सिटीपोष्ट
काठमाडौँ, १५ वैशाख । जापानको ओसाकामा आयोजना भएको २१औं वाटा अन्तर्राष्ट्रिय तेक्वान्दो च्याम्पियनसिपमा नेपालले २ स्वर्ण पदक जितेको छ ।
नेपालका योगेशकुमार योगी र इन्जुमा राईले स्वर्ण पदक जितेका हुन् । योगेश १८ वर्षमाथिको पुम्से र इन्जुमाले महिला ५७ केजीमुनि तौल समूहमा स्वर्ण जितेका हुन् ।
आइतवार सम्पन्न च्याम्पियनसिपमा नेपालले ३ रजत र ६ कांस्य पदक पनि जित्यो । यस्तै सिनियर पुरुष ६८ केजीमुनि तौल समूहमा विमल रोकाय, महिला १२ देखि १४ वर्ष उमेर समूहको महिला पुम्सेमा खुसी गौतम र सिनियर महिला पुम्सेमा मलिका घुलुले रजत पदक जिते ।
त्यस्तै महिला ४२ केजीमुनि डोल्मा लामा, पुरुष ७४ केजीमुनि चन्द्रप्रसाद गौतम, ५४ केजीमुनि अंकित गौतम र जुनियर ग्योरोगीको पुरुष ३३ केजीमुनि वीरेन्द्र हुमागाईंले कांस्य पदक जिते । यस्तै ग्योरोगीको महिला २९ केजीमुनि र १२ देखि १४ वर्ष उमेर समूहको एकल पुम्सेमा खुसी जोशीले दोहोरो कांस्य पदक जितिन् ।
यस्तै,तेह्रौं दक्षिण एसियाली खेलकुद (साग) की स्वर्ण पदक विजेता सन्तोषी श्रेष्ठले म्याराथनमा राष्ट्रिय कीर्तिमान बनाएकी छिन् ।
लण्डन म्याराथनका दौरान आइतवार सन्तोषीले आफै कीर्तिमानलाई भंग गर्दै नयाँ कीर्तिमान बनाएकी हुन् ।
उनले ३ मिनेटमा ३६ सेकेन्डको समय सुधार गरेकी हुन् । लण्डनमा म्याराथन २ घन्टा ४२ मिनेट ५० सेकेन्डमा पूरा गरेकी हुन् । सन्तोषीले दुई वर्ष अघि बंगलादेशको बंगबन्धु म्याराथनमार्फत डेब्यू गर्ने क्रममा २ घन्टा ४६ मिनेट २६ सेकेन्डको समयका साथ राष्ट्रिय कीर्तिमान राखेकी थिइन् । नेपाल युके रनको पहलमा सन्तोषीले लण्डन म्याराथनमा भाग लिएकी हुन् ।
सन् २०१९ मा स्वदेशमा आयोजना भएको १३ औं सागमा स्वर्ण पदक जितेकी थिइन् । मध्यम दूरीबाट अन्तर्राष्ट्रिय यात्रा सुरु गरेकी सन्तोषीले १३ औं सागयता घरेलु मैदानमा सबै प्रतियोगितामा स्वर्ण पदक जित्दै आएकी छिन् ।
प्रतिक्रिया दिनुहोस्