फिल्म ‘जेरी अन टप’को पहिलो गीत सार्वजनिक

काठमाडौं, ७ असोज । आगामी असोज ३१ गतेबाट प्रदर्शनमा आउने फिल्म ‘जेरी अन टप’को पहिलो गीत ‘कस्तुरी’ सार्वजनिक गरिएको छ । बडादशैंको घटस्थापनाको अवसरमा पारेर सार्वजनिक गरिएको फिल्मको गीतमा जयन जे वाइवाको शब्द तथा संगीत र आशिष गुवाजु र सदिक्षा कट्टेलको स्वर छ ।

अनन्या फिल्मस्को ब्यानरमा निर्माण भएको फिल्मको सार्वजनिक गीतमा मुख्य कलाकार अनमोल केसी र आँचल शर्मा फिचर्ड छन् । मुस्ताङदेखि भारतको राजस्थानसम्मका विभिन्न रमणीय दृश्यहरू भिडियोमा कैद गरिएको छ । गीतको भिडियोमा अनमोल र आँचललाई रोमान्टिक लभ वर्डको रूपमा चित्रित गरिएको छ । उच्च मेकिङ र कलरफूल देखिने भिडियोमा कोरियोग्राफी किरण थापाको छ ।

सुयोग गुरुङको निर्देशनमा निर्माण भएको ‘जेरी अन टप’मा अनमोल र आँचलसहित जसीता गुरुङ, केदार घिमिरे (माग्नेबुढा), भुवन केसी, उषा खड्गीको अभिनय छ । अभिनेत्री सुरक्षा पन्तले यो फिल्ममा विशेष भुमिका निभाएकी छन् ।

सरोज न्यौपानेको प्रस्तुतिमा रोविन शेरचन, रामकृष्ण श्रेष्ठ र दीपक भण्डारीको लगानी रहेका फिल्मको कथा हेमराज बिसीको हो । अनुराधा गिरी र इश्वर श्रेष्ठ कार्यकारी निर्माता तथा एसोसिएट निर्मातामा नविन घिमिरे, विवेक थापा र भविष्य खड्का छन् । फिल्ममा कालिप्रसाद बास्कोटा, जयन जे वाइबा, जोहन चाम्लिङ राई र व्रिजेश श्रेष्ठको संगीत छ ।

सगरमाथा आरोहण र यात्राको क्रममा हुने प्रेमकथामा आधारित फिल्मको पटकथा तथा संवाद लेखन विस्वास तिम्सिना र छायांकन दुलिप रेग्मीको रहेको छ ।
हङकङको एलजी एसोसिएट्सले यो फिल्मको (अष्ट्रेलियाबाहेक) अन्तर्राष्ट्रिय प्रदर्शन अधिकार खरिद गरेको छ भने नेपालमा रीच इन्टरटेन्मेन्ट र एफडी कम्पनिले वितरण अधिकार लिएका छन् । महंगो लागतमा तयार यो फिल्मलाई यो वर्षको प्रतिक्षित फिल्म मानिएको छ ।