काठमाडौँ, १६ असार । प्रतिनिधिसभाको वैठकले ‘सङ्घीय निजामती सेवा विधेयक २०८२’ पारित गरेको छ । आइतबार बसेको वैठकले निजामती सेवा विधेयक २०८२’ पारित गरेको हो । विधेयकमा सङ्घीय निजामति सेवाको गठन, सञ्चालन र सेवाका सर्त सम्बन्धमा व्यवस्था गरिएको छ ।
यसअघि वैठकमा सांसदहरु रेखा शर्मा, प्रेम सुवाल, प्रकाश ज्वाला, महेन्द्रबहादुर शाही, जनार्दन शर्मा, अमनलाल मोदी, रणेन्द्र बराइली, प्रभु साहलगायत सांसदले उक्त विधेयकमाथिको छलफलमा भाग लिएका थिए । बैठकमा सङ्घीय मामिला तथा सामान्य प्रशासनमन्त्री राजकुमार गुप्ताले उक्त विधेयक पारित गर्न सदनसमक्ष प्रस्तुत गरेका थिए ।
प्रतिनिधिसभाबाट पारित यो विधेयकले मुलुकमा सङ्घीयता लागू भएपछि झण्डै १० वर्षसम्म देखिएका प्रशासनिक चुनौतीहरूलाई चिर्नेछ । सङ्घीयतामा प्रशासनको उचित व्यवस्थापन भई संविधानको कार्यान्वयन प्रभावकारी रूपमा अघि बढ्ने अपेक्षा गरिएको छ ।
प्रतिनिधिसभाको राज्य व्यवस्था तथा सुशासन समितिले सङ्घीय निजामती विधेयकलाई लामो समयसम्म छलफल गरी सर्वसम्मतीले पारित गरेको थियो ।
बैठकमा सांसदहरूले सरकार संसदप्रति जवाफदेही हुनुपर्नेमा जोड दिएका छन । बैठकमा समय माग गरी नेपाल कम्युनिष्ट पार्टी (माओवादी केन्द्र)का सांसद अमनलाल मोदीले भने, “हामी सांसदहरूले सदनमा शून्य, विशेष समयमा जनताका सवाल उठाउने गछौँ, तर सरकारले संसद्मा उठेका विषयवस्तुको जवाफ दिएको छैन, मैले हुलाकी सडकको दूराअवस्थाको बारेमा सरकारको ध्यानाकर्षण गराएको थिएँ, तर सरकारले गम्भीरतापूर्वक लिएको छैन ।”
नेपाली कांग्रेसका सांसद डा चन्द्र भण्डारीले गुल्मीको रुरुबाट सदरमुकाम तम्घास जाने सडक नीतिगत निर्णय अभावका कारण निर्माण हुन नसकेको बताए ।
“उक्त सडक जोखिमपूर्ण छ । वर्षात्को समयमा पहाड खस्ने अवस्था छ, गुल्मीका विभिन्न ठाउँमा पुल निर्माण नहुँदा बाढीपहिराको समस्या बढिरहेको छ, यो बारेमा सरकारको ध्यानाकर्षण गराउछु”, उनले भने ।
नेपाल कम्युनिष्ट पार्टी (माओवादी केन्द्र)का सांसद रणेन्द्र बरालीले भने, “सिरहा जिल्लाका युवा अजय महरा हिजो बिहान मृत फेला परेका छन्, उनको हत्यारालाई पत्ता लगाउने काम सरकारको हो, अविलम्ब अनुसन्धान गरी हत्यारालाई कारबाहीको दायरामा ल्याउन म सरकारसमक्ष माग गर्दछु ।”
आम जनता पार्टीका सांसद प्रभु शाहले गौशलास्थित पशुपति क्षेत्रमा हुने गतिविधि पारदर्शी हुनुपर्ने माग गरे । नेपाल कम्युनिष्ट पार्टी (एकीकृत समाजवादी)का सांसद कृष्णकुमार श्रेष्ठले पूर्व–पश्चिम राजमार्गपस्थित पथलैयाबाट निजगढ जाने बाटोमा पर्ने दूदरा खोलामा करिब छ वर्षदेखि अलपत्र परेको पुल आजसम्म पनि बन्न नसक्दा जनताले सास्ती भोग्नु परेको भन्दै सरकारको ध्यानाकर्षण गराए ।
प्रतिनिधिसभाको अर्को वैठक असार २३ गते अपराह्न १ः०० बजे हुनेछ ।
सिटीपोष्ट
प्रतिक्रिया दिनुहोस्