कांग्रेस र एमालेसँग तालमेल गर्दा माओवादीलाई घाटा भएको जिकिर सरकारका कारण प्रतिगामी शक्तिहरुले टाउको उठाउन थालेको टिप्पणी

बारा, ७ चैत । नेकपा (माओवादी केन्द्र) का अध्यक्ष प्रचण्डले कांग्रेस र एमालेसँग तालमेल गर्दा माओवादीलाई घाटा भएको जिकिर गरेका छन । माओवादी केन्द्र जिल्ला समन्वय समिति बाराद्वारा आयोजित तराई –मधेस जागरण सभालाई बिहीबार सम्बोधन गर्दै उनले कांग्रेस र एमालेसँग तालमेल गर्दा माओवादीलाई घाटा भएको जिकिर गरेका हुन ।

अध्यक्ष प्रचण्डले आफ्नो पार्टीले एक्लै चुनाव जित्ने आधार बलियो बन्दै गएको बताएका छन् । जनतासँग माओवादी, तराई मधेश जागरण अभियानअन्तर्गत बारामा आयोजित मधेश जागरण सभालाई सम्बोधन गर्दै उनले यस्तो धारणा राखेका छन् । विगतमा कहिले कांग्रेस त कहिले एमालेसँग मिलेर चुनाव लड्दा उनीहरुले फाइदा लिने तर माओवादीले घाटा व्यहोर्ने अवस्था रहेको उल्लेख गर्दै उनले अब एक्लैले चुनाव लडेर श्रेष्ठता हासिल गर्ने आधार बलियो बन्दै गएको बताए ।

गत मंसिरको उपनिर्वाचनहुँदै भर्खरै सम्पन्न स्ववियु निर्वाचनसम्म आइपुग्दा माओवादी एक्लैले चुनाव जित्ने आधार बलियो बन्दै गएको र कसैको वैशाखी नटेकेर माओवादी चुनाव लड्नै सक्दैन भन्ने विरोधीहरुको भाष्य खारेज भएको बताए ।

‘गत उपनिर्वाचनमा कांग्रेस एमाले मिलेर मात्र होइन, उनीहरुले आपसमा चुनाव चिन्ह साटफेर गरेर माओवादीविरुद्ध लड्दा पनि हामीले धेरै ठाउँमा भारी मतान्तरले जितेका थियौं’उनले भने, ‘अहिले स्ववियु निर्वाचनमा आउँदा पनि कांग्रेस र एमालेसमर्थित विद्यार्थी संगठनहरु मिलेर चुनाव लड्दा पनि माओवादी समर्थित अखिल क्रान्तिकारीले एक्लै देशव्यापी उत्साहप्रद नतिजा निकालेको छ, कयौँ ठूला क्याम्पसमा तिसौं वर्षदेखिका रेकर्ड तोडिएका छन् । युवा विद्यार्थीहरु अब प्रतिगमन र यथास्थितिको पक्षमा नभई अग्रगमन र परिवर्तनको पक्षमा छन् भन्ने स्ववियु निर्वाचनले स्पष्ट सन्देश दिएको छ ।’

अध्यक्ष प्रचण्डले स्ववियु निर्वाचनसम्म आइपुग्दा माओवादी एक्लै निर्वाचन लड्न सक्षम भएको प्रमाणित भएको बताएका छन् ।
‘कहिले कांग्रेससँग त कहिले एमालेसँग समीकरण गर्दाको फाइदा एमाले कांग्रेसलाई र घाटा माओवादीलाई भएको प्रमाणित भएको छ । अहिले स्ववियु निर्वाचनमा आउँदा समेत नेविसंघ र अनेरास्ववियुको समीकरण अखिल क्रान्तिकारीले तोडेका छन् । तिसौँ वर्षदेखिको रेकर्ड तोडिएको छ । अब यी सबै युवा विद्यार्थीहरू अग्रगमनका पक्षमा छन्, प्रतिगमनको पक्षमा छैनन्’, उनले भने ।

विश्वविद्यालयमा उच्च शिक्षा अध्ययन गर्ने युवा विद्यार्थीहरूको रुझान र उनीहरूको चेतना कतातिर जाँदैछ भन्ने कुराको राम्रो सङ्केत दिएको प्रचण्डले बताए ।
‘योपटक साँच्चै नै नयाँ इतिहासको रचना भएको छ । हिजो माओवादी केन्द्र अरूको वैशाखी नटेकी उठ्नै सक्दैन भन्ने भाष्य बनाएका थिए एमाले र कांग्रेसले । तर हामीले गएको उपचुनावमा के साबित गर्यौं भने कसैको वैशाखी टेकेर होइन हामी आफ्नै खुट्टामा उभिएर परिणामलाई आफ्नो पक्षमा पार्न सक्षम छौँ भन्ने साबित गरेका थियौँ’, उनले भने, ‘कांग्रेस र एमाले मिलेर चुनाल लडेर मात्र होइन चुनाव चिन्ह साटासाट गरेर एकै ठाउँमा उभिँदा पनि माओवादी केन्द्र अत्ध्याधिक मतले विजयी भएको सावित गरेका छौँ ।’

चैत ५ गते सम्पन्न स्ववियु निर्वाचनमा योपटक कांग्रेस निकट नेविसंघ र एमाले निकट अनेरास्ववियुको हाराहारीमा अखिल क्रान्तिकारीले विजयी भएको दाबी गरेको छ । नेविसंघ र अनेरास्ववियुको गढ मानिएको केही क्याम्पसमा विरासत भत्काउँदै क्रान्तिकारीले एक्लै निर्वाचन जितेको छ ।

अध्यक्ष प्रचण्डले सरकारका गलत क्रियाकलापको फाइदा उठाएर प्रतिगामी शक्तिहरुले टाउको उठाउने दुस्साहस गरेको टिप्पणी गर्दै जनताको अधिकारको रक्षाका लागि प्रतिगामी र यथास्थितिवादी शक्तिका विरुद्ध लड्नुपर्ने दायित्व फेरि जनताकै काँधमा आएको बताए । उनले पार्टीलेले अघि बढाएको तराई मधेस जागरण अभियानले दक्षिण नेपालका लाखौं जनतामा नयाँ भरोसा जगाएको बताए ।

यो अभियानले तराई मधेशमा बस्ने जनताको पहिचान, आत्मसम्मान र अधिकारलाई थप बलियो बनाउने विश्वास व्यक्त गर्दै उनले माओवादी र मधेशी जनताको बीचमा गहिरो सम्बन्ध स्थापित हुने बताए । अभियानका क्रममा यस क्षेत्रका जनताका समस्याको गहिरो अध्ययन गरी समाधानका लागि पहल गर्ने पनि उनले बताए ।

हुलाकी मार्ग दक्षिण नेपालको जीवनरेखा भएको उल्लेख गर्दै अध्यक्ष प्रचण्डले अहिले हुलाकी मार्ग निर्माणले गति लिइरहेको भए पनि विभिन्न ठाउँमा पुल बन्न नसकेकाले यो मार्गलाई पूर्णता दिन पनि अभियानले सहयोग गर्ने बताए । लामो समय अलपत्र परेको हुलाकी मार्ग अघि बढाउन आफूले २०७३ मा प्रधानमन्त्रीको रुपमा भारत भ्रमण गर्दा भारतीय प्रधानमन्त्री नरेन्द्र मोदीसँग छलफल गरी सहयोग सुचारु गरेपछि योजना अघि बढेको उनले जानकारी दिए ।