक्रियात्मक सेवा उपलब्ध गराउने उद्देश्यले यो प्रणाली लागू गरिएको बैंकले जनाएको छ ।
सिटिजन्स डीजीबैंकलाई बैंकको आधिकारिक वेबसाइट र सिटिजन्स स्मार्ट मोबाइल एप मार्फत प्रयोग गर्न सकिनेछ । पहिलो चरणमा, ५० प्रकारका डिजिटल सेवा यस प्लेटफर्ममा उपलब्ध छन्। अनलाइन खाता खोल्ने, पान तथा राष्ट्रिय परिचयपत्र अद्यावधिक, लकर आवेदन, टिडियस सर्टिफिकेट माग, डिम्याट तथा कार्ड सम्बन्धी सेवा, मोबाइल बैंकिङ तथा विभिन्न अपडेट सेवाहरू यसमा समावेश गरिएका छन्।
बैंकका अनुसार आधुनिक प्रविधिमा आधारित यो प्लेटफर्मले ग्राहकलाई ‘वन–स्टप डिजिटल बैंकिङ’ अनुभव दिलाउनेछ । आगामी दिनमा थप सेवा समावेश गर्दै प्रणालीलाई अझ व्यापक र सशक्त बनाइने योजनासमेत बैंकले अघि सारेको छ ।
सिटिजन्स बैंकले हालै युवा केन्द्रित ‘सिटिजन्स जेन–जी सेभिङ्ग अकाउन्ट’ सञ्चालनमा ल्याएको थियो । यसअघि बैंकले फोनपे सँग सहकार्य गर्दै नेपालमै पहिलोपटक ‘सिटिजन्स फोनपे क्रेडिट कार्ड’ भर्चुअल क्रेडिट कार्ड सार्वजनिक गरिसकेको छ ।
त्यस्तै, फ्रिलान्सरहरूका लागि विशेष ‘फ्रिलान्सर सेभिङ्स अकाउन्ट’ सञ्चालन गर्दै आयस्रोत विविधिकरण गर्ने वर्गलाई लक्षित सेवा विस्तार गरेको छ
बैंकले मोबाइल बैंकिङ एपबाटै शेयर आवेदन र सिआरएन नम्बर प्राप्त गर्न सकिने सुविधा पनि पहिलोपटक नेपालमा लागू गरेको छ । साथै, क्रस बैंक टेलर सेवा मार्फत अन्य बैंकका ग्राहकले सिटिजन्स बैंकका शाखाबाट टेलर क्यूआर स्क्यान गरी नगद निकाल्न सक्ने व्यवस्था गरिएको छ, जुन नेपालमा नै नयाँ प्रयोग मानिन्छ ।
सिटिजन्स बैंकले ६१ जिल्लामा २०० शाखा, १६९ एटीएम, ३ विस्तारित काउन्टर र ४२ शाखारहित बैंकिङ इकाइमार्फत १९ लाख ५४ हजार ग्राहकलाई सेवा प्रदान गर्दै आएको छ । बैंकले भौतिक तथा डिजिटल सेवा दुबै विस्तार गर्दै समग्र बैंकिङ पहुँचलाई अझ आधुनिक र विश्वसनीय बनाउने लक्ष्य अघि सारेको छ ।
बैंकको पछिल्लो डिजिटल अभियान ‘सिटिजन्स डीजीबैंक’ एकीकृत, सुरक्षित र प्रयोगमैत्री डिजिटल बैंकिङतर्फको महत्वपूर्ण कदमका रूपमा रहेको बैंकको दाबी छ ।
प्रतिक्रिया दिनुहोस्