पोखरा थन्डर्स नेपाल सुपर लिगको दोस्रो क्वालिफायरमा पुग्न सफल

काठमाडौं, ९ वैशाख । पोखरा थन्डर्स तेस्रो नेपाल सुपर लिग (एनएसएल) को दोस्रो क्वालिफायरमा पुग्न सफल भएको छ । सोमबार एफसी चितवनलाई निरिह तुल्याउँदै ३–० को हार चखाउन पोखरा सफल भयो । पोखराले चितवनसँग लिग चरणमा भोगेको हारको बदला समेत लिएको छ । पोखराको जितमा जो आइडोले दुई गोल गरे ।

पहिलो हाफ गोल रहित बराबरीमा सकियो। दोस्रो हाफमा १३ मिनेटभित्र पोखराले ३ गोल गर्दै चितवनलाई स्तब्ध बनायो । पहिलो पटक प्ले अफ पुगेको चितवनको यात्रा भने इलिमिनेटरमा नै टुङ्गियो ।

खेलको सातौं मिनेटमा पोखराले अग्रता बनाउने मौका गुमायो । आयुष घलानको पासमा जो आइडोले बक्सको एजबाट हानेको उत्कृष्ट प्रहारलाई चितवनका गोल किपर अमल नाइटले पन्च गर्दै बचाए । खेलको १७ औं मिनेटमा पोखराका सुदिल राईको पासमा जो आइडोको प्रहार पोष्ट नजिकैबाट बाहिरियो ।

२५ औं मिनेटमा भने चितवनले राम्रो मौका गुमायो। सुमित श्रेष्ठले बललाई उत्कृष्ट शैलीमा अगाडि बढाए । राम्रो विल्ड अप गरे । तर उनको प्रहार पोष्ट नजिकैबाट बाहिरियो। उनले बक्स भित्र रहेका आफ्नै टिमका खेलाडीलाई पास दिन कन्जुस्याइँ गरे ।

लगत्तै २८ औं मिनेटमा चितवनका भिक्टर मानसारेको सटिक पासमा टोरिक जेब्रिनले बक्स बाहिरबाट हानेको प्रहार पोखराका गोलकिपर गिल्याम प्रिसोले सानदार बचाउ गरे । पहिलो हाफमा दुवै टिमबाट गोल हुन सकेन ।

खेलको ६३ औं मिनेटमा पोखराले अग्रता बनायो । आयुष घलानको पासमा स्टेफन बिनोङको पावरफुल प्रहारलाई गोल किपर अमल नाइटले बचाए । रिबाउन्डमा समिर तामाङले हानेको क्रस चितवनका डिफेन्डर अभिषेक लिम्बुलाई डिफलेक्ट हुँदै गोलमा परिणत भयो । पोखराले १–० को अग्रता बनायो ।

७२ औं मिनेटमा पोखराले अग्रता दुगुना गर्यो । जो आइडोको प्रहार जोनाथन चितवनका जोनाथन क्याम्पबेललाई डिफलेक्ट भएर गोलमा परिणत भयो ।

त्यसको ३ मिनेटपछि चन्दन कुमार दासको पासमा बक्सभित्रबाट गोल गरे । उनको यो व्यक्तिगत दोस्रो गोल हो । ८४ औं मिनेटमा चितवनले गोल अन्तर कम गर्ने उत्कृष्ट मौका गुमायो । टोरिक जेब्रिनको पावरफुल सट पोखराका किपर प्रिसोले सानदार शैलीमा बचाए । रिबाउन्डमा मिलन राईले बल प्रहार गर्नुभन्दा अगाडि बल कलेक्ट पनि गरे ।

इन्ज्युरी समयको पहिलो मिनेटमा पोखराका सबस्टिच्युट नवयुग श्रेष्ठको प्रहारलाई किपर अमल नाइटले रोके । चितवन खेलमा फर्कन नसक्दा पोखराले ३–० को सहज जित दर्ज गर्यो ।

अब पोखराले दोस्रो क्वालिफायरमा धनगढी एफसीसँग बुधवार फाइनल प्रवेशको लागि खेल्नेछ । पहिलो क्वालिफायरमा धनगढीलाई २–१ ले हराउँदै ललितपुर सिटी एफसी अपराजित रहँदै फाइनलमा पुगिसकेको छ ।

एफसी चितवन ३ जित १ बराबरी र २ हारमा १० अंक सहित तेस्रो स्थानमा रहँदै प्ले अफमा पुगेको हो । पोखराले २ जित, २ बराबरी र २ हारको नतिजामा ८ अक जोड्दै गोल अन्तरमा काठमाडौं रेजर्सलाई पछि पार्दै प्ले अफमा पुगेको हो ।

यो सिजन पोखराले सुरूवाती दुई खेल गुमाएपनि उत्कृष्ट कमब्याककासाथ दोस्रो क्वालिफायर सम्मको यात्रा तय गरेको थियो । पोखरा गत सिजन अंक तालिकाको शीर्षस्थानमा रहँदै प्ले अफमा पुगेको थियो । जहाँ पहिलो र दोस्रो दुवै क्वालिफायर हार्दै फाइनलमा पुग्न असफल भएको थियो ।