सिटीपोष्ट
सर्लाही(बलरा),२५ साउन । एम्बुलेन्स चालकको लापरबाहीले सडक दुर्घटनामा घाइतेको हुनुभएको एक महिलाको मृत्यु भएको छ । मृत्यु भएकी महिला बलरा नगरपालिका–११ वडाकी जननिर्वाचित दलित महिला सदस्य रहेको जनाइएको छ ।
साउन २३ गते दुर्घटनामा परेकी चन्दा देवी बैठालाई नगर अस्पतालमा प्रारम्भिक उपचारपछि प्रादेशिक अस्पताल मलंगवा रेफर गर्ने क्रममा ड्युटीमा रहेका एम्बुलेन्स चालक रामाशंकर महतोले एम्बुलेन्समा डिजल छैन भनेर गैरजिम्मेवार व्यवहार देखाउदा घाइते बैठाको निधन भएको हो ।
उक्त घटनाप्रति बलरा नगर प्रमुख रामाशंकर प्रसाद कुशवाहाले श्रद्धाञ्जली अर्पण गर्दै शोकसन्तप्त परिवारप्रति संवेदना व्यक्त गर्नुभएको छ । नगर प्रमुख कुशवाहाले मृतक बैठा जनप्रतिनिधि मात्र नभई समाजले नै न्याय र समानताको सशक्त आवाज गुमाएको उल्लेख गर्दै स्वास्थ्य सेवामा कुनै किसिमको लापरबाही स्वीकार नहुने बताउनु भएको छ ।
नगर प्रमुख कुशवाहाले एम्बुलेन्स चालकको यस्तो कार्य अक्षम्य रहेको भन्दै सम्बन्धित चालकलाई तत्काल कारबाही गर्न निर्देशन दिनुभएको छ । घटनाको सत्यतथ्य छानबिन गर्न वडाध्यक्ष बिरेन्द्र प्रसाद चौधरीको संयोजकत्वमा समिति गठन गरि ७ दिनभित्र प्रतिवेदन पेश गर्न निर्देशन दिनुभएको छ ।
नगर प्रमुख कुशवाहाले स्वास्थ्य सेवामा कुनै पनि बहानामा मानव जीवनप्रति लापरवाही स्वीकार्य नहुने स्पष्ट पार्दै, भविष्यमा यस्ता पीडादायी घटना दोहोरिन नदिन आधारभूत स्वास्थ्य सुविधा अझ व्यवस्थित र सबल बनाइने अठोट व्यक्त गर्नुभएको छ ।
नगर प्रमुख कुशवाहाको नेतृत्वमा प्राथमिक स्वास्थ्य केन्द्रलाई बलरा नगर अस्पतालमा स्तरोन्नति गर्दै पुरानो भवनको रेट्रोफिटिङ, आधुनिक सुविधा सम्पन्न दोस्रो तला निर्माण, लामो समयदेखि अवरुद्ध बर्थिङ सेन्टर पुनः सञ्चालन, ल्याब सेवाको डिजिटलाइजेशन, आकस्मिक उपचार कक्ष स्थापना, औषधि व्यवस्थापन सुदृढीकरण, थप ३ मेडिकल अधिकृत र १ एम्बुलेन्स चालक नियुक्ति गरि २४ सै घण्टा अस्पताल र एम्बुलेन्स सेवा उपलब्ध गराइएको छ ।
तर पनि अपेक्षित सुधार नदेखिएपछि करिब १० दिनअघि अस्पतालका ६०% कर्मचारी हेरफेर गरिएको र त्यसपछि सेवामा सुधार देखिन थालेको छ ।
प्रतिक्रिया दिनुहोस्