काठमाडौँ, ९ वैशाख । शिक्षा, विज्ञान तथा प्रविधिमन्त्री विद्या भट्टराईले राजीनामा दिएकी छन । सोमबार प्रधानमन्त्री केपी शर्मा ओलीलाई भेटेर भट्टराई राजीनामा बुझाएको उनका प्रेस संयोजक रामजी लम्सालले जानकारी दिएका छन । विद्यालय शिक्षा ऐन जारी गर्नुपर्ने माग गर्दै शिक्षक आन्दोलनको २०औँ दिन भयो । यही बीचमा शिक्षा मन्त्रीले राजीनामा दिएकी छन ।
स्रोतका अनुसार, शिक्षामन्त्री भट्टराईले आफ्नो राजीनामापत्रमा स्वास्थ्यको कारण देखाएकी छिन् । शिक्षामन्त्री भट्टराई गत माघमा उनी बिरामी परेकी थिइन् । तर उपचारपछि निको भएको थियो ।
तर, शिक्षामन्त्री निकट स्रोत भने स्वास्थ्यमात्रै नभइ शिक्षक आन्दोलनका कारण परेको पछिल्लो दबाब पनि राजीनामाको कारण भएको बताउँछ । ‘मन्त्रीज्यूलाई प्रेसर ठूलो थियो,’ नाम उल्लेख नगर्ने शर्तमा मन्त्रालयका एक अधिकारी भन्छन्, ‘मन्त्रालयलाई शिक्षकको आन्दोलन सुल्झाउन कठिन भएको छ ।’मन्त्री भट्टराईले शिक्षकसँगको सहमतिका लागि ७ बुँदे प्रस्ताव समेत तयार पारेकी थिइन् ।
ईसीडीका शिक्षकको तलब १७ हजार ३०० बनाउने, सामाजिक सुरक्षा कोषको नयाँ प्याकेज बनाउने, दुर्गम भत्ता उपलब्ध गराउने, ग्रेड समायोजन, मर्यादा क्रम कायम गर्ने, हाललाई निजामती अस्पतालबाट शिक्षाको उपचारमा छुटको व्यवस्था लगायतका विषय उनको ७ बुँदामा तयार थिए ।
यसबारे मन्त्री भट्टराई आजैको मन्त्रिपरिषदमा लगेर शिक्षकको समस्या समाधान गर्नेगरी सोचेकी पनि थिइन् । यद्यपि, लगातारका दबाब थेग्न नसक्दा राजीनामा दिने अवस्थामा पुगेको मन्त्रालयका उनी निकट एक अधिकारीले दाबी गरे ।
तर मन्त्री भट्टराईले आफ्नो राजीनामाको अन्य कारण भने सार्वजनिक गरेकी छैनन् । भट्टराईले आफू निकटस्थहरूसँग केही दिनदेखि काम गर्न कठिन भएको गुनासो गरिरहेकी थिइन् ।
आन्दोलनरत नेपाल शिक्षक महासंघसँग मन्त्रीज्यूले ७ बुँदामा सहमतिको ड्राफ्ट तयार पारेकी थिइन, उनले आजै ती प्रस्ताव मन्त्रिपरिषदमा लैजाने तयारी पनि गरेकी थिइन ।
मन्त्री भट्टराईले प्रस्ताव गरेको ७ बुँदामा प्रारम्भिक बाल विकासका शिक्षकको तलब १७ हजार ३०० बनाउने, यस्ता शिक्षकहरूलाई सामाजिक सुरक्षा कोषको प्याकेज बनाउने र समावेश गर्ने, दुर्गम भत्ता उपलब्ध गराउने, ग्रेड समायोजन गर्ने, मर्यादाक्रम कायम गर्ने, हाललाई निजामती अस्पतालबाटै शिक्षकहरूको उपचारमा छुटको व्यवस्था गर्ने कुरा थिए ।
यो प्रस्ताव तयार पारेर शिक्षामन्त्री भट्टराईले अर्थमन्त्री विष्णुप्रसाद पौडेलसँग पनि कुराकानी गरेकी थिइन् । ‘यो प्रस्ताव मन्त्रिपरिषदमा लैजानुअघि उहाँले स्रोत सुनिश्चित गर्न अर्थमन्त्रीसँग पनि हिजो बेलुकी कुराकानी गर्नुभएको थियो,’ मन्त्री भट्टराईनिकट स्रोतले भन्यो, ‘तर अर्थमन्त्रीज्यूले ती प्रस्ताव कार्यान्वयन गर्न बजेट दिन नसक्ने भन्नुभयो । उहाँहरूबीच नोकझोक नै भयो।’
७ बुँदे प्रस्तावका लागि स्रोत सुनिश्चित गर्न सक्ने अवस्था नरहेको अर्थमन्त्री पौडेलको भनाइ थियो । ‘आफूले समस्या समाधानका लागि पहल गरे पनि सरकार र पार्टीबाट सहयोग नपाएको भनेर उहाँले राजीनामा दिनुभएको हो,’ मन्त्री भट्टराईनिकट स्रोत भन्छ, ‘काम गर्न रोक्ने हो भने किन सरकारमा बसिरहने?’
