फिल्म ‘लाज शरणम् का निर्माता श्रेष्ठले ‘पाँच पाण्डव’ बनाउने

काठमाडौँ, २२ जेठ । फिल्म ‘लाज शरणम् का निर्माता नवीन श्रेष्ठले ‘पाँच पाण्डव’ निर्माण गर्ने भएको छ । निर्माता श्रेष्ठले आगामी चलचित्र ‘पाँच पाण्डव’ निर्माण गर्ने घोषणा गरेको हो । उक्त चलचित्रको पटकथा सुशील पौडेलले तयार गरिरहेको श्रेष्ठले बताए । वसन्त निरौलाले फिल्म ‘पाँच पाण्डव’ निर्देशन गर्ने भएका छन भने चलचित्र आगामी भदौ आसपासमा छायाङ्कन गर्ने तयारी रहेको श्रेष्ठले बताए ।

उनले ‘लाज शरणम् २’ नामक चलचित्र पनि निर्माणको तयारी भइरहेको जानकारी दिए । डिजिटल प्रविधिमा चलचित्र हुने समयमा ‘लाज शरणम्’ ले प्रदर्शनको सय दिनु पूरा गर्नुलाई अर्थपूर्ण रूपमा हेरिएको छ । चलचित्र ‘लाज शरणम्’ प्रदर्शनको १०० औँ दिन पुरा गरेको  छ । गत वर्षको फागुन १४ गते सार्वजनिक प्रदर्शन भएको उक्त चलचित्रले काठमाडौँको न्युरोडमा रहेको रञ्जना सिनेप्लेक्स चलचित्र भवनमा प्रदर्शनको एकसय दिन पूरा गरेको निर्माता नवीन श्रेष्ठले जानकारी दिए ।

उक्त चलचित्रमा सीताराम कट्टेल, विजय बराल, अर्पण थापा, महेश त्रिपाठी, मुकुन्द श्रेष्ठ, विजय लामा, रेणुनाथ योगी, सागर लम्साल, हरि निरौला, अर्जुन घिमिरे, कमलमणि नेपाल, प्रियाना आचार्य, दयाहाङ राई र बुद्धि तामाङलगायतले अभिनय गरेको छ ।