फिल्म ‘परिवर्तन’मा बाँधियो सुशील र अञ्जनाको जोडी

काठमाडौं, २५ जेठ । फिल्म ‘परिवर्तन’मा सुशील र अञ्जनालाई जोडीको रुपमा देख्न सकिन्छ । अभिनेता सुशील श्रेष्ठ र अभिनेत्री अञ्जना बराइलीले पहिलो पटक सहकार्य गरेको फिल्म ‘परिवर्तन’को छायांकन सुरु भएको छ । शनिबार झापा चारआलीस्थित पाथीभरा मन्दिरमा विशेष पूजा(अर्चना गर्दै फिल्मको छायांकन थालिएको निर्माणपक्षले जानकारी दिएका छन् । मुहूर्त समारोहमा सुशील र अञ्जनाले पहिलो सट दिएका थिए । ४० दिनका सेड्युलमा फिल्मको झापा, विराटनगर र इलाममा छायांकन गरिनेछ ।

विजय केरुङको निर्देशनमा यो फिल्म बन्न लागेको हो । यस फिल्ममा सुशील र अञ्जनालाई मुख्य भूमिकामा देख्न सकिन्छ भने सुनिल थापा, बुद्धि तामाङ, करिश्मा मानन्धर, आशा पौडेल, सुवास मेचे, पुकार भट्टराई, आएशा कार्की, गौतम तिवारी, यमनाथ खरेल लगायत कलाकारको अभिनय देख्न सकिनेछ । फल्म ‘परिवर्तन’निर्माता दीपक सिवाकोटी रहेक छन् । फिल्ममा उनी स्वयंको कथा लेखन रहेको छ भने पटकथा तथा संवाद शिवम् अधिकारीको रहेको छ।

फिल्ममा छायाङ्कन निर्देशन शिव ढकालले गर्ने बताइएको छ । त्यसैगरी सम्पादन भूपेन्द्र अधिकारीले, द्वन्द्व निर्देशन श्री श्रेष्ठले, नृत्य निर्देशन कमल राईले र पोस्टर तथा पब्लिसिटी डिजाइन रोयल भीमसेन र ट्राइडेन्ट कन्सेप्टले गर्नेछन् । फिल्मले नेपालको सीमाना सुरक्षाको संवेदनशीलता, भ्रष्टाचारको जालो, र गरिब, दुःखी तथा असहाय जनताको पीडादायी यथार्थलाई उजागर गर्ने बताइएको छ ।