शिक्षकहरूले आफूलाई घेराबन्दी गरिरहेका बेला सरकार, अर्थमन्त्री, एमालेबाट साथ नमिलेको पनि निकटहरूसँग मन्त्री भट्टराईले गुनासो गर्दै आएकी थिइन् । उनले सोमबार बिहानैदेखि राजीनामाको मनस्थिति बनाएकी थिइन् ।
‘शिक्षकहरूले घेराबन्दी गरिरहेका छन्, यस्तो अवस्थामा समस्या समाधान गर्न सहयोग नगर्ने हो भने म राजीनामा दिन्छु भनेर उहाँले प्रधानमन्त्रीलाई भेटेर राजीनामा दिनुभएको हो,’ उनीनिकट स्रोतले भन्यो ।
एमालेका एक नेताले दिएको जानकारीअनुसार प्रधानमन्त्री ओलीले एमालेकै सांसदलाई नयाँ शिक्षा मन्त्री बनाउने तयारी गरेका छन् । ‘अब राष्ट्रिय सभा सदस्य अन्जान शाक्यलाई शिक्षा मन्त्री बनाउने पार्टीभित्र चर्चा छ,’ ती नेताले भने । प्रधानमन्त्री केपी शर्मा ओलीको सचिवालय स्रोतले पनि अन्जान शाक्यलाई शिक्षा मन्त्री बनाउने तयारी रहेको दाबी गरेको छ ।
एमालेका एक पदाधिकारीका अनुसार प्रधानमन्त्री ओली र मन्त्री भट्टराईको सम्बन्ध पछिल्लो समय सुमधुर थिएन । ‘शिक्षकहरू काठमाडौंकेन्द्रित आन्दोलनमा आउनुअघि नै शिक्षामन्त्रीले प्रधानमन्त्रीलाई भेट्न खोज्नु भएको थियो तर सचिवालयले समय मिलाइदिएन ।
प्रधानमन्त्रीलाई फोन गर्दा स्वकीय सचिव राजेश बज्राचार्यले उठाए, प्रधानमन्त्रीलाई फोन दिनुस् भन्दा कुरा भन्नुस् म नै सुन्छु भन्ने जबाफ दिएका थिए,’ ती पदाधिकारीले भने, ‘प्रधानमन्त्रीलाई फोन नदिएपछि रिसाउँदै शिक्षा मन्त्रीले म राजीनामा दिने हो भनेर फोन राखिदिनुभएको थियो।’
आफूलाई प्रधानमन्त्री, प्रधानमन्त्री सचिवालय र पार्टीका नेताहरूबाट सहयोग नभएको र प्रधानमन्त्रीलाई भेट्नसमेत नपाएकोमा उनले अपमानित भएको महसुस गरिरहेको ती पदाधिकारीको भनाइ छ ।
मन्त्रीबाट राजीनामा दिएकी विद्या भट्टराईले भैंसेपाटीस्थित मन्त्री क्वार्टर छोडेकी छिन् । सोमबार प्रधानमन्त्री केपी ओलीलाई राजीनामा बुझाएर उनी सिधैं आफ्नो निजी निवासमा गएकी छिन् ।
‘उहाँ आफ्नै चाबहिल घरमा आराम गरिरहनु भएको छ,’ स्रोतले भन्यो, ‘बालुवाटरमा सहयोगीको गाडीमा आउनु भएको थियो ।’ मन्त्री भट्टराईले सरकारी गाडी क्वार्टरमै छोडेर गएकी छिन् । गत असार ३१ मा प्रधानमन्त्री ओलीले उनलाई मन्त्रीमा नियुक्त गरेका थिए । ८ महिनामा नै उनले राजीनामा दिएकी हुन् ।
यसैगरी, प्रधानमन्त्री केपी शर्मा ओलीले देशको ढुकुटीले धान्न सक्ने र सम्भव हुने मागलाई राज्यले सम्बोधन गर्ने भएकाले अविलम्ब वार्तामा बसेर विद्यालय फर्कन आन्दोलनरत शिक्षकहरूलाई आह्वान गरेका छन ।
नेपाल प्रगतिशील प्राध्यापक सङ्गठनको ११ औँ राष्ट्रिय सम्मेलनको सोेमबार कीर्तिपुरमा उद्घाटन गर्दै प्रधानमन्त्री ओलीले अहिलेको सरकार दमनकारी नभई लोकतान्त्रिक भएकाले ट्रेड युनियनको अधिकारको रक्षासहित पेसागत क्षेत्रका जायज मागलाई सम्बोधन गरिने बताए । “विद्यालय शिक्षा विधेयक संसदीय समितिमा विचाराधीन छ ।
ऐन ल्याउन भनेर यत्रा शिक्षकहरू सकडमा आन्दोलनमा आउनु पर्दैन । भर्ना अभियान सुरू भइसकेको छ । कृपया जानूस्, विद्यालयमा गएर भर्ना गराउनूस् । एसइईको उत्तरपुस्तिका परीक्षण गर्नूस् । एसइईमा ५२ प्रतिशत विद्यार्थी फेल गराइएको भन्ने मेरो भनाइले चित्त नदुखाउनूस् ।
गुणस्तरीय शिक्षाका लागि लाग्नूस”, प्रधानमन्त्री ओलीले भने, “शिक्षकहरूको आन्दोलनले विद्यार्थी र अभिभावकलाई घाटा छ, शिक्षकहरूलाई लाभ छैन । त्यसकारण अविलम्ब वार्तामा बसेर आन्दोलन अन्त्य गर्नूस् । प्रतिगामी तत्वहरू सल्बलाएका बेला तपाईंहरुले आन्दोलन गर्ने उपयुक्त समय पनि यो होइन ।”
सिटीपोष्ट
प्रतिक्रिया दिनुहोस्