काठमाडौं, १० मंसिर । नेपाल प्रिमियर लिग (एनपिएल) मा काठमाडौं गोर्खाजले दोस्रो जित हात पारेको छ । काठमाडौंले मंगलबार लुम्बिनी लायन्सलाई २२ रनले हराएको छ । काठमाडौंको जितमा कप्तान करण केसीको बिष्फोटक ब्याटिङ प्रमुख बन्यो । लुम्बिनीको यो लगातार दोस्रो हार हो ।
१ सय ५८ रनको लक्ष्य पछ्याएको लुम्बिनी १९.१ ओभरमा आल आउट हुँदै १ सय ३५ रनमा रोकियो । लुम्बिनीले सुरुवात कमजोर गर्यो। लुम्बिनी पनि पावर प्लेमा चुक्यो । टोलले ६ ओभरको समाप्तिमा ३ विकेट गुमाएर ४९ रन बनायो । मिलिन्द कुमारले लुम्बिनीका २ ओपनरलाई आउट गरे ।
७ रन बनाएका सन्दीप जोरा रसिद खानद्वारा क्याच आउट भए । ११ बल खेल्दै ३ चौका र १ छक्का सहित २२ रन जोडेका डार्सी सर्ट २२ रनमा आउट भए । २ विकेटको नोक्सानीमा लुम्बिनीले ३३ रन बानएको थियो ।
त्यसपछि टेष्ट राष्ट्रका खेलाडी गुलबद्दीन नाइब यो खेलमा पनि क्रिजमा टिक्न सकेनन् । उनी ६ बलमा ११ रन जोडेर साहब अलामको बलमा जेरार्ड इरासमद्वारा समातिए ।
त्यसपछि आठौं ओभरमा इरासमसले कप्तान रोहित पौडेलको विकेट लिए । ११ रन बनाएका रोहित एलबिडब्लु धरापमा परे । ४ विकेटको नोक्सानीमा लुम्बिनीले ५८ रन मात्र जोड्दा दबाबमा आएको थियो ।
८ ओभरको समाप्तिमा ६४ रन जोडेको लुम्बिनीलाई एउटा राम्रो साझेदारी जरुरी थियो । जिम्मेवारीका साथ ब्याटिङ गर्नुपर्ने थियो । तर ११ औं ओभरमा सन्तोष यादवले जेजे स्मिथलाई ८ रनमा आउट गरे ।
त्यही ओभरमा सुमित महर्जन रनको खाता नखोली रन आउट भए । ७२ रनको स्थितिमा ६ विकेट गुमायो । लगतै १२ ओभरमा रुबेन ट्रम्पलम्यान ५ रनमा सातौं विकेटको रूपमा पबिलियन फर्किए । त्यतिखेल लुम्बिनीलाई ४९ बलमा ७९ रन जोड्नु थियो। खेलमा काठमाडौं हाबी बन्यो ।
त्यसपछि ३३ बल खेलेर १ चौका र १ छक्का सहित २५ रन बनाएर दीलिप नाथ करणको बलमा साहाबद्वारा क्याच आउट भए । टोलीले १ सय ४ रन जोड्दा ८ विकेट गुमायो । १७ औं ओभरमा शेर मल्लले ३ छक्का प्रहार गर्दा यो ओभरमा लुम्बिनीले २० रन जोड्यो ।
जितको लागि अन्तिम १८ बलमा ३३ रन जरूरी हुँदा १८ औं ओभरको पहिलो बलमा सेर रन आउट भए । उनले १७ बलमा २६ रन बनाए । टिमको लागि यो नै व्यक्तिगत उच्च स्कोर बन्यो । १० औं विकेटको रुपमा अविशेष गौतम ४ रनमा रसिदद्वारा आउट भए ।
बलिङमा मिलिन्द र इरासमसले समान २ विकेट लिए । करण, रसिद, साहब र सन्तोषले समान १ विकेट झारे ।
त्यसअघि टियु क्रिकेट स्टेडियममा लुम्बिनीका कप्तान रोहितले टस जितेर पहिले ब्याटिङ रोजे । पहिले ब्याटिङ गरेको काठमाडौंले २० ओभरमा ८ विकेट गुमाउँदै १ सय ५७ रन बनायो । जारी सिजन काठमाडौंले बनाएको यो उच्च योगफल हो ।
काठमाडौंले यो खेलमा पनि पावर प्लेको सदुपयोग गर्न सकन् । पहिलो पावर प्लेमा २ विकेट गुमाउँदै मात्र ४२ रन बनायो । ओपनर बेन चाल्सवर्थ सामना गरेको पहिलो बलमा रनको खाता नखोली आउट भए । शेरले बेनलाई आउट गर्दा काठमाडौंले १ रन बनाएको थियो ।
वान डाउनमा क्रिजमा गएका रसिद खान पाँचौं ओभरमा रुबेन ट्रम्पलम्यानको बलमा सन्दीप जोराद्वारा क्याच आउट भए । २८ रनको स्थितिमा दुई विकेट गुमाएको काठमाडौंले कमजोर सुरूवात गर्यो ।
रन जोड्न संघर्ष गरेको काठमाडौंले पहिलो पावर प्लेपछिको चार ओभरमा १४ रन मात्र बनाउन सक्यो । १० ओभर सकिंदा काठमाडौंले ५६ रन मात्र बनाएको थियो ।
ओपनर आकाश त्रिपाठी खराब सट खेल्दै आउट भए। सेर मल्लको बलमा रिभर्स स्विफ्ट खेलेका उनको बल सिधै डार्सी सर्टको हातमा पर्यो । आकाश ३६ बलमा ३ चौका सहित ३२ रन जोडेर आउट भए । तेस्रो विकेट गुमाउँदा काठमाडौंले ५९ रन मात्र जोड्न सक्यो ।
१२ औं ओभरमा लुम्बिनी कप्तान रोहित बलिङमा आए । पहिलो बलमा जोन सिम्पसनले छक्का प्रहार गरे । तर दोस्रो बलमा रोहितले सिम्पसनलाई कट एन्ड बोल्ड गरे ।
त्यही ओभरको अन्तिम बलमा १७ रन बनाएका मिलिन्द कुमार आउट भए । सेर मल्लले उत्कृष्ट वान ह्यान्डेड क्याच लिए । १२ ओभरको समाप्तिमा काठमाडौंले ५ विकेटको क्षतिमा ७३ रन बनाएर संघर्ष गर्यो ।
यसपछि सन्तोष यादव र जेरार्ड इरासमसले छैटौं विकेटको लागि ३६ रनको साझेदारी गरेपछि सन्तोष रुबेनको बलमा सेर मल्लद्वारा क्याच आउट भए । उनले १६ बलमा २ छक्का सहित २६ रन बनाए । लगत्तै इरासमस पनि १७ रनमा गुल्बद्दीन नायबको बलमा आउट भए । इरासमस आउन हुँदा टिमले १ सय १७ रन बनाएको थियो ।
तर करणले १९ औं ओभरमा छक्काको बर्षात गरे । लुम्बिनीका रूबेनलाई निरिह बनाउँदै ४ छक्का प्रहार गरे । यो ओभरमा काठमाडौंले ३१ रन जोड्दै टिमको योगफललाई बढाए ।
यो ओभरमा करणले मात्र २८ रन बनाए । २० औं ओभरको पहिलो बलमा आदिल अलाम गुलबद्दीनको बलमा आउट भए । करणले बिष्फोटक ब्याटिङ गरे । ११ बलमा १ चौका र ४ छक्का सहित अविजित ३४ रन बनाए । बलिङमा रुबेन, सेर, गुलबद्दीन र रोहतले समान २ विकेट लिए ।
चौथो खेल खेलेको काठमाडौंको यो दोस्रो जित हो । उसले ४ अंक बनाएको छ । जनकपुरलाई ५ विकेटले हराउँदै विजयी सुरूवात गरेको काठमाडौले त्यसपछि भने लगातार दुई खेल हारेको थियो । सुदूरपश्चिम रोयल्ससँग २९ रनले र विराटनगर किंग्ससँग ५ विकेटले हार बेहोरेको थियो ।
लुम्बिनीको ३ खेलमा यो दोस्रो हार हो । पहिलो खेलमा चितवनलाई ६ विकेटले हराउँदै विजयी सुरुवात गर्न सफल रहेपनि लुम्बिनीले दोस्रो खेलमा कर्णाली याक्ससँग ९ विकेटको हार भोगेको थियो ।
३ खेलबाट लुम्बिनीले २ अंक बनाएको छ । बुधबार विराटनगर किंग्स र चितवन राइनोजबीच खेल हुनेछ ।
प्रतिक्रिया दिनुहोस्