सिटीपोष्ट
काठमाडौं, १४ साउन । अखिल नेपाल टेबल टेनिस संघको आयोजनामा विश्व टिम टेबलटेनिस च्याम्पियनसिपका लागि दक्षिण एसियाली छनोट प्रतियोगिता आजदेखि सुरु हुने भएको छ ।
नेपालसहित भारत , श्रीलंका, माल्दिभ्स र बंगलादेशका खेलाडीको सहभागिता रहने प्रतियोगिता निर्देशक समेत रहेका आयोजक संघका महासचिव कुवेरप्रकाश सिंहले सोमबार पत्रकार सम्मेलन गरेर जानकारी गराउनु भएको हो ।
यसमा भारतबाट सर्वाधिक १० खेलाडीको सहभागीता रहनेछ ।
नेपालसहित अन्य देशबाट समान ८ खेलाडीले भाग लिने जनाइएको छ । नेपालबाट समान ४ महिला÷पुरुष खेलाडीले प्रतिस्पर्धा गर्ने छन् । नेपाली महिलामा वियंका राई, इभाना थापा, नविता श्रेष्ठ र योङगी पौडेल रहनु भएको छ भने पुरुषमा संयोग कपाली, रुविन महर्जन, राजीव चिकन्बञ्जार र गनन्जय दाहाल रहनुहुनेछन् ।
नेपाली टोलीको मुख्य प्रशिक्षकमा मोहनदास बासुकला तथा प्रशिक्षकमा सन्जिवकुमार ढुंगोल र सन्ध्या शाक्य हुनुहुन्छ । राउन्ड रोविन लिगका आधारमा हुने प्रतियोगितामा पहिलो हुने पुरुष÷महिला टोलीले विश्व टिम टेबलटेनिस च्याम्पियनसिपका लागि छनोट हुने छन् ।
विश्व टिम टेबलटेनिस च्याम्पियनसिप इङल्यान्डमा सन् २०२६ को सेप्टेम्बरमा हुने जनाइएको छ । छनोटमा पहिलो हुने राष्ट्र भारतको उडिसामा अक्टोबर ११ देखि १५ तारिखसम्म हुने एसियन टिम टेबलटेनिस च्याम्पियनसिपमा शीर्ष १२ स्थानमा रहन सफल भएको खण्डमा दक्षिण एसियाली छनोटमा दोश्रो हुने राष्ट्रले पनि इङल्यान्ड यात्राको अवसर पाउने छन् ।
आयोजक संघका अध्यक्ष वृजेन्द्रबहादुर हमालले यो प्रतियोगिता नेपाली टेबलटेनिसको ठूलो प्रतियोगिता मध्येको एक भएको बताउनु भयो । प्रतियोगिता सञ्चालन गर्न करिब ३५ लाख ४५ हजार खर्च हुने आयोजकले जनाएको छ । दुईदिने प्रतियोगिताका खेलहरु लैनचौरस्थित राष्ट्रिय टेबलटेनिस प्रशिक्षण केन्द्रमा हुनेछ ।
प्रतिक्रिया दिनुहोस